1 "Taka, faakpa, diekye lɛkpa lɛfɔ ntɔɔwa,

SAATE nwu leklekle kafɔɔ makpá ninkpete fɔ.

2 Nyu, ditunu ntĩi kasɔ

ditunu tunutunu kafɔɔ nfuu di batii suoto,

kafɔɔ SAATE nwu nkpa ankpete fɔ

leklekle nɔɔ kafɔɔ ndie nintĩi fɔ.

3 Nnle kamawa lɛkpa lɛfɔ nwu katũ,

baka kafɔɔ di kolɛsɛtũ lɛfɔ lɛkpa katũ.

4 "Takatɛsa anu lɛfɔ katoo faanyu fakyiko:

Bamuu lesi bɔɔwa ɔkyɛ lɛfɔ;

babisuɔtɔbi lɛfɔ makye fanfa manwa,

bɛɛkɛnkɛ babisankobi lɛfɔ kafɔɔ di nnɛɛ.

5 Ni fabanya suoto n-yɔɔ fɔ,

otu lɛfɔ makpanko kumuɔ ku lɛpɔ́;

babayɔ lekpo nwu lɛsaawɛ manwako fɔ,

nnle nwu lɛlɛ mawa ɔkyɛ lɛfɔ.

6 Kapu bapɔnkɔ kpinwu matĩi kasɔ lɛfɔ,

Midian ku Efa kapu bapɔnkɔ abi.

Bamuu kafɔɔ niekye ni Seba kamawa,

babawako koto sɛɛle ku olufui

mantooyie SAATE nwu katansa lɛkya.

7 Babasiisa Kedar bafoso bamuu manta fɔ,

akunumuu di Nebaiot masumu fɔ;

babafũ nya fɛ asaaɔta di oleɔta akyikye nii suoto,

ni kamaklɛɛ dibu nii olekatakɔ nwu.

8 "Bawe ninle mba mmle nikɔflɛlɛtɛ mankyi ni fɛle alokonkyɛ nɛ,

fɛle ablonima nikofe ayo lɛma?

9 Nwaako nsɔ be di ntu lɛmana diekyi ni konyu mi di anu;

Tasis seklo malekatũ,

mankpaa babisuɔtɔbi lɛfɔ mankyeko kakyonkɔ manwako,

ku koto fututu ku koto sɛɛle,

manta SAATE Yaa lɛfɔ dibu,

Israel Klekletɛ nwu,

diekye nnwɔɔ niɛklɛɛ fɔ ku dibu.

10 "Bafɔɔ makple manse seyoyiɛ lɛfɔ letofo,

baka lɛma kafɔɔ masumu fɔ.

Kuntɛ lananfi fɔ kootoko di ɔblɔ kanya yi,

sibualɛ nii kanya manya fɔ nyaami.

11 Nn-yoko lɛfɔ masɛkɛtɛ ninte obe lele,

blɔbasɛɛ mi diidii, kakũ ee kakyɛ,

alɛ batii kayɔ nnle nwu lɛsaawɛ manwako fɔ-

babaleko baka lɛma katũ di lelenkee lɛkyɛ kanya.

12 Diekye nnle ee sɛka nlekɔ be ninɔmasumu fɔ ni mawɔɔ;

bababiɛ sĩ fɛɛ.

13 "Lebanon dibu mawa ɔkyɛ lɛfɔ,

sɛfram ku sɛwaawaa ku sidum simuu,

kamaklɛɛ kakleklekɔ nii nwu;

mata dibu nkpaa nii kayilakɔ.

14 Batii ba nikomiina fɔ ni babisuɔtɔbi mawa mamawakasɔ di anu lɛfɔ;

batii ba bamuu ninnyu fɔ ni nyakatãa mawa mamawakasɔ di nkpaatũ lɛfɔ

manlɛɛ fɔ kafɔɔ alɛ SAATE nwu Okpoo kplɛ,

Sion, Israel Klekletɛ nwu.

15 "Kuntɛ baasĩ fɔ, baakyidi fɔ,

di kuonwii diloobuo ninnwu kamɛ afe yi,

kamata fɔ fanwɛ dibu dinaa ni kaloo

ku ana amuu suoto lɛyɔɔ.

16 Fabanyi nnle nwu nnyɛɛntu

fannyɛɛfu kafɔɔ di ɔka annyɛɛ.

Ni fabatofo falɛ, ami Saate , nwu ninle Dikitɛ lɛfɔ,

Kyakaakotɛ lɛfɔ, Yakob Sientɛ nwu.

17 Di kɔbli kanya yi, mawako fɔ koto sɛɛle,

koto fututu kafɔɔ di lɛbɔɔsaa kanya.

Di owoso kanya yi, mawako fɔ kɔbli,

lɛbɔɔsaa kafɔɔ di difuɔ kanya.

Mata atoko ɔkyɛ ole nle saate lɛfɔ

ɔsaabla tinini kafɔɔ tunletɛ lɛfɔ.

18 Blɔbasinnu kudu di kasɔ lɛfɔ suoto,

ee kawɔɔ ee kasaalalaasa di amɛ lɛfɔ,

kafɔɔ fabalɛɛ seyoyiɛ lɛfɔ falɛ Didiki

n-yoko lɛfɔ kafɔɔ falɛ Katansa.

19 Kufĩ dilɔbasinle fɔ ɔtɔ ku kakũ,

ee kɔwɛntɛ lɛkpa kafɔɔ kukpa kuta fɔ,

diekye SAATE nwu nimale fɔ lɛkpa dinaa ni kaloo,

Yaa lɛfɔ kafɔɔ nimale fɔ lɛkpa.

20 Kufĩ lɛfɔ dilɔbasimmɛɛ,

kɔwɛntɛ lɛfɔ kafɔɔ dilɔbasin-yɛ;

SAATE nwu nimale lɛkpa lɛfɔ dinaa ni kaloo,

sɛnyaami owi lɛfɔ ayi kafɔɔ maloo.

21 Ni batii lɛfɔ bamuu mate tinini

manfũ kafɔɔ kasɔ nwu dinaa ni kaloo.

Bale lɛsaa le lɛsɔ ni,

nnɛɛ nii kamɛ ɔkpɛ,

alɛ baadiki sɛlɛ nii mantuo.

22 Batii lee basɛɛ makple kakpe,

batii kafii mabla kale kplɛ.

Ami ninle SAATE nwu;

mata ni ninwa wla nse obe nini ntoowo."