1 Saate nwu kamanya Yakob nyaami;

abakple andiki Israel

ankple ansiɛsa ma di kasɔ lɛma kamu suoto.

Bafɔɔ kamakpɔtɔɔ kaamɛ lɛma

mambla onwii kafɔɔ ku Yakob leyo.

2 Nnle mafũ ma

mankyakaako ma mankple mansifi mma bamu kasɔ.

Israel leyo nwu kafɔɔ kamafũ nnle nwu

fɛ balanlesuɔtɔ ku balanlesanko di SAATE nwu kasɔ suoto.

Babamufũ mba niamufũ ma ni sɛlanle

manle sɛka di mba nianyinka ma baatɛ ni kaasɔ.

3 Di dii le di SAATE nwu kamata fɔ ni ɔnyɛɛ ɔtɛ di dibuo ku kakpɔkpɔtɔ ku disi osie ninii kamɛ yi, 4 fabakyako Babilon ɔka ɔma fambuɛ falɛ:

Lɛ nfɛ di onyinka ɔtɛ kaasɔ ntooloo!

Lɛ nfɛ di ɔblɔ nɔɔ nwu ntɔɔwa kaloo!

5 SAATE nwu ntoofee siensientɛ nwu kawesee,

baka kayofo nwu

6 di ɔblɔ kamɛ kaapɛ batii kaatɛ ni kaasɔ

ku ɔnyɛɛ ɔtantɛ aklɔklɛ,

di ɔblɔ kanya aanyinka nnle aatɛ kaasɔ

ku ninunsɛɛ ɔnyɛɛ ɔtantɛ.

7 Nsɔ mmuu kɔtɛ ɔnyɛɛ ku atoko ɔkyɛ ole;

bɔɔsa suoto lɛyɔɔ sinu.

8 Bia ɛfram awoso ku seda awoso di Lebanon

kɔnya suoto lɛyɔɔ di suoto lɛfɔ boobuɛ alɛ,

"Nunua batɔɔtɛ fɔ ni kaasɔ

awosobuditɛ kuonwii ninwa ababudi wo atɛ kaasɔ."

9 Sɛkya simuu kaasɔ lelolaa suoto

alɛ bɔɔkyakako fɔ di ɔwa lɛfɔ kamɛ;

siɛtakatɛsa bakpi nintookpi ni alɛ basɛɛsa fɔ

mba bamuu niale ni batunletɛ kaayi;

siɛta ma bɛɛtaka di akakpomii lɛma suoto-

mba bamuu niale ni baka di nnle suoto.

10 Bamuu lɛma kamatuna,

bababuɛ mantɔkɔ fɔ alɛ,

"Afɔ kafɔɔ fatɔɔyɔɔ, fɛ mmle bute nii;

nfɛ fate fɛle awo."

11 Batɔɔyɔ lɛlɛ lɛfɔ nwu nimuu bɛɛwako ɔkya kamɛ,

ku basanku lɛfɔ nwu sɛlɔ;

akudikudi ninle fɔ atensaa

bakunwɔɔ kafɔɔ ntĩi fɔ suoto fɛ dibula.

12 Nyu mmle fatɔɔkpa feekye ni osi,

O olese lɛwɛntrɛbi, kuyitatũ obisuɔtɔbi!

Batɔɔkpakatɛ fɔ bɛɛpɛ kaasɔ,

afɔ wɔ nintoodinyinka ni nnle fɛɛtɛ ni kaasɔ!

13 Faabuɛ di otu lɛfɔ kamɛ falɛ,

"Kamakata nsifi osi;

kamatakatɛsa lɛkakpomii nii katoo

nlenkeesa ni Yaa awɛntrɛbi;

kamasiɛ di bawokalɛɛkɔ kobokote nwu nle sɛka,

di katakalekɔ ka ninlenke ni di kobokote klekle nwu suoto.

14 Kamakata nsifi alokonkyɛ nsintɛɛ;

kamabla suoto fɛle nnwɔ Niɛtaka Katoo Alenke ni."

15 Kafɔɔ bɛɛkpaa fɔ bɛɛwako ɔkya kamɛ,

di dibiɔ kamɛ kakyofolekɔ.

16 Mba niɛnya fɔ ni ntoonyu fɔ tuĩi,

mambu diisi mambuɛ alɛ:

"Osuɔtɔ wɔ niatũkunsa ni kasɔ ninle nwɔ mmle nɛ,

aata ni nnle kafɔɔ latootũtũkũ ni,

17 osuɔtɔ wɔ niabla kayi lakple ni ɔfaafuu,

aabiɛ ka ni sekpoo kplɛ

ananta balanle nɔɔ lasifi ni sekpoo lɛma nɛ?"

18 Nnle nwu mmuu baka nte di nkookaakɔ lɛma ku dibu

obiala lɛma di ɔkya nɔɔ kamɛ.

19 Kafɔɔ beediki fɔ di ɔkya lɛfɔ kamɛ beeyu

fɛle owosola wɔ beesĩ nii;

beetĩi fɔ ku mba beelo nii,

ku mba beetofo ni ku mpamii

mba niɛkyɔlɔlɔ beesifi ni afuɔ abiɔ kamɛ.

Fɛle kpi wɔ bɛɛnanafu ni ku nkpaa,

20 flɔbasiɛ ma kaamɛ balaakookaa,

diekye fatɔɔlalaasa kasɔ lɛfɔ

feelo kafɔɔ batii lɛfɔ.

Basiensietɛ banantii mma

blɔbasinlɛɛ ma leyooto diidii.

21 Bilolaa lɛba bita babisuɔtɔbi nɔɔ olo

di bawa lɛma sikpile suoto;

dinaa alɛ bɛɛtaka beele kasɔ nwu atesaa

alɛ beeyii kayi ku sekpoo kplɛ lɛma nwu.

22 SAATE wɔ Ninlenke ni alɛ,

"Kamataka nyila ma di suoto.

Kamayɛɛsa Babilon leyooto, nwɔɔsa mba niebu basi ni nkpa,

babi ku banantii nɔɔ,"

SAATE nwu niebuɛ.

23 "Kamakplesa nwu mbla asukusuku nsiɛkɔ

mbla nwu kafɔɔ lɛfɔkasɔ;

kamafiɛ nwu ku kawɔɔ ofiɛ,"

SAATE wɔ Ninlenke ni niebuɛ.

24 SAATE wɔ Ninlenke ni laka ntam alɛ,

"Nwaako, fɛ mmle ntɔɔbla ni disibu, nkpo dibate nɛ,

fɛ mmle kafɔɔ ntɔɔtɛ nii, nkpo dibawa kaanya nɛ.

25 Kamabibiɛ Asiria batii di kasɔ nii;

di kobokote nii nwu kamananafu nwɔ ntɛ kaasɔ.

Babatekete atoo nɔɔ di batii nii suoto

mantekete dibuo nɔɔ kafɔɔ di amuusi lɛma."

26 Nnya disibu le lɛtɛ lɛta ni kayi kamuu;

nnya kɔnɛɛ ko lediki lɛkyɔɔ ni di nnle mmuu suoto.

27 Diekye SAATE wɔ Ninlenke ni ntɔɔbla disibu, owe nimafuo nwɔ oyilasa?

Kɔnɛɛ nɔɔ nfɛ nkyɔ kaayi, owe nimafuo kũ okplesa?

28 Ɔlaa wɔ mmle lawa di lɛlɛɛ le di Ɔka Ahas lakpi nii:

29 Aye Filisti batii bamuu bitannya suoto lɛyɔɔ,

bilɛ kawesee ka niapɛ ye ni ntoofee;

di kɔsaanwu nwu nkpo kɔna kamɛ akotia kamadie,

dibi nɔɔ kamale kɔsaanwu kpile nin-yɛ ni afoko.

30 Piitɛ di bapiitɛ kamɛ kamawɛ alesaa kalekɔ,

mba diefĩ ni kamate di atoko ɔkyɛ ole kamɛ.

Kafɔɔ kamayɔ kɔka nwɔɔsa odu lɛfɔ;

kubalo batii lɛfɔ ba nimabu mansiɛ ni nkpa.

31 Oo kayoko, wi, Oo okpoo kplɛ, wi osie kanya!

Filisti batii bamuu lɛyɛkɛ dipɛ ye!

Dituntũ kɔyɔ lekye katoo kuɔwa,

kuonwii lɛma kafɔɔ diɛwa kasɔ kaakpɛ kamɛ.

32 Ɔmɛlaa kanya baadiki bata

kale nwu batɔkyɛntɛ?

"Saate nwu nintoose Sion,

di nnwɔɔ kamɛ batii nɔɔ ba beenyinka ni kamawɛ katanikokɔ."