1 Sɛmaa, obe wɔ di ɔblɔ layɔɔ ni Ɔka Akasweros, ni aanyuma Wasti ku lɛsaa le aabla ni ku kufiofa ko di nnwɔɔ ɔka aakpee ni di ɔsanko nwu suoto nɛ. 2 Ninfɛ di ɔka omu bakpɛmblatɛ layɔ baatɛ alɛ, "Bita bakpekpee anu baamiɛ kakpeelebitɛ ka ninlɛ ni sekpeele bata ɔka. 3 Biɛta ɔka adiki kanyabayilatɛ di kasɔ biala suoto di sɛka kalekɔ nɔɔ kamɛ, baakpaa basankobi ba mmle ninlɛ ni sekpeele bamuu bawako baka basɔfɔ dikudi nwu kamɛ di Susa katanikokɔ. Biɛta ma basiɛ di Hegai kalɔ, ɔka osuɔtɔ wɔ ataa baadiki ni, ayɛ ni di basanko dikudi nwu kanya; biɛta babla sekpeele sɛlɛ sɛsaabla bata ma. 4 Ni biɛta ɔsankobi wɔ niebuo ni ɔka anu ale ɔkasanko di Wasti kanya." Ɔlaa wɔ mmle labuo di ɔka kotoko, ni aafũ nwu aakpee nɛ.

5 Obe nwu kamɛ Yuda otii onwii niakye ni Benyamin kɔna kamɛ lawɛ di Susa katanikokɔ nwu, leyooto nɔɔ niale Mordekai, Yair obisuɔtɔbi aale, ɔwa nɔɔ suɔtɔ niale Simei, ɔwatɛtɛ nɔɔ suɔtɔ kafɔɔ niale Kis nɛ, 6 nnwɔ di Babel ɔka Nebukadnesa lakpaa ni di Yerusalem aasifiko ni sɛlanle kamɛ, manko mba baamufũ baasifiko ni ku Yuda ɔka Yehoiakin. 7 Mordekai lawɛ ote bisɔnle obisankobi onwii baatɔɔlɛɛ ni Hadasa, nnwɔ aanyu ni disi aamuɔ nii, diekye ɔsankobi nwu ditasinwɛ kote ee kɔya. Ɔsankobi nwu, baakple baatɔɔlɛɛ ni Ester lalɛ sekpeele, aawɛ suoto kafɔɔ. Ni di Mordekai layɔ nwɔ fɛ obisankobi nɔɔ omu, di obe wɔ di ote ku ɔya lakpi ni nɛ.

8 Obe wɔ baayie ni ɔka kanya ku kukũ lɛkya yi, baakpaa basankobi kpinwu baawako Susa katanikokɔ, baabayɔ ma baakpee di Hegai kalɔ. Baakpaa Ester kafɔɔ baakyɛnko lɛkayo, ni baayɔ nwɔ baakpee di Hegai nnɛɛ nɛ, nnwɔ niayila ni di baka basɔfɔ dikudi nwu kanya. 9 Ɔsankobi nwu labuo Hegai anu, ni aale nwɔ sibualɛ nɛ. Nfanwu ni aata ɔsankobi nwu sɛlɛ nɔɔ sɛsaabla ku alesaa finle nɛ. Ninfɛ di Hegai lata Ester basanko bakɔkɔɔtɛ bakuɛnsĩ aadiki aakyeko ni lɛkayo, ni aadiki Ester ku bakɔkɔɔtɛ nɔɔ nwu aasifiko kabienekɔ di basanko dikudi nwu kamɛ nɛ.

10 Ester ditadiki kale ka otii ku leyo nɔɔ batii kalɔ aata, diekye Mordekai latĩi nwɔ osuku alɛ atambuɛ. 11 Dii biala Mordekai lakyɛ aatoofe katoo ku kala di basanko dikudi leyo nwu kaflɔnkɔ ɔlɔɔkɔ, alɛ oonyu mmle di Ester nte ni ku nle nikɔbla nwɔ nii.

12 Fiɛ dibadu ni ɔsankobi biala alɛ aakyɛ ni Ɔka Akasweros nfũ yi, dikpeni anloo lefosi awɛntɛ anyɔ sekpeele sɛsaabla se baatɛ baata ni basanko nwu ɔbla. Awɛntɛ akuɔ di olufui nnɔnyi ofifia suoto, awɛntɛ akuɔ kafɔɔ di nnɔnyi kɔnɔkɔnɔ ku nnɔnyi fifiale ofifia di suoto. 13 Nnya mmle kafɔɔ di ɔsankobi nwu kamakyɛ ni ɔka nfũ: Lɛsaa lele di ɔsankobi nwu komiɛ yi, mantɔɔ di basanko dikudi nwu kamɛ, anklee ankyɛnko lɛkayo. 14 Kɔtɔɔfɔ yi, ɔsankobi nwu nkyɛ nfa, olesɛ kafɔɔ ankple ansifi lɛba bamba di basanko dikudi nwu kamɛ di Saasgas kalɔ, nnwɔ niale ni ɔka osuɔtɔ wɔ ataa baadiki ni, aayila ni di ɔka basɔnɔ kanya. Ɔsankobi nwu dilɔbasinkple akyɛ ɔka nfũ, diediki eebuo nwɔ anu ni aabata manlɛɛ ɔsankobi nwu ku leyooto nɔɔ mantɔɔ nɛ.

15 Di obe lawo di Ester, (ɔsankobi wɔ di Mordekai laklee ni, aale ni ote bisɔnle Abihail obisankobi) alɛ aakyɛ ni ɔka nfũ yi, atakaalɛ lɛsalɛsaa dilenkee lɛsaa le di Hegai, nnwɔ niale ni ɔka osuɔtɔ wɔ ataa baadiki ni, aayila ni di basanko dikudi nwu kanya labuɛ nii. Ni di Ester labuo otii biala nianyɔɔ ni anu nɛ. 16 Ni baakpaa Ester baakyɛnko Ɔka Akasweros di lɛkayo di kɔwɛntɛ fosile kamɛ, kɔwɛntɛ ko manlɛɛ ni Tebet, di Yuda batii awɛntɛ kanya, di sɛka ole nɔɔ lɛlɛɛ kuɛsinle kamɛ nɛ.

17 Ester lalɛ ɔka onyu aalenkee basanko bule, ni aabuo ɔka anu, aafũ nwɔ aakpee, aalenkee kokpeelebitɛ bule nɛ. Nioso aatũkũsa Ester lɛkakoto diisi, aabla nwɔ ɔkasanko di Wasti kanya. 18 Ninfɛ di ɔka latũ opunu kplɛ, Ester opunu, aata batii finle nɔɔ ku banɔɔfotii bamuu nɛ. Ni di ɔka lata ɔnyɛɛ ɔtɛ di kasɔ nwu kamuu, ni aasɛ akyɛsaa di sɛka kanya nɛ.

19 Obe wɔ baasiisa ni kokpeelebitɛ nwu lɛnyɔɔfa yi, Mordekai lasiɛ di ɔka kayoko. 20 Kafɔɔ Ester layɔ leyo nɔɔ kamɛ ku kale nɔɔ sɛlaa aakookaa fɛ mmle di Mordekai latɔkɔ nwɔ alɛ abla nii. Diekye Ester lakple aatikanko Mordekai afiofa fɛ mmle aabla ni di obe wɔ aasiɛ nwɔ ni di ɔkyɛ.

21 Di obe wɔ kamɛ di Mordekai lasiɛ ni di ɔka kayoko yi, Bigtan ku Teres, niale ni ɔka banɔɔfotii banyɔ ba ninyu ni kayoko osuku lanya ɔblɔ, ni baakũ kanwumbe alɛ babalo Ɔka Akasweros nɛ. 22 Kafɔɔ Mordekai lawolaa kanwumbe nwu kamɛ, ni aatɔkɔ Ɔkasanko Ester nɛ. Nni kamaa, Ester kafɔɔ latɔkɔ ɔka, ni baayɔ dibu baata Mordekai nɛ. 23 Di obe wɔ baawolaa ni kamɛ, baanya alɛ kute ni nkpo yi, ni baasaka banɔɔfotii nwu banyɔ di kowoso suoto baakpi nɛ. Baakpana sɛlaa se mmle simuu di sekofolaa kukũ kamɛ di ɔka anu.