1 Di lefosi dii tiɛfa di lefosi kɔwɛntɛ nyɔɔfa, bɔɔlɛɛ ni Adar, di Yuda batii awɛntɛ kamɛ, fiɛ di kukũ ko di ɔka ladiki ni kanya kabla ɔkpɛ. Di dii le mmle suoto Yuda batii balo lanyu alɛ babalenkee Yuda batii, kafɔɔ nyu lo, ɔlaa nwu lakyi kuafuu, ni di Yuda batii lalenkee mba niakyidi ma ni nɛ. 2 Ninfɛ di Yuda batii lasi di sekpoo kplɛ lɛma, di Ɔka Akasweros kasɔ kamuu suoto alɛ bɔɔlaadieko mba niatoomiɛ ni kawɔɔ lɛma nɛ. Kuonwii ditafuo ma oyilako, diekye nnle bamba nwu batii bamuu latɔɔyɛkɛ ma. 3 Ni di nsɔ nwu batii finle bamuu, ɔka banɔɔfotii ku abaa kanyabayilatɛ ku ɔka kanyabayilatɛ lakyakaako Yuda batii nɛ, ta Mordekai difu lapɛ ma ni oso. 4 Mordekai lale otii finle di lɛkayo nwu kamɛ; leyooto nɔɔ lakyaka nsɔ nwu mmuu, ni aakple aawɛ osie aatɔɔkyakaa nɛ.

5 Nioso Yuda batii lasasafɔ balo lɛma bamuu ku kapamii, baaloloo ma, baawɔɔsa ma, ni baabla ma nle niakaatɛɛko ma ni nɛ. 6 Di Susa katanikokɔ kamɛ, Yuda batii nwu lalo, baawɔɔsa batii alafa-anɔɔ. 7 Baalo kafɔɔ Parsandata, Dalfon, Aspata, 8 Porata, Adalia, Aridata, 9 Parmasta, Arisai, Aridai ku Waisata, 10 Hamedata obisuɔtɔbi, Haman babisɔtɔbi lefosi nwu niale ni Yuda batii balo. Kafɔɔ batadiki nnɛɛ baakpanko kakpɛ lɛsaawɛ lɛma.

11 Baalaatɔkɔ ɔka batii ba lɛpɔ le baalo ni di Susa katanikokɔ nwu kamɛ di dii nwu nkpo kale. 12 Ni di ɔka latɔkɔ Ɔkasanko Ester alɛ, "Yuda batii ntoolo, bɛɛwɔɔsa kafɔɔ batii alafa-anɔɔ ku Haman babisuɔtɔbi lefosi nwu di Susa katanikokɔ nwu kamɛ. Ni lɛ bɛɛbla di ɔka nsɔ nwu bule kamɛ? Kanunua be lɛsaa nfɛ fɔɔkaalɛ? Bababla manta fɔ. Obe ninle fɔ dibiesaa? Nni kafɔɔ babatuna manta fɔ."

13 Ninfɛ di Ester ladiki kanya alɛ, "Nse dilɛ diɛta ɔka, ni aata Yuda batii ba di Susa osuku baabla miɛ dii le mmle kukũ nwu ɔkpɛ kɔsɛɛ kafɔɔ, faata basaka Haman babisuɔtɔbi lefosi nwu di akpaka suoto."

14 Nioso ɔka ladiki kanya alɛ babla nninkpo. Baakpana kukũ di Susa, ni baasaka Haman babisuɔtɔbi lefosi nwu baalo nɛ. 15 Ni di Yuda batii ba di Susa labasi di Adar kɔwɛntɛ lefosi dii naafa suoto, ni baalo batii alafa-atiɛ di Susa nɛ, kafɔɔ batadiki nnɛɛ baakpanko kakpɛ lɛsaawɛ lɛma.

16 Kafɔɔ di obe nwu kamɛ Yuda batii ba niabu ni di ɔka nsɔ nwu suoto kafɔɔ lasi baatĩtĩi suoto lɛma alɛ baawɛ onwu mannwuna di balo lɛma nnɛɛ. Baalo batii nkpe afosi-akuɛnsĩ-banɔɔ lɛma, kafɔɔ batadiki nnɛɛ baakpanko kakpɛ lɛsaawɛ lɛma. 17 Nle mmle lawa di Adar kɔwɛntɛ lefosi dii tiɛfa suoto, ni di lefosi dii naafa suoto baatɛ ɔnyɛɛ, baatũ opunu, baanya suoto lɛyɔɔ nɛ.

18 Kafɔɔ Yuda batii ba di Susa lasi di lefosi dii tiɛfa ku lefosi dii naafa suoto, ninfɛ baatɛ ɔnyɛɛ di lefosi dii nɔɔnle suoto nɛ, baatũ opunu baanya suoto lɛyɔɔ.

19 Nioso di Yuda batii ba ninsi ni di sɛkpoo kplɛ- ku mba ninsi ni di sekpoo biibii- n-le dii di Adar kɔwɛntɛ lefosi dii naafa suoto, fɛ suoto lɛyɔɔ ku opunu otũ dii nɛ, dii le manta ni bawo asaa.

20 Ninfɛ di Mordekai lakpana sɛsaabla se mmle aatɛ, ni aakpana akũ aata Yuda batii ba di Ɔka Akasweros nsɔ mmuu, mbe niatɛɛtɛɛ ni ku mbe niakyo nii, 21 alɛ aata ma manle lefosi dii naafa ku lefosi dii nɔɔnle ayi nwu lɛlɛɛ biala di Adar kɔwɛntɛ kamɛ nɛ, 22 fɛ obe wɔ di Yuda batii lawɛ ni atoko ɔkyɛ ole di balo lɛma nnɛɛ ku kɔwɛntɛ ko di sɛnyaami lɛma owi lakple ni suoto lɛyɔɔ, di kaku lɛma kafɔɔ owi labakple ni dii ole. Mordekai lakpana nya alɛ baale ayi ya mmle fɛ opunu otũ ku suoto lɛyɔɔ ayi ku bawo alesaa ɔta ku asaa ɔkyɛ bapiitɛ.

23 Nioso Yuda batii nwu lafũ baakpee alɛ babakple mantoole ayi nwu baakye ni kasɔ ole, mantɔɔbla asaa ya di Mordekai lakpana aata ma nii. 24 Diekye Hamedata, Agagi otii nwu obisuɔtɔbi, Haman, Yuda batii bamuu lo nwu lakũ kanwumbe di Yuda batii suoto alɛ abawɔɔsa ma, ni aawii pur (nin ninle atrebi owii) diata ni olo lɛma ku kawɔɔ nɛ. 25 Kafɔɔ di obe wɔ di ɔka lanu* ni kanwumbe nwu okũ ɔlaa, ni aakpana afiofa kukũ alɛ kɔkpaa kpile ko di Haman kodiki ni di Yuda batii suoto kakple kunwa di nnwɔɔ omu disi suoto, alɛ nnwɔɔ ku babisuɔtɔbi nɔɔ baasaka ma di akpaka suoto. 26 (Nkpo oso baatɔɔlɛɛ ayi ya mmle alɛ Purim, diakye di pur. ɔlaa suoto). Ta lɛsaa biala baakpana ni di kukũ ko mmle kamɛ ku nle baanya ni ku nle niawa ma ni di suoto oso. 27 Ni di Yuda batii layɔ baatika di suoto lɛma alɛ bɔɔtɛ ɔsaabla wɔ di mma ku banantii lɛma ku mba bamuu niakpɔtɔɔ ma ni kaamɛ, batansĩ ayi anyɔ ya mmle ole lɛlɛɛ biala, di osuku wɔ kanya baakyɛ ni ku obe wɔ baatɛ ni kamɛ. 28 Dikpe ni manyuma, manle kafɔɔ ayi ya mmle di leyo biala kamɛ, kɔna biala kamɛ ku kasɔ biala ku okpoo kplɛ biala kamɛ. Ni kafɔɔ Yuda batii batandiɛ Purim ayi ya mmle dii ole, ee onyuma ninya didie di banantii lɛma kamɛ.

29 Nioso Abihail obisankobi, Ɔkasanko Ester ku Mordekai, Yuda otii nwu lakpana kukũ ku sɛkambi simuu baatika difuɔ di kukũ ko mmle nyɔɔfa diafe ni di Purim suoto. 30 Ni di Mordekai layɔ akũ nwu aakyesee Yuda batii bamuu ba ninkpe ni di Akasweros sɛka kalekɔ nsɔ kɔlafa-afosi-anyɔ-nkuɛnsĩ nwu nɛ- dibiene ku disi otika sɛlaa- 31 alɛ batɛ Purim ayi ya mmle di obe wɔ baatɛ ni kanya, fɛ mmle di Mordekai, Yuda otii nwu ku Ɔkasanko Ester lakpee ni kufiofa aata ma nii, ku mmle kafɔɔ baatɔɔtɛ bɛɛta ni suoto lɛma ku banantii lɛma, mmle baayɔ nwu ni ole di kanya onii ku kaku owi lɛma obe kamɛ. 32 Ester kufiofa nwu latika difuɔ di Purim sɛsaabla se mmle suoto, ni baakpana kũ di akũ kamɛ baatɛ nɛ.