1 Nle mmle ninle odiki otuo wɔ di Amos obisuɔtɔbi, Yesaya lanya ni di Yuda ku Yerusalem suoto, di Yuda baka Usia,Yotam, Ahas ku Hesekia, sɛka olebee kamɛ nɛ.

2 Oo, osi, binu! Oo, kasɔ bikyɔɔ atoko!

Diekye SAATE nwu lakakatɛ alɛ:

"Ntoonyu babi disi beemuɔ,

kafɔɔ batɔtaka beeyila mi di suoto.

3 Nankyue-suɔtɔ n-ye saate nɔɔ,

bɔkɛɛ wɔ nintuka ni atoo n-ye nfũ di saate nɔɔ nkpee nwɔ ni alesaa,

kafɔɔ Israel dieye mi,

batii nii diloonu sɛlaa nsɔ."

4 Oo, bakpiletɛ kale,

batii ba niɛlɛ sikpile batuka ni,

sikpilebablatɛ babi,

babi ba beediɛ bɛɛta ni kalalaa!

Batoosĩ SAATE nwu;

batoosĩ Israel Klekletɛ nwu

beemunikĩisa kafɔɔ mmaa lɛma bɛɛtɔɔ.

5 Be oso baakple mantɔɔpɛ ye?

Be oso biekple biɛtaka biyɛ mi di suoto?

Disi lɛfɔ nimuu ntoofũ nkɔ

otu lɛfɔ omuu konu dibuo.

6 Dieyɔ ni di kakpaasɔ lɛfɔ diɛlaase ni di nsintɛɛ lɛfɔ

kakɔkakɔ diesinlɛ-

nkɔ ku abibidi lete nintika,

ku nkɔ fɔle,

manankaasa ee banii mi nii,

ee batika mi ni kɔfa.

7 Kale lee nte kafukuti

sekpoo kplɛ lee lefiɛ ku ɔtɔ;

bafɔɔ lefũ ye afe di nnɛɛ

di anu lee,

ate afukuti fɛ nse bafɔɔ lɛkpɛ bɛɛlalaasa nya nii.

8 Sion obisankobi ntɔɔka

fɛle lɛkpaayo di awosobi ya mambla ni nta kofe kamɛ,

fɛle lɛkpaayo di melon* kofe,

fɛle okpoo kplɛ wɔ di balo lɛmana nwu beekyi nii.

9 Nse SAATE wɔ Ninlenke ni

antandiɛ basɛɛ loo bawo buabu,

nsee butabate fɛle Sodom,

nsee butabate fɛle Gomora.

10 Binu SAATE nwu ɔlaa,

aye Sodom batunletɛ;

bikyɔɔ atoko bienu Yaa loo asaa otuo,

aye Gomora batii!

11 SAATE nwu alɛ, "Oleɔta lee nwu kpinkidi-

be diɔbla nintɛɛ?"

"Ofiɛ asaaɔta ntootuudi mi,

ku akunumuu ku babɔkɛɛ ba ninsi ala suoto;

banankyue-suɔtɔ, bafoso ku batie ntɔ

diloosintɛɛ suoto lɛyɔɔ.

12 Nse biɔwa mi anu,

owe niɛkaalɛ ye nle mmle,

ɔnanafu ofe wɔ mmle di nflɔnkɔ nii?

13 Bidiɛ asaaɔta ya ninnaa ni kɔya ɔwako!

Olufii lee ofiɛ kɔkpɛ mi oyududu.

Di Awɛntɛ fɔle, Anyɛɛtɛyi ku osi wɔ mintoosi ni yi-

namafuo nsiisakɔ kpile lee nwu oklee.

14 Kɔwɛntɛ Fɔle lee ayi ole ku ayi ya biɛtɛ biole nii

ɔkla nii lekyidi nya.

Atookple atoo ɛɛtɛɛ;

nfɛ alenke mi ku otuka.

15 Nse biekplesa nnɛɛ lee katoo di ɔlaa ɔpɛ ɔta kamɛ,

kamawofasa anu nii di suoto;

bia akpakpa biɛpɛ ɔlaa fɛ be,

namanu.

Nnɛɛ lee leyii ku ntɔ pɔ;

16 bikpe ntu, biɛbla suoto lee klekle.

Bikyisa sɛsaabla kpile lee nwu

di anu nii!

Biediɛ asaa lɛlaale ɔbla,

17 bitekete lɛsaa nwaa ɔbla!

Bitikanko ɔsaabla tinini,

biekpee mba boofee ni simu osie.

Bikpɛ bita bakuɛbi,

bietikiti lekoto di bakpisɔfɔ disi.

18 SAATE nwu alɛ,

"Biwa nfɛ, buobuɛ buta baawo."

"Kuntɛ sikpile lee nte fɛle dibula sɛɛle,

sibapu fɛle atubakanii;

Kuntɛ siɛsɛɛ fɛle lɛsaa bɔmbɔ,

sibapu fɛle foso sinwini.

19 Nse bietuna bienu mi ɔlaa,

bibale asaa biene di kasɔ nwu suoto;

20 kafɔɔ nse biesĩ, bietaka bieyila mi di suoto

ni kapamii kamabɛbɛɛ ye."

Diekye SAATE nwu kanya niebuɛ.

21 Binyu mmle di onukwale okpoo kplɛ nwu

ntookple ni sɔnɔkpeetɛ!

Obe nwu lɛkanko tinini layii nwu kamɛ;

ɔsaabla tinini lasiɛ nwu kaamɛ-

kafɔɔ nunua batii balotɛ ninsi nwu kaamɛ!

22 Koto fututu lɛfɔ ntookple lɛsaakuu,

batɔɔlɔ nta biene lɛfɔ nwu ku ntu.

23 Batunletɛ lɛfɔ nle batokopĩtɛ,

ku bayu basiɛwo;

bamuu lɛma mambɔmbɔ ditunu kamɛ asaa ofũ

mantikanko kafɔɔ akyɛsaa ofũ.

Mannkpɛ baata bakuɛbi;

baaklesĩ di bakpisɔfɔ kafɔɔ ɔlaa suoto.

24 Nioso SAATE nwu, SAATE wɔ Ninkleke ni,

Israel Lenkeetɛ Nwu, kobuɛ alɛ:

"Aa, kamawɛ kayaa di balo nii nnɛɛ,

ninanfi bakyiditɛ nii kafɔɔ kootoko.

25 Kamamu lɛklɔklɛ nii nkyɔɔ fɔ;

kamanyu nlɛ lɛnyanakĩisa asaakuu lɛfɔ nwu lediki,

lediki lɛkpɔnɔnfɔ lɛfɔ kafɔɔ nimuu.

26 Kamakple nse batunlatɛ nta ye fɛ saa,

batii ba ninkà ye ni fɛ mmle diate ni di kasɔkakyekɔ.

Nni kamaa babalɛɛ fɔ alɛ

Ɔsaabla tinini Okpoo kplɛ,

Onukwale Okpoo kplɛ."

27 Babadiki Sion ku lɛkanko tinini,

babadiki mba niekyisa ni situ lɛma ku ɔsaabla tinini.

28 Kafɔɔ mba niɛtaka bayɛ mi ni di suoto ku bakpileblatɛ kamakpi,

mba kafɔɔ niesĩ ni SAATE nwu kamawɔɔ.

29 "Sinunsɔ makpɛ ye ta awoso kplɛ klekle

ya suoto min-nya ni suoto lɛyɔɔ oso;

babakpee ye sinunsɔ ta nfiofa aba

ya biediki biɛta ni suoto oso.

30 Bibate fɛle kowoso kplɛ ko di afata nɔɔ lɛyɔɔ nii,

minte fɛle kɔba ko di ntu nnaa nii.

31 Sientɛ kamakple aku kosole

ɔkpɛ nɔɔ kafɔɔ kamate fɛ lɛtɔmbula;

anyɔ nwu kamafiɛ,

di kuonwii dilɔbaniisa ni ɔtɔ nwu."