1 Nioso ɔka ku Haman lakyɛ baalaale alesaa ku Ɔkasanko Ester. 2 Di obe wɔ baatoonyi ni nta di dii nyɔɔfa nwu suoto yi, ɔka lakple aakaalɛ alɛ, "Ɔkasanko Ester, obe ninle lɛsaa le fɔɔkaalɛ ni? Babayɔ manta fɔ. Obe ninle fɔ dibiesaa? Bia diɛlaadu ni sɛka kalekɔ nii kakyɛ yi, babayɔ manta fɔ."

3 Ninfɛ di Ɔkasanko Ester ladiki kanya alɛ, "Oo ɔka, nse fabale mi sibualɛ, nse kafɔɔ dilɛ diɛta afɔ ɔka yi, ni tɛɛ nsiɛ nkpa- nle mmle ninle lɛsaa le kɔkaalɛ ni nɛ. Faata kafɔɔ batii nii basiɛ nkpa- nle mmle ninle dibiesaa nii nɛ. 4 Diekye batoosunsũ ami ku batii nii bɛɛta kawɔɔ ku olo ku otososa odiki di kasɔ nwu suoto. Nse fɛ osunsũ lete mansunsũ wo fɛ osuɔtɔ ku ɔsanko balanle yi, nse ntabalokanana, diekye diele nimiina le mmle okle dikaatɛ baakpee ni ɔka kubuɛ."

5 Ni di Ɔka Akasweros lakaalɛ Ɔkasanko Ester alɛ, "Owe dile? Ɔfɛ di otii wɔ dikle ni ɔkɔnsɔ alɛ ɔɔbla ni lɛsaa le mmle okle nkpe?"

6 Ni di Ester labuɛ alɛ, "Kyiditɛ ku lo nwu ninle Haman kpiletɛ wɔ mmle nɛ."

Ninfɛ di difu lapɛ Haman di ɔka ku ɔkasanko nwu anu nɛ. 7 Ni di ɔka lataka ku ɔblɔ, aadiɛ nta nɔɔ, aasifi lɛkayo nwu kɔba kamɛ. Kafɔɔ di Haman latofo alɛ ɔka ntoodiki ni kɔkpaa nɔɔ kofokofoko yi, aakple aasiɛ sɛɛmaa aatootikiti Ɔkasanko lekoto di nkpa nɔɔ disi.

8 Nfanwu di ɔka lakye lɛkayo kɔba akple aawa ni opunu otũ lɛkpata nwu, aanya alɛ Haman latɔɔwakasɔ di nfũ di Ester lasiɛ nii.

Ni di ɔka lafaa aabuɛ alɛ, "Ɔɔbatenko bia ɔkasanko, di obe wɔ akpe ni di ɔkyɛ nii, di leyo kamɛ?"

Nfanwu di ɔlaa ladie odie di ɔka kanya, ni baatĩi Haman anu nɛ. 9 Ninfɛ di Harbona, ɔka osuɔtɔ onwii wɔ baadiki ni ataa nintoonyu ni ɔka labuɛ alɛ, "Lɛkpaka le niɛtaka ni nkpaa afosi-akuɛnsĩ-nnɔɔ n-yɛ di Haman leyo. Nle aabla aata ni Mordekai wɔ niakakatɛ aafũ ni ɔka nkpa."

Ni di ɔka labuɛ alɛ, "Bisaka Haman di lɛkpaka nwu suoto!" 10 Nioso baasaka Haman baalo di lɛkpaka le aabla aata ni Mordekai. Ninfɛ di ɔka ɔblɔ layɔɔ nɛ.