1 Oo SAATE, afɔ ninle Yaa nii;

kamatakatɛsa fɔ katoo ntansa fɔ leyooto,

diekye di onukwale osuku kanya

fɛɛbla asaa ya niɛbla ni ɔkpɛ,

asaa ya disibu faabla ni kofokofoko.

2 Fatɔɔta okpoo kplɛ nwu lekple atɛnkudi beesiisa nii,

okpoo wɔ beetofo oyoyiɛ beekyisa ni lebiɛ,

bafɔɔ kamaakakpɛkɔ okpoo kplɛ nwu nsinnaa;

blɔbasintofo nwu diidii.

3 Nkpo oso batii siene kamayɔ dibu manta fɔ;

sekpoo kplɛ di nnle yakayaka kamayɛkɛ fɔ.

4 Fale katanikokɔ fɛɛta bapiitɛ,

katanikokɔ fale fɛɛta nnwɔ diefĩ ni di dibuo kamɛ,

lɛkpaayo fale fɛɛta di afɛɛfɔ kamɛ

ku oyududu di difila kamɛ.

Diekye basiensietɛ ninwuna

nte fɛle kɔfɛɛfɔ nikɔɔfɛ di oyoyiɛ suoto

5 dite kafɔɔ fɛle ɔfaafuu difila.

Feeniisa bafɔɔ ɔblɔ kudu;

fɛ mmle di lelokonkyɛ oyududu n-yɔɔsa ni difila,

nkpo di basiensietɛ onu lenii nɛ.

6 Di kobokote ko mmle suoto di SAATE wɔ Ninlenke ni kamatũ

alesaa biene opunu anta batii bamuu,

opunu otũ ku bakofo nta-

sina biene ku nta nwaa.

7 Di kobokote ko mmle suoto abalalaasa

dibula le nietĩi ni batii bamuu,

ditĩisaa le nietĩii ni nnle mmuu;

8 abamɛ kukpi kulɔbasinwɛ diidii.

SAATE Kplɛ nwu kamasunsũ nnumɛɛ nwu

di anu amuu;

abatekete sinunsɔ nwu di batii nɔɔ suoto

di kasɔ kamuu.

SAATE nwu niebuɛ

9 Di dii nwu nkpo bababuɛ alɛ,

"Nwaako Yaa loo ninle nnwɔ nɛ;

buatika nwɔ disi, ni aadiki wo nɛ.

Nnya SAATE nwu; buatika nwɔ disi;

bita bupɔ, buɔnya suoto lɛyɔɔ di didiki nɔɔ nwu kamɛ."

10 SAATE nwu kɔnɛɛ kamatika di kobokote ko mmle suoto;

kafɔɔ nnwɔɔ abananafũ Moab

fɛ mmle mannanafũ ni sɛsɔ di lefleku.

11 Babablɛfɛsa nnɛɛ lɛma kaamɛ nɔɔ,

fɛ mmle di ntu fiatɛ mblɛfɛsa ni nnɛɛ nɔɔ anfia ni ntu.

Yaa kamawakosa suoto lɛma katoo ɔtakatɛsa kasɔ

akpakpa di nnɛɛ lɛma nkpe sɛwa.

12 Ababiɛ seyoyiɛ siene takale lɛfɔ nwu

antɛ sĩ kaasɔ;

ababiɛ sĩ antɛ kaasɔ,

di kɔtɛ kamɛ.