1 Obe wɔ di Mordekai latofo ni asaa ya amuu batɔɔbla nii, ni aabɛbɛɛ akpeele nɔɔ, aayɔ lɛboko aanyukũ, aayɔ ntɔ̀ aafifia, ni aadie aasifi okpoo kplɛ nwu kamɛ aalaatoowi kaku osie kanya ku kudú nɛ. 2 Kafɔɔ ɔka kayoko lete aakyɛ aalaase, diekye osuku nnaa kuɔta otii kuonwii alɛ aaklee leboko ambuo nwu. 3 Di kasɔ ka biala di kukũ nwu ku ɔka kanya didiki nwu lakyɛ ni yi, kaku kplɛ nwɛ di Yuda batii kamɛ, ku kanya ninii, kaku owi ku kudú. Batii kpinwu laklee aboko baate di ntɔ̀ kamɛ.

4 Obe wɔ di Ester bakpɛmblatɛ-sanko ku basuɔtɔ ba ataa beediki ni lawa baabatɔkɔ nwɔ ni Mordekai ɔlaa yi, diabuo nwɔ suoto osie kanya. Ni di Ester layɔ akpeele aakyesee Mordekai alɛ akpee, aadiki leboko nɔɔ nwu atɛ, kafɔɔ atafũ nya. 5 Ninfɛ di Ester lalɛɛ Hatak, ɔka osuɔtɔ wɔ beediki ni ataa, baadiki alɛ atoonyu nwɔ nii, ni aatɔkɔ osuɔtɔ nwu alɛ awolaa kamɛ di lɛsaa le nikɔbla ni Mordekai ku nle oso diɛwa ni ninkpo.

6 Nioso Hatak ladie aakyɛ Mordekai nfũ di okpoo kplɛ nwu lɛkpaka di ɔka kayoko. 7 Ni di Mordekai latɔkɔ Hatak lɛsaa biala le niawa nwɔ ni di suoto, ku koto ko okle di Haman labuɛ aatɛ alɛ abayɔ antɛ ni di ɔka koto katɛkɔ, diɛta ni Yuda batii ɔwɔɔsa nkyaka nii. 8 Aatɔɔ kafɔɔ kukũ nwu sɛlaa diɛta ni otososa odiki lɛma wɔ baakpana ni di Susa, alɛ aalaatuo Ester aadiki kũ kamɛ atɔɔ. Aatɔkɔ nwɔ kafɔɔ alɛ atɔkɔ Ester aakyɛ ɔka katũ aalaatikiti nwɔ lekoto aanya ma nyaami, aatikiti nwɔ lekoto kafɔɔ ata batii nɔɔ. 9 Ni di Hatak lakple aasifi aalaatɔkɔ Ester ɔlaa wɔ di Mordekai labuɛ ni nɛ. 10 Ninfɛ di Ester latɔkɔ nwɔ alɛ aalaatɔkɔ Mordekai alɛ, 11 "Ɔka banɔɔfotii bamuu ku ɔka nsɔ nwu batii n-ye alɛ osuɔtɔ ee ɔsanko lele niɛwa ɔka ɔkyɛ di leyo le kaamɛ kamɛ, ninanle ɔlɛɛ ɛɛlɛɛ nwɔ yi, ɔka nkpe kufiofa kunwii pɛ: alɛ baalo otii nwu. Nle lete niedie ni kaamɛ ninle alɛ, ɔka mayɔ koto sɛɛle lɛkɔ ankyɔɔ otii nwu, ninfũ nwɔ nkpa nɛ. Kafɔɔ ayi afosi-atiɛ nintoofe, bɛɛlɛɛ mi alɛ nkyɛ ni ɔka nfũ nɛ."

12 Obe wɔ baalaatɔkɔ ni Mordekai Ester sɛlaa nwu yi, 13 ni di Mordekai lakplesa kanya ka mmle alɛ: "Tannyu falɛ, ta fasi ni di ɔka leyo oso, lete lɛfɔ nimadie di Yuda batii bamuu kamɛ. 14 Diekye nse feelokanana di obe wɔ mmle kamɛ, ni lɛkyakaako ku didiki kamakye lɛba bamba ninta Yuda batii, kafɔɔ afɔ ku teefɔ leyo kamɛ batii kamakpi. Owe kafɔɔ nin-ye alɛ afɔ faawa sɛka kayilakɔ ka mmle di obe wɔ mmle okle kamɛ?"

15 Ninfɛ di Ester lakyesee Mordekai kanya didikibi le mmle alɛ: 16 "Tɔɔkyɛ faalaasiisa Yuda batii ba bamuu ninkpe ni di Susa, bienii kanya bitɛɛ. Bitanle ee bianyi ayi atiɛ, kakũ ee kakyɛ. Ami ku bakpɛmblatɛ-sanko nii bubanii kanya fɛ mmle biɔbla nii. Nse butɔɔbla nle mmle, ami kamakyɛ ɔka nfũ, nu di kufiofa diɛta osuku. Ni nse lekpi, ntookpi."

17 Nioso Mordekai lakyɛ aasifi aalaabla di Ester sɛlaa simuu kanya.