1 Kakyɛ nwu, ɔka ditafuo ɔkyɔsĩi; nioso aata baayɔ sekofolaa kukũ, sɛka ole nɔɔ sɛlaa bɛɛkpana bɛɛtɛ nii baawako, ni aata baaka baatɔɔ nɛ. 2 Baanya alɛ baakpana ninfa alɛ Mordekai ladiki Bigtana ku Teres kalɔ, ɔka banɔɔfotii ba banyɔ ba niatoonyu ni kayoko, baakũ ni kanwumbe alɛ boolo ni Ɔka Akasweros.

3 Ni di ɔka lakaalɛ alɛ, "Lɛmɛmbu ku nsũ lɛtɛsaa di Mordekai ntoofũ di nle mmle suoto?"

Ni di bakpɛmblatɛ nɔɔ ladiki kanya alɛ, "Badibla lɛsalɛsaa batɔɔ."

4 Ni di ɔka lakaalɛ alɛ, "Owe ninkpe di kaflɔnkɔ nwu?" Obe nwu di Haman labuo obuo di lɛkayo nwu kaflɔnkɔ alɛ ɔɔkakatɛko ɔka di Mordekai ɔsaka di lɛkpaka le eetofo ɛɛtɔɔ ni suoto nɛ.

5 Ni di bakpɛmblatɛ nɔɔ ladiki kanya alɛ, "Haman nin-yɛ di kaflɔnkɔ nwu."

Ni di ɔka labuɛ alɛ, "Bikpaa nwɔ biwako."

6 Di Haman labuo nii, ɔka lakaalɛ nwɔ alɛ, "Obe baabla bata otii wɔ dilɛ diɛta ni ɔka alɛ aata ni dibu?"

Ninfɛ di Haman labu nwu di suoto nɔɔ kamɛ alɛ, "Ni owe ninkpe di ɔka kamata dibu ninanle ami?" 7 Nioso aatɔkɔ ɔka alɛ, "Di otii wɔ dilɛ diɛta ni ɔka alɛ ɔɔta ni dibu yi, 8 ta ma bawako akasaa ya di ɔka ntoodiklee ni ku pɔnkɔ wɔ suoto di ɔka ntodisiɛ ni, nnwɔ di ɔka nsũ lɛtɛsaa ntika ni di disi nɔɔ suoto. 9 Ni faata bayɔ akpeele ku pɔnkɔ nwu bakpee di ɔka ɔnɔɔfotii finle wɔ niɛtaka katoo alenke ni nnɛɛ. Faata ma baklɛɛ otii wɔ dilɛ diɛta ni ɔka alɛ aata ni dibu, baakpaa nwɔ di pɔnkɔ nwu suoto bakyiko okpoo kplɛ nwu akpaka, baatoobuɛ di anu nɔɔ alɛ, ‘Nnya lɛsaa le bɛɛbla bɛɛta ni otii wɔ dilɛ diɛta ni ɔka alɛ ɔɔta ni dibu!’ "

10 Ni di ɔka ladiki Haman kanya alɛ, "Kyɛ wla faalaayɔ akpeele ku pɔnkɔ nwu, faabla fɛ mmle feebuɛ ni fata Mordekai, Yuda otii nwu, nnwɔ ninsiɛ ni di ɔka kayoko. Tansĩ lɛsalɛsaa, di n-ya feebuɛ ni kamɛ ɔbla."

11 Nioso Haman layɔ akpeele ku pɔnkɔ nwu. Ni aaklɛɛ Mordekai, aatika nwɔ di pɔnkɔ kamaa aakyiko okpoo kplɛ nwu akpaka, aatoobuɛ di anu nɔɔ alɛ, "Nnya lɛsaa le bɛɛbla bɛɛta ni otii wɔ dilɛ diɛta ni ɔka alɛ ɔɔta ni dibu!"

12 Nni sɛmaa, Mordekai lakple aasifi ɔka kayoko. Kafɔɔ Haman latoso aasifi leyo, aakpee disi kaasɔ ku sɛnyaami, 13 ni aalaatɔkɔ basiɛwo nɔɔ bamuu ku ɔsɔfɔ nɔɔ Seres lɛsaa biala le niawa nwɔ ni di suoto nɛ.

Ni di mba niaka nwɔ ni ku ɔsɔfɔ nɔɔ Seres latɔkɔ nwɔ alɛ, "Di obe wɔ di Mordekai wɔ anu di kasɔ lɛfɔ ɔpɛ ntookye ni kasɔ nle ni Yuda kale otii yi, flɔbafuo ɔtaka oyila nwɔ di suoto- nwaako fɔɔwa ɔbawɔɔ!" 14 Obe wɔ beekple bɔɔkakatɛ ni ku nnwɔɔ, ni di ɔka basuɔtɔ ba beediki ni ataa lawa baabakpaa Haman wla baasifiko Ester opunu wɔ aatũ ni nɛ.