1 Di obe nwu nkpo kamɛ Merodak-Baladan Babilon ɔka obisuɔtɔbi Baladan lakyesee Yesekia akũ ku lɛkyɛsaa, diekye aanu nwɔ ofiɛ ku ɔtaka di ofiɛ. 2 Yesekia lafũ batɔkyɛntɛ nwu ku suoto lɛyɔɔ ni aatuo ma asaa ya niate ni di asaa nɔɔ katɛkɔ nɛ. Aatuo ma kotofututu, kotosɛɛle, asaa kɔnɔkɔnɔ, nnɔnyi biene, akpɛsaa nɔɔ katɛkɔ kamuu ku lɛsaa biala niate ni di asaa kakookaakɔ nɔɔ. Lɛsalɛsaa kuniwii naa di ɔka leyo ee di sɛka-kalekɔ nɔɔ kamuu di Yesekia ditatuo ma nii.

3 Ninfɛ di ɔlaabuɛtɛtɛ Yesaya lakyɛ Ɔka Yesekia nfũ aalaakaalɛ alɛ, "Be di basuɔtɔ nwu lebuɛ, ɔfɛ kafɔɔ beekye?"

Ninfɛ di Yesekia ladiki kanya alɛ, "Beekye kasɔ fanfa, beekye Babilon bɛɛwa ɔkyɛ nii."

4 Ɔlaabuɛtɛtɛ nwu lakaalɛ alɛ, "Be lɛsaa bɛɛnya di lɛkayo lɛfɔ?"

Yesekia ladiki kanya alɛ, "Bɛɛnya lɛsaa biala di lɛkayo nii kamɛ, lɛsalɛsaa nnaa di asaa nii katɛkɔ ninantuo ma nii."

5 Ninfɛ di Yesaya latɔkɔ Yesekia alɛ, "Nu SAATE wɔ Ninlenke ni ɔlaa: 6 Nwaako obe kamawa babatuka lɛsaa biala di lɛkayo lɛfɔ ku n-ya amuu di bate lɛfɔ lekookaa ni diɛbadu miɛ, mansifiko Babilon. Lɛsalɛsaa dilababu, SAATE nwu niebuɛ. 7 Banantii lɛfɔ bawo, afɔ omu ntɔ babi ba babalofo manta fɔ nii, babakpaa ma mansifiko, babata ma mankple asaa banyuntɛ di Babilon ɔka leyo."

8 Ninfɛ di Yesekia ladiki kanya alɛ, " SAATE nwu ɔlaa feebuɛ ni nlɛ." Diekye aanyu alɛ, "Atoko ɔkyɛ ole ku katĩtĩi kamawɛ di nkpa nii osiɛbee kamɛ."