1 "Biwa, aye ba bamuu di otukɔnsɔ nkle ni,

biwa ntu katũ;

aye ba kafɔɔ ninaa ni koto,

biwa, bibaya biele!

Biwa, biya nta ku nankyue nnyɛɛtu

di koto nnaa ni, ninanfũ ni kɔya.

2 Obe oso minlalaasa koto di lɛsaa le ninanle ni alesaa suoto,

sɛkpɛ lee ɔbla kafɔɔ di lɛsaa le ninamiɛsa ni suoto?

Binu, bikyɔɔ mi atoko, bile kafɔɔ alesaa ya ninlɛ ni,

ni dibalɛ ninta ye nwaa, ni bibanya suoto lɛyɔɔ di kɔya yɔɔle suoto.

3 Bikyɔɔ atoko, biɛwa ɔkyɛ nii;

binu mi ɔlaa, alɛ ɔkla lee kasiɛ nkpa.

Kamanii kanya ka ninaa ni kaloo ku afɔ,

onukwale nii lɛbɔmbɔ baabuɛ baatɛ ni Dawid.

4 Nyu, ntɔɔblɔɔ kamaayilatɛ lɛta batii nwu,

batii kanyayilatɛ ku bakpɛtɛ ɔnɔɔfo.

5 Nwaako fabalɛɛ nnle be fanaan-ye ni,

nnle be kafɔɔ ninan-ye fɔ ni mapɛsɛwa manwa ɔkyɛ lɛfɔ,

taSAATEYaa lɛfɔ oso,

Israel Klekletɛ nwu,

diekye ɛɛyɔ dibu ɛɛta fɔ."

6 Ta nkpo oso, biwolaa SAATE nwu di obe wɔ bibanyɔɔ ni;

bilɛɛ nwɔ di obe wɔ ɛɛtɛɛtɛɛ ni.

7 Ta amumu otii nwu akyi di osuku nɔɔ nwu

di otii kpile nwu kafɔɔ adiɛ disibu nɔɔ.

8 SAATE nwu alɛ,

"Diekye disibu nii diele asibu lee,

nkpo di sisuku lee diele sisuku nii nɛ."

9 "Fɛ mmle di osi lɛtaka kulenke ni kasɔ yi,

nkpo di sisuku nii lɛtaka katoo silenke sisuku lee

disibu nii kafɔɔ nlenke asibu lee nɛ.

10 Fɛ mmle di kanto ku atubakani

nkye osi anwa ni kasɔ,

anaasinkple aasifi ni

alɛ aakpekpete ni kasɔ ntu

kanta kankpee atoto anfukuti nii,

alɛ aatika abi anta fekpɛntɛ ku alesaa anta ni letɛ yi,

11 nkpo di ɔlaa nii wɔ niedie ni di kanya nii nte nɛ:

Kulɔbakple kuwa ɔkyɛ nii ofukuti,

kafɔɔ kualoo ni dibiesaa nii ɔbla,

lɛnya ni lɛsaa le oso lekpee nwu nii.

12 Bibadie minsifi ku suoto lɛyɔɔ

babakpaa ye kafɔɔ ku atoko ɔkyɛ ole;

abokote nwu ku akpenkpe

mataasa sinu di anu lee,

awoso ya amuu kafɔɔ di afe mapɛ anɛɛkya lɛnya.

13 Ɔfram kamakɔntɔ di siwuu kayilakɔ,

kɔlɛɛfɔ kamakɔntɔ di kakɔtɔkɔtɔ kayilakɔ.

Nle mmle male ninyumasaa ninta SAATE nwu,

ninta dituosaa dinaa ni kaloo,

nle manamalalaasa nii."