ESTER 5

Ester Lalɛɛ Ɔka Ku Haman Aawako Opunu Wɔ Aatũ Nii

1 Di dii tiɛfa suoto, Ester lakpee akasaa nɔɔ, aayila di lɛkayo kaflɔnkɔ ka kaamɛ kamɛ di ɔka lɛkpata anu. Ɔka lasiɛ di lɛkakpomii nɔɔ suoto di lɛkpata nwu, aakyɔɔ anu kayoko. 2 Obe wɔ di ɔka lanya ni Ɔkasanko Ester layila ni di kaflɔnkɔ nwu yi, aabuo nwɔ anu, ni di ɔka layɔ koto sɛɛle lɛkɔ nwu di kɔnɛɛ nɔɔ aakyɔɔ Ester nɛ. Nioso Ester lakyɛ aalaakpanko lɛkɔ nwu ɔnya.

3 Ninfɛ di ɔka lakaalɛ alɛ, "Ɔkasanko Ester, obe dile? Obe ninle fɔ dibiesaa? Bia diedu ni sɛka kalekɔ kakyɛ yi, babayɔ manta fɔ."

4 Ni di Ester ladiki kanya alɛ, "Nse dilɛ diɛta ɔka, ni ta ɔka ku Haman bawa opunu wɔ letũ ni miɛ lɛta fɔ ni."

5 Ni di ɔka labuɛ alɛ, "Lɛɛ Haman fawako wla, di mmle buabla ni lesaa le di Ester lɛkaalɛ ni."

Nioso ɔka ku Haman lakyɛ opunu wɔ di Ester latũ nii. 6 Di obe wɔ baatoonyi ni nta, ɔka lakple aakaalɛ Ester alɛ, "Kanunua obe fɔɔkaalɛ? Babayɔ manta fɔ. Obe lɛsaa ninle fɔ dibiesaa? Bia diɛlaadu ni sɛka kalekɔ nii kakyɛ yi, babatuna manta fɔ."

7 Ni di Ester ladiki kanya alɛ, "Dibiesaa nii ku nle kɔkaalɛ ni ninle nle mmle nɛ: 8 Nse ɔka nle mi sibualɛ ku dibu, dilɛ kafɔɔ diɛta ɔka alɛ aatuna di dibiesaa nii, aambla kafɔɔ di nle kɔkaalɛ nii yi, ni ta ɔka ku Haman bawa opunu wɔ kamatũ nta ma ni kɔsɛɛ. Ni kamadiki kanya di ɔka sɛlaa kaalɛle suoto."

Haman Lakũ Kanwumbe Alɛ Oolo Mordekai

9 Dii nwu Haman ladie ninfa ku suoto lɛyɔɔ ku lɛpɔ osie kanya. Kafɔɔ obe wɔ aanya ni Mordekai di ɔka kayoko, aatofo alɛ atataka ee atayɛkɛ ni di anu nɔɔ yi, ɔblɔ lafiɛ Haman di Mordekai suoto. 10 Kafɔɔ, Haman lamufũ suoto aaklee, ni aasifi leyo nɛ.

Ni aakpee baalɛɛ basiɛwo nɔɔ ku ɔsɔfɔ nɔɔ Seres nɛ. 11 Ni di Haman latakatɛsa suoto katoo aatuo ma di lɛsaawɛ kplɛ nɔɔ suoto, babisuɔtɔbi nɔɔ kpinwu ku sisuku se simuu se suoto di ɔka latɔɔ ni dibu ku mmle aatakatɛsa nwɔ ni katoo alenke ni batii finle ku banɔɔfotii bamba nɛ. 12 Haman lakple aabuɛ aakyakaa alɛ, "Diele simuu nɛ, lete nii ninle otii wɔ di Ɔkasanko Ester lalɛɛ alɛ ntikanko ni ɔka buɔwa ni opunu wɔ aatũ ni nɛ. Ester lakple aalɛɛ mi ku ɔka kafɔɔ alɛ buwa kɔsɛɛ. 13 Kafɔɔ n-ya mmle amuu dilɔɔtɛɛ suoto leyɔɔ kokple nnya ni ɔnya Mordekai, Yuda otii nwu ninsi ni di ɔka kayoko."

14 Ni di Haman basiɛwo nɔɔ bamuu ku ɔsɔfɔ Seres latɔkɔ nwɔ alɛ, "Ta batofo lɛkpaka di lɛtaka dibla nkpaa afosi-akuɛnsĩ-nnɔɔ, faatɔkɔ ɔka, aata basaka Mordekai di lɛkpaka nwu ku olesɛ. Fiɛ nfɛ fakyɛ alesaa nwu kalekɔ ku ɔka di suoto siyɔɔ fɔ." Haman lafũ ɔlaa wɔ mmle aakpee, ni aata baatofo lɛkpaka nwu baase nɛ.