1 Oo afɔ saalalaasatɛ, yɔɔsa,

afɔ wɔ manadilalaasa ni!

Oo afɔ batii kalɔ dikitɛ, yɔɔsa,

afɔ wɔ manadidiki bata ni!

Nse feediɛ asaa ɔlalaasa yi,

babalalaasa fɔ;

nse feediɛ batii odiki ɔta yi,

babadiki fɔ manta.

2 Oo SAATE, le wo sibualɛ;

buonyu fɔ osuku.

Kpee wo osie olesɛ biala,

faadiki wo di nimiina obe kamɛ.

3 Nse feediki kanya, balo nwu ntoso;

nse fɛɛtaka feeyila, nnle nwu nsamii.

4 Oo nnle, bɛɛlɛ ye asaa fɛ atroee abi beesiisa ni;

fɛle atroee ɔlambu di batii lebuo nya ni di suoto.

5 SAATE nwu lɛtaka katoo alenke, diekye osi ansiɛ;

abayiisa Sion ku lɛkanko biene ku ɔsaabla tinini.

6 Abale lɛsɔse biene anta obe lɛfɔ,

didiki lɛsaawɛ beekookaa ni ku ninumbe ku lɛsaatofo;

SAATE nwu ɔyɛkɛ ninle difinsaa le mmle saafĩi

7 Nyu, basientɛ lɛma kowi di akpaka;

atoko ɔkyɛ ole atɔbakyɛntɛ kowi osie kanya.

8 Sisuku kplɛ nfɛ nte fukuti,

osuku bakyɛntɛ diloosinfe di sisuku nwu,

kanya ninii nwu ntoofukuti,

boonyu kamaa ninwu bayilatɛ nyankatãa

boloobu kuonwii.

9 Kasɔ nwu lekoso keekpi kafɔɔ,

Sinunsɔ lɛkpɛ Lebanon, ɛɛyɔɔ kafɔɔ;

Saron nte fɛle Araba ɔfaafuu,

Basan ku Karmel awoso ntɔɔkpakpaa afata.

10 SAATE nwu alɛ, "Nunua kamataka.

Nunua kamatakatɛsa suoto katoo;

nunua kamatakatɛsa suoto osi,

11 Biɛlaka sɛsɔ lɛmɛ,

bielofo sibuu;

ninwuna lee nle ɔtɔ wɔ nimafiɛ ye nii.

12 Batii nwu kamafiɛ fɛle ama;

fɛle siwuufa bababudi mankpee ni ɔtɔ."

13 Aye ba ninkpe ni fanfa, binu lɛsaa le ntɔɔbla ni;

aye ba kafɔɔ niɛtɛɛtɛ nii, bitofo osie nii!

14 Lɛyɛkɛ ntɔɔpɛ bakpileblatɛ ba di Sion;

ditũkũ ntoomufũ mba ninanyɛkɛ ni Yaa:

"Owe loo nimafuo osiɛ ku ɔtɔ wɔ nikofiɛ ni?

Owe loo nimafuo osiɛ ku dififiɛ le ninaa ni kaloo?"

15 Otii wɔ ninkyɛ ni di ɔsaabla tinini kamɛ

ambuɛ ni ɔlaa wɔ kafɔɔ ninte ni nkpo,

anan-yɔ katafaa awɛ ni lɛlɛ

ansĩ ni ditunu kamɛ asaa kafɔɔ ofũ ku nnɛɛ nɔɔ,

anamiɛ alɛ eenu ni ku atoko nɔɔ alɛ bookũ ni kanwumbe di otii olo suoto

antĩi ni anu nɔɔ kafɔɔ di asaa kpile ɔbla suoto-

16 nnwɔ mmle nimale otii wɔ nimasiɛ ni di ntakalekɔ nɛ,

nnwɔ di katanikokɔ nɔɔ nimale ni kobokote difuɔnkpaa nwu nɛ.

Babatɔɔ alesaa nɔɔ,

ntu kafɔɔ dilɔbasɔɔ nwɔ.

17 Anu lɛfɔ kamanya ɔka nwu di sɛlɛ nɔɔ kamɛ

fannya kafɔɔ kasɔ ka niɛblɛfɛ kate keesifi ni fanfa.

18 Fababu disi di saa lɛyɛkɛ nwu fankaalɛ falɛ:

"Ɔfɛ di kanyayilatɛ nɔɔfo nwu nkpe?

Ɔfɛ di nnwɔ niafũ ni kɔsɔsĩ nkpe?

Ɔfɛ di ayotakale nwu nyayilatɛ nkpe?"

19 Flɔbasinnya batokopĩtɛ nwu diidii,

batii nwu nintɔɔkpɛɛ ni di lɛkakatɛ kamɛ,

ku sɛkplalomii lɛma manannu ni kasɔ.

20 Nyu Sion, ayi ole loo okpoo kplɛ nwu;

anu lɛfɔ kamanya Yerusalem,

atoko ɔkyɛ ole kasiɛkɔ nwu, lɛkpaayo le manamakpa nii;

blɔbasifi ni akpaka diidii,

ee babudi ni sikũ kuonwii.

21 Nfa di SAATE nwu kamale wo Sientɛ nɛ.

Dibate fɛle sekle blɛfɛɛ ku seklenyii lɛba.

Oklo kuonwii nimanwa ni nfa ku oklo nflɛ dilɔbafuo sĩ ɔtaalɛ,

ee oklo kplɛ kuonwii dilɔbafuo sĩ ofe di suoto.

22 Diekye SAATE nwu ninle wo kantɛ,

SAATE nwu ninle wo kufiofa tatɛ,

SAATE nwu ninle wo ɔka;

nnwɔɔ nimadiki wo nɛ.

23 Sikũ lee ntoofukuti sisaka:

Owoso takale nwu diesinmufũ kukle,

diɛnanfi dibula nwu.

Nni kamaa babasɛ lɛsaawɛ kpinwu

bia mba di nkpaa lekpiɛkiɛ ni kamatuka asaa nwu beefũ ni mansifiko.

24 Sion basiɛtɛ kuonwii dilɔbabuɛ alɛ, "Kofiɛ";

babayɔ mba ninsi ni ninfa kafɔɔ sikpile mankyɛ ma.