1 Oo Sion sɛnkɛ, sɛnkɛ,

faakpee suoto osie.

Faayɔ dibu lɛfɔ dibula fanyukũ,

Oo Yerusalem, okpoo kplɛ klekle nwu.

Batii ba ninankyɛlɛnsa ni suoto ku mba niɛkpɔnɔnfɔ ni

dilabasimbuo fɔ kamɛ diidii.

2 Fɛntɛ kudu lɛfɔ nwu di suoto;

Oo Yerusalem, taka faasiɛ di dibu kasiɛkɔ.

Diki suoto di anyɛnɛ nwu ninsi fɔ ni di ɔkɔnsɔ,

Oo Sion obisankobi ɔlanle.

3 Diekye nnya ɔlaa wɔ di SAATE nwu kobuɛ ni:

"Baasunsũ ye, batafũ koto,

nioso blabata koto badiki ye."

4 Diekye nnya ɔlaa wɔ di SAATE Kplɛ nwu kobuɛ ni:

"Lɛkasale yi, batii nii lasifi Egipte baalaasiɛ fɛ bafɔɔ;

sɛmaa, Asiria batii lanyinka ma baatɛ kaasɔ.

5 SAATE nwu kobuɛ alɛ, "Nunua be ninkpe mi ɔbla ninfũ?"

"Diekye bɛɛkpaa batii nii beesifiko baata koto,

batunletɛ lɛma kafɔɔ kɔma ma,"

SAATE nwu niebuɛ.

"Dii biala kafɔɔ

bɔɔkpɔnɔfɔsa mi leyooto obe lele.

6 Nkpo oso batii nii kamatofo mi leyooto;

nkpo oso di dii nwu nkpo babatofo

alɛ ami niabuɛ nwu latɛ.

Nwaako, Ami dile."

7 Nnya mmle diɔlɛ ni onyu di abokote osi

mba nkpaa nikɔwako ni ɔlaa biene nwu,

mambuɛ ni atoko ɔkyɛ ole ɔlaa

manwako ni sɛlaa biene,

mambuɛ ni didiki ɔlaa,

mantɔkɔ ni Sion alɛ,

"Yaa lee kole sɛka!"

8 Nu! Asaa banyuntɛ lɛfɔ lekplesa sɛlɔ katoo;

bamuu lɛma booyiisa kudu ku suoto lɛyɔɔ sinu.

Diekye babanya ku mma bamu anu

obe wɔ di SAATE nwu kamakple anwa ni Sion.

9 Aye Yerusalem okpoo biɛle nwu,

bibla onwii biɛsa suoto lɛyɔɔ sinu,

diekye SAATE nwu ntookpee batii nɔɔ kɔnɛɛ kaafutu,

atoodiki Yerusalem.

10 SAATE nwu ntoodiki kɔnɛɛ nɔɔ nwu klekle kayi

di nnle mmuu anu,

kasɔ kamuu nyɛntɛlekɔ kafɔɔ kamanya

Yaa loo didiki nwu.

11 Bitɔɔkyɛ, bitɔɔkyɛ, bidie ninfa!

Bitankpanko lɛsaa le ninanklekle ni kuninwii!

Bidie nwu kaamɛ, biekleklesa suoto,

aye ba nintuka ni SAATE nwu akpɛnsaa.

12 Kafɔɔ bilabadie nkyenkye

ee bitoso bisifi;

diekye SAATE nwu kamaleko ye katũ,

Israel Yaa nwu kamatĩtĩi ye sɛɛmaa.

13 Nyu, kpɛmblatɛ nii kamabla lɛsaa di ninumbe kanya;

babatakatɛsa nwɔ katoo, anfũ kafɔɔ leyooto, antaka katoo anlenkee.

14 Fɛ mmle okle di batii kpinwu lanyɔɔ diabla ma ni ɔkpɛ-

di letembi nɔɔ lalalaa dialenkee ni otii letembi

di letembi nɔɔ ditasindie ni otii lele-

15 nkpo abata nimbla nnle kpinwu ɔkpɛ nɛ,

baka kafɔɔ kamamaasa nnya lɛma ta nnwɔɔ oso.

Diekye lɛsaa le batatɔkɔ ma ni babanya,

nle kafɔɔ batanu ni, nni kasɔ babanu nɛ.