1 Di sɛsaabla se mmle sɛmaa, Ɔka Akasweros lakpee Hamedata, Agagi otii nwu obisuɔtɔbi Haman dibu. Aatakatɛsa nwɔ katoo, aatɔɔ dibu kasiɛkɔ ka niataka katoo kaalenkee ni batii finle bule bamuu. 2 Ɔka banɔɔfotii bamuu di ɔka kayoko lapɛ akunkyi baata Haman dibu, diekye ɔka niadiki kanya di nle mmle di Haman suoto. Kafɔɔ Mordekai ditapɛ akunkyi ee atɔɔ dibu.

3 Ninfɛ di ɔka banɔɔfotii nwu di ɔka kayoko kanya lakaalɛ Mordekai alɛ, "Be oso feesĩ ɔka kanya didiki nwu? " 4 Dii biala mankakatɛ mantɔɔ, kafɔɔ ansĩ onu. Nkpo oso baatɔkɔ Haman ɔlaa nwu, alɛ boonyu nse abafũ Mordekai nkpa nwu ankpee, diekye aatɔkɔ ma alɛ Yuda otii aale.

5 Obe wɔ di Haman lanya alɛ Mordekai dilɔɔpɛ akyunkyi ee atɔɔ ni dibu, ni aanya ɔblɔ osie kanya nɛ. 6 Kafɔɔ di Haman latofo ni batii ba di Mordekai batii lale nii, ni aanyu alɛ Mordekai lete olo dilɔbabla lesalɛsaa. Kafɔɔ Haman lamiɛ osuku wɔ abafe anwɔɔsa ni Mordekai batii bamuu, Yuda batii nwu di Ɔka Akasweros sɛka kalekɔ kamuu kamɛ.

7 Di Ɔka Akasweros lefosi lɛlɛɛ nyɔɔfa, di kɔwɛntɛ kasale kamɛ, kule ni Nisan, di Yuda batii awɛntɛ kanya yi, baawii pur (nni ninle atrebi owii) di Haman anu alɛ boodiki dii ku kɔwɛntɛ nɛ. Ni di atrebi owii nwu lase di lefosi kɔwɛntɛ nyɔɔfa, bɔɔlɛɛ ni Adar, di Yuda batii kɔwɛntɛ kanya nɛ.

8 Ninfɛ di Haman latɔkɔ Ɔka Akasweros alɛ, "Batii bawo nkpe bɛɛsamii bakpete ni di sɛka kalekɔ lɛfɔ kasɔ kamuu suoto, di sɛsaabla lɛma lekyi ni lete di batii bule bamuu sele suoto, nioso boloole ɔka afiofa; diele kafɔɔ lɛsaa biene diɛta ni ɔka alɛ aafũ ma ankpee nii. 9 Nse dilɛ dita ɔka, ni aata bakpee kufiofa baawɔɔsa ma. Ni ami kamayɔ koto fututu bakilo nkpe alafa-atiɛ-afosi-anɔɔ di ɔka koto katɛkɔ nta otii wɔ nimabla ni ɔkpɛ wɔ mmle."

10 Nioso ɔka ladiki lɛkɔnii le di leyooto nɔɔ ntika ni di lɛnɛɛbi nɔɔ, ni aayɔ ni aata Hamedata, Agagi otii nwu obisuɔtɔbi, Haman, niale ni Yuda batii lo nɛ. 11 Ni di ɔka latɔkɔ Haman alɛ, "Yɔ koto nwu fatɛ, faabla batii nwu fɛ mmle dikaatɛ fɔ ni."

12 Ninfɛ di lefosi dii tiɛfa di kɔwɛntɛ kasale suoto, ni baalɛɛ ɔka akũ bakpanatɛ nɛ. Baakpana sĩ di kasɔ biala kɔkpana ku batii biala sele kamɛ ku Haman afiofa amuu aata ɔka kanyabayilatɛ, nsɔ nwu ateate batunletɛ ku batii nwu ateate batii finle. Baakpana n-ya mmle di Ɔka Akasweros omu leyooto kanya, baatĩi kanya ku lɛkɔnii nɔɔ nimu. 13 Baakpee atɔbakyɛntɛ baayɔ akũ nwu baakyɛnko ɔka kasɔ nwu kamuu ku kufiofa alɛ babalo, manwɔɔsa, mandiki kafɔɔ Yuda batii bamuu- bakosopo ku banɔɔfo, basanko ku babisɔ biibii- di dii ninwii kamɛ, di lefosi dii tiɛfa suoto di lefosi kɔwɛntɛ nyɔɔfa, bɔɔlɛɛ ni Adar, manlɛ asaa lɛma mansifiko. 14 Baadiki kukũ nwu kamɛ sɛlaa baabla fɛ kufiofa di kasɔ biala baata kale biala batii latofo di mmle babalolaa suoto manta ni dii nwu.

15 Nfanwu, di ɔka nwu kanya didiki yi, kɔtɔbakyɛntɛ nwu ladie baasifi, ni baakpee kufiofa nwu di Susa katanikokɔ nwu nɛ. Ni di ɔka ku Haman lasiɛ alɛ boonyi nta, kafɔɔ Susa okpoo kplɛ labuo kudú.