1 Di dii nwu nkpo kale, Ɔka Akasweros layɔ Haman, Yuda batii lo, leyo aata Ɔkasanko Ester. Ni di Mordekai lawa ɔka anu nɛ, diekye Ester latɔkɔ nwɔ mmle di kɔna nɔɔ nte ni ku Mordekai. 2 Ni di ɔka ladiki lɛnɛɛbi nɔɔ lɛkɔnii le aaklee aafũ ni di Haman nfũ, ni aayɔ ni aata Mordekai nɛ. Ninfɛ di Ester layɔ Mordekai aase di Haman lɛsaawɛ kanya nɛ.

3 Ni di Ester lakple aatikiti ɔka lekoto, aatɔɔpɛ akunkyi di nkpaatũ nɔɔ, aatoowi kaku nɛ. Aatikiti ɔka lekoto alɛ ata Haman, Agagi otii nwu kɔkpaa didiki kpile nwu kuloo, di nle aatɛ alɛ ababla ni di Yuda batii suoto. 4 Ninfɛ di ɔka layɔ koto sɛɛle lɛkɔ nwu aakyɔɔ Ester, ni aataka aabayila di ɔka anu nɛ.

5 Ni di Ester labuɛ alɛ, "Nse dilɛ diɛta ɔka, eebu mi, eele mi sibualɛ kafɔɔ, eenyu alɛ dile lɛsaa biene aabla nii, ni nse lebuo nwɔ anu yi, ni faata kanya didiki, baakpana baakyisa akũ ya di Hamedata obisuɔtɔbi, Haman, Agagi otii nwu kɔkpaa didiki kpile le aakpana alɛ bawɔɔsa ni Yuda batii di ɔka nsɔ nwu mmuu batɛ di ɔlɔɔkɔ. 6 Diekye lɛ nfɛ kafuo otu okpee nnyu ɔlaa kpile ntũ batii nii? Lɛ nfɛ kakpee otu nnya leyo nii batii kawɔɔ?"

7 Ni di Ɔka Akasweros ladiki kanya di Ɔkasanko Ester ku Mordekai, Yuda otii nwu ɔlaa suoto alɛ, "Ta nle di Haman ladieko ni Yuda batii oso ntɔɔyɔ lɛsaawɛ nɔɔ lɛta Ester, ni batɔɔsaka Haman beelo nɛ. 8 Kanunua kpana kufiofa bamba, di ɔka leyooto kamɛ, di Yuda batii kanya, fɛ mmle feenyu falɛ dikaatɛko fɔ ni, faatĩi kukũ nwu kanya ku ɔka lɛnɛɛbi lɛkɔnii- diekye kukũ ku kuonwii nnaa bɛɛkpana ni di ɔka leyooto kamɛ, beetĩi ni kanya ku lɛkɔnii nɔɔ kakple kumbla ni ɔkpɛ."

9 Nfanwu ni baalɛɛ ɔka akũ bakpanatɛ- di ayi afosi-anyɔ-dii tiɛfa suoto di kɔwɛntɛ tiɛfa manlɛɛ ni Siwan di Yuda batii awɛntɛ kanya nɛ. Baakpana Mordekai afiofa amuu baata Yuda batii ku ɔka banɔɔfotii, abaa kanyabayilatɛ ku nsɔ nwu kɔlafa-afosi-anyɔ-nkuɛnsĩ batii finle, diayɔ ni di India dialaadu ni Kus kasɔ. Baakpana afiofa ya mmle di kasɔ biala kɔkpana ku batii biala sele kamɛ, ku Yuda batii kafɔɔ di mma bamu kɔkpana ku sele kamɛ. 10 Mordekai lakpana nya di Ɔka Akasweros leyooto kamɛ, aatĩi akũ nwu kanya ku ɔka lɛnɛɛbi lɛkɔnii, ni aayɔ nya aata atɔbakyɛntɛ ba ninsiɛ ni bapɔnkɔ ba ninkpe ni sɛwa, kyenkye mba baase baata ni ɔka.

11 Ɔka kukũ nwu lata Yuda batii di okpoo kplɛ biala osuku alɛ basi, baatĩtĩi suoto lɛma; baalo, baawɔɔsa, baatososa kafɔɔ kale lele bakpɛtɛ ee kasɔ ka batii nimamiɛ alɛ boodieko ma ni ku basanko lɛma ku babi lɛma; alɛ baayɔ balo lɛma kakpɛ kamɛ lɛsaawɛ. 12 Dii le baatɛ ni Yuda batii alɛ baabla ni nle mmle di Ɔka Akasweros kasɔ kamuu niale lefosi dii tiɛfa di lefosi kɔwɛntɛ nyɔɔfa, bɔɔlɛɛ ni Adar, di Yuda batii awɛntɛ kamɛ nɛ. 13 Baadiki kukũ nwu kamɛ sɛlaa baabla fɛ kufiofa di kasɔ biala baata kale biala batii latofo, di mmle di Yuda batii kamalolaa suoto manta ni dii nwu, di ɔbla okyisa ɔta ni suoto lɛma di balo lɛma suoto.

14 Nioso di ɔka kanya didiki yi, atɔbakyɛntɛ nwu lasiɛ ɔka bapɔnkɔ baatoso baakyɛ kɔtɔ nwu. Baasɛ kafɔɔ akũ nwu di Susa katanikokɔ nwu kamɛ.

15 Ninfɛ di Mordekai lakyɛ di ɔka anu nɛ, aakpee ɔka akpeele ya niate ni bluu ku fututu, aatũkũ koto sɛɛle lɛkakoto ku dibula biene fɛnɛnɛɛ akpeele ya niɛbla ni fɛ ɔsɛɛ. Ni di Susa okpoo kplɛ nwu batii lale suoto lɛyɔɔ dii nɛ. 16 Di obe nwu kamɛ diabla suoto lɛyɔɔ, lɛpɔ́, lɛmɛnɛfɛsaa ku dibu diata Yuda batii. 17 Di kasɔ biala suoto ku okpoo kplɛ biala kamɛ, kakɔ lele di ɔka kukũ nwu lakyɛ, suoto lɛyɔɔ ku lɛpɔ́ lawɛ di Yuda batii kamɛ ku ole ku onyi sɛsaabla. Nioso nnle bamba batii kpinwu labakple Yuda batii, diekye baatɔɔyɛkɛ Yuda batii nwu.