YESAYA 37

Ɔka Yesekia Lakaalɛ Yesaya Alɛ Atɔɔ Disibu Nɔɔ

1 Obe wɔ di Ɔka Yesekia lanu ni ɔlaa wɔ mmle, aabɛbɛɛ akpeele nɔɔ, ni aanyukũ leboko, aasifi SAATE nwu olekatakɔ kamɛ nɛ. 2 Ni aakpee Eliakim lɛkayo asaa nyuntɛ, kukũ kpanatɛ Sebna ku olebatatɛ batunletɛ, bamuu lanyukũ aboko baakyɛ ɔlaabuɛtɛtɛ Amos obisuɔtɔbi, Yesaya nfũ nɛ. 3 Ni baatɔkɔ nwɔ alɛ, "Nnya ɔlaa wɔ di Yesekia kobuɛ ni alɛ: Miɛ dii le mmle nle nimiina ku ɔlaa osĩ ɔta ku sinunsɔ dii, fɛ nse boolofo obisɔ di ɔnyɛɛ nsinnaa baakɔɔsĩ nwɔ mandiki ni nɛ. 4 Loobia Saate , Yaa lɛfɔ nwu manu sɛlaa se di kakpɛ kanyayilatɛ nwu, nnwɔ di saate nɔɔ Asiria ɔka nwu lekpee, ɛɛbakpee ni Yaa wɔ ninkpe ni nkpa oyududu. Mmle aananfi nwɔ ni kootoko ta sɛlaa se di Saate , Yaa lɛfɔ nwu ntoonu ni oso. Nioso pɛ ɔlaa fata mba niebu basi ni nkpa."

5 Obe wɔ di Ɔka Yesekia banɔɔfotii lawa ni Yesaya nfũ, 6 Yesaya latɔkɔ ma alɛ, "Bitɔkɔ saate lee bilɛ, ‘Nnya ɔlaa wɔ di SAATE nwu kobuɛ ni alɛ: Bitanyɛkɛ ɔlaa wɔ bitoonu nii- sɛlaa se di Asiria ɔka batɔkyɛntɛ lɛbabuɛ beekpee mi ni oyududu. 7 Binu! Kamayɔ ninwuna ninwii nkpee nwɔ kaamɛ, alɛ nse eenu ɔlaa owo, abakple ansifi kale nɔɔ kamu, nfa nfɛ kamata manlo nwɔ ku kapamii nɛ.’ "

8 Obe wɔ di kakpɛ kanyayilatɛ nwu lanu alɛ Asiria ɔka ntoodie ni di Lakis, ni aakple aasifi, ni aalaanya ɔka nwu kɔkpɛko Libna nɛ.

9 Ninfɛ di Senakerib lafũ kanya alɛ Tirhaka, Egipte ɔka Kus otii nwu ntoodie ɔɔwa nwɔ ɔkpɛko. Obe wɔ aanu ni ɔlaa nwu, ni aakpee batɔkyɛntɛ Yesekia nfũ ku ɔlaa wɔ mmle alɛ: 10 "Bitɔkɔ Yuda ɔka Yesekia bilɛ: Tanta Yaa wɔ feetika ni disi lakyɔnkyɔ fɔ nse eebuɛ alɛ, ‘Blɔbayɔ Yerusalem bakpee di Asiria ɔka nnɛɛ.’ 11 Nwaako fatoonu lɛsaa le di Asiria ɔka ntɔɔbla ni nnle nwu mmuu ɛɛwɔɔsa mi ni klekle. Ni afɔ babadiki fɔ? 12 Nnle be di bawa nii lawɔɔsa ni, afiɔ lafuo ma odiki- nnle fɛ Gosan, Haran, Resef ku Eden batii ba niawɛ ni di Tel Asar? 13 Ɔfɛ di Hamat ɔka nkpe, Arpad ɔka, Sefarwiam okpoo kplɛ ɔka ee Hena ee Iwa ɔka nkpe?"

Yesekia Ɔlaa Ɔpɛ

14 Yesekia lafũ kukũ nwu di batɔkyɛntɛ nwu nfũ ni aaka kũ nɛ. Ninfɛ aasifi SAATE nwu olekatakɔ ni aafukuti kũ aatɛ di SAATE nwu anu nɛ. 15 Ninfɛ di Yesekia lapɛ ɔlaa aata SAATE nwu alɛ: 16 "Oo SAATE wɔ Ninlenke ni, Israel Yaa, fasi di bakerubim osi, lete lɛfɔ nikole sɛka di sɛka nlekɔ mmuu di kasɔ suoto. Afɔ niɛbla osi ku kasɔ. 17 Oo SAATE, kyɔɔ aatoko, faanu; Oo Saate , tikiti anu faanyu; nu sɛlaa se simuu di Senakerib lekyesee, ootufa ni Yaa wɔ ninkpe ni nkpa.

18 "Oo SAATE, nwaako dile alɛ Asiria ɔka ntɔɔwɔɔsa batii ba mmle bamuu ku nsɔ lɛma. 19 Baafuki afiɔ lɛma baakpee di ɔtɔ baawɔɔsa nya, diekye batale bayaa kafɔɔ asaa ya di batii layɔ awosoku ku afuɔ baabla ni ku nnɛɛ aale. 20 Nkpo oso nunua, Oo SAATE Yaa loo, diki wo fakyeko nnɛɛ nɔɔ, alɛ sɛka nlekɔ mmuu kaasɔ katofo alɛ lete lɛfɔ, O Saate , ninle Yaa."

Yesaya Lafũ Ɔlaa Aakyeko Yaa Nfũ Aakyɛnko Ɔka Yesekia

21 Ninfɛ di Amos obisuɔtɔbi, Yesaya latika kanya baakyɛnko Yesekia alɛ: "Nnya ɔlaa wɔ di SAATE, Israel Yaa nwu kobuɛ ni alɛ: Ta fɛɛpɛ ɔlaa fɛɛtɛɛ ni di Asiria ɔka Senakerib suoto oso yi, 22 nnya ɔlaa wɔ di SAATE nwu lebuɛ eeyila nwɔ ni di suoto alɛ:

"Sion Kakpeelebitɛ Obisankobi

lenyu fɔ nyakatãa, ɔɔma fɔ kafɔɔ.

Yerusalem Obisankobi

kotunkunsa disi nɔɔ, footoso nii.

23 Owe feetufa, feekpee sinunsɔ kafɔɔ?

Owe fɛɛtakatɛsa sɛlɔ feemuɛ

fɛɛtakatɛsa anu kafɔɔ feenyu ku lɛkanta?

Di Israel Klekletɛ nwu suoto fɛɛtaka fayɛ!

24 Feefe di batɔkyɛntɛ lɛfɔ suoto

faatufa SAATE nwu.

Ni faabuɛ falɛ,

‘Ku bakeke nii ba di bapɔkɔ nnanfi ni

lɛkata lɛkyɛ abokote nsintɛɛ,

Lebanon katakalekɔ yɛntɛle.

Lebudi nwɔ sedar takale omuu lɛtɛ kaasɔ,

ku awoso siene biene nɔɔ.

Lɛlaadu katakalekɔ kyonle nɔɔ,

ku lepoo benle biene nɔɔ nwu kamɛ.

25 Lakutu ntu abiɔ di bafɔɔ nsɔ

lanyi ntu nwu ninfa.

Ku nkpaasɔ nii

lata Egipte seklenyii simuu lasɔɔ.’

26 "Fadinu?

Latɛ ni kofokofoko.

Di saa obe kamɛ labla disibu nwu;

mmia nwu ntɔɔta diɛwa kaanya nɛ.

alɛ faabiɛ sekpoo kplɛ siene

sinkple siyiɛkuu.

27 Batii lɛma dilɔbawɛ ɔnyɛɛ,

dibabla ma ɔkpɛ, manfũ sinunsɔ.

Bate fɛle alesaa di kofe,

niɛkɔntɔ ni sɛfɔle,

fɛle sɛfa nikɔkɔntɔ ni di leyo osi,

sin-yɔɔ ni fiɛ simamuɔ nii.

28 "Kafɔɔ n-ye nfũ fasi nii

ku obe wɔ fanwa fansifi nii

ku mmle fɛɛtaka fayɛ mi ni di suoto.

29 Ta fɛɛtaka fayɛ mi ni di suoto

di suoto katoo lɛfɔ ɔtakatɛsa ntoodu ni atoko nii kafɔɔ oso,

kamayɔ lɛkɔnii nii nkpee fɔ di onwu

n-yɔ ofutuwɛ nii kafɔɔ ntũ fɔ kaanya,

ninta fɔ fankple fansifi

di osuku wɔ feefe fɛɛwa nii.

30 "Oo Yesekia: Nle mmle nimale nsũ lɛtɛsaa ninta fɔ alɛ:

"Lɛlɛɛ le mmle bibale asaa ya di nnya amu niɛkɔntɔ nii,

lɛlɛɛ nyɔɔfa kafɔɔ diputu kamɛ ale bibale.

Kafɔɔ lɛlɛɛ tiɛfa bibapɛ asaa minfee,

bibakpɛ nta awosobi kofe, minle nya abi.

31 Diɛkyakaa nii, mba niebu ni di Yuda leyo kamɛ

kamase sidu kaasɔ mantika kafɔɔ abi di osi.

32 Diekye batii bule kamadie mankye Yerusalem,

mba niawɛ ni nkpa dikudi kamadie mankye Sion kobokote.

SAATE wɔ Ninlenke ni okyiini

nimabla nle mmle.

33 "Nkpo oso nnya ɔlaa wɔ di SAATE nwu kobuɛ ni di Asiria ɔka suoto alɛ:

"Alɔbabuo okpoo kplɛ wɔ mmle

ee ataa kɔtaa kukunwii ninfũ.

Alɔbawa nwu ɔlɔɔkɔ ku kubidifunsaa

ee amana nwu akyi.

34 Osuku wɔ suoto eefe ɛɛwa nii, nnwu nwu suoto abakple ansifi nɛ;

ɔlɔbabuo okpoo kplɛ nwu,"

SAATE nwu niebuɛ.

35 "Kamayila okpoo kplɛ wɔ mmle kamaa ndiki nwu,

ta leyooto nii ku kpɛmblatɛ nii Dawid leyooto oso!"

36 Ninfɛ di Saate nwu tɔkyɛntɛ lakyɛ aalaalo batii nkpe kɔlafa afosi-anɛ-banɔɔ di Asiria batii kasikɔ nɛ. Obe wɔ di mba niabu ni lataka ni ku olesɛ- mba ninte ni bamuu ntookple bakpi! 37 Nioso Asiria ɔka Senakerib layɔ asaa aakple nkpaamaa. Aakple aasifi okpoo nɔɔ Ninewe, aalaasiɛ ninfa.

38 Dii ninwii, obe wɔ aatɔɔtɔ ni afiɔ nɔɔ Nisrok olekatakɔ yi, ni di babisuɔtɔbi nɔɔ Adramelek ku Sareser, labalo nwɔ baatɛ ku kapamii, ni baatoso baasifi Ararat kasɔ suoto nɛ. Ni di obisuɔtɔbi nɔɔ Esarhadon layila nwɔ kaanya fɛ ɔka nɛ.