18 Ni iyihe Mana imeze nkawe,

iharira icaha, ikababarira ibigabitanyo

vy’amasigarira y’ishamvu yiwe?

Ntiwama uratse ibihe vyose

ahubwo uhimbarwa no kugira imbabazi.

1 Ngirira imbabazi, ewe Mana

kubera urukundo rwawe rudashira;

kubera impuhwe zawe nyinshi

nufute ibigabitanyo vyanje.

2 Nyoza ukugabitanya kwanje kwose

unyoze icaha canje.

6 Niwibuke, Uhoraho, imbabazi zawe nyinshi n’urukundo rwawe,

kuko biriho uhereye kera hose.

7 Ntiwibuke ivyaha vyo mu buto bwanje

n’inzira zanje z’ubugarariji;

nyibuka ku bw’urukundo rwawe,

kuko wewe, Uhoraho, uri mwiza.

1 Uhoraho ndagutakambira, bivuye i bwina;

2 Niwumve ijwi ryanje, ewe Mana.

Utege amatwi

ukwinginga kwanje.

11 Ntunkureko imbabazi zawe, ewe Uhoraho;

urukundo rwawe n’ubwizigirwa kwawe vyame binzigama.

6 Ni ukuri ukugira neza kwawe n’urukundo rwawe bizonkurikirana

imisi yose y’ukubaho kwanje,

nanje nzoba mu Ngoro y’Uhoraho

ibihe vyose.

13 Nk’uko se agirira abana ikigongwe,

ni ko Uhoraho agirira ikigongwe abamwubaha;

15 Ariko hariho itandukaniro rinini hagati y’igicumuro ca Adamu n’ingabire y’ubuntu bw’Imana. Ni ivy’ukuri ko abantu benshi bapfuye kubera igicumuro c’uwo muntu umwe. Yamara ubuntu bw’Imana n’ingabire y’imbabazi yatanze biciye ku wundi muntu, ari we Yesu Kristo, birengeye cane ivyo.

15 None, ko ubuntu bw’Imana bwatubohoye tukaba tutakiganzwa n’ivyagezwe, bisigura ko dushobora kubandanya dukora ivyaha? Ntibikabe!

4 Ariko kubera urukundo rwinshi Imana, yo mutunzi w’imbabazi, yadukunze, 5 yatugiranye bazima na Kristo igihe twari tugipfuye twishwe n’ibicumuro vyacu. Ubuntu bw’Imana ni bwo bwabakijije.

9 ariko anyishura ati: "Ubuntu bwanje buraguhaje, kuko ubushobozi bwanje bukorera muri wewe cane iyo uri mu ntege nke." Ivyo ni vyo bituma nirata cane intege nke zanje, kugira ngo ubushobozi bwa Kristo bugume kuri jewe.

13 Uwuhisha ivyaha vyiwe nta mahirwe agira,

ariko uwuvyatura akabiheba agirirwa ubuntu.

7 Umunyakibi nareke inzira ziwe,

umunyavyaha ave mu vyiyumviro vyiwe bibi.

Bagaruke k’Uhoraho, na we azobagirira imbabazi,

bagaruke ku Mana yacu, na yo izobaharira ku buntu.

18 Ariko Uhoraho aripfuza kubagirira imbabazi;

ku bw’ivyo azohaguruka kugira ngo abereke impuhwe,

kuko Uhoraho ari Imana y’ukugororoka.

Hahiriwe abamwiteze.

13 Nimugende mwige iri jambo ico rivuga: ‘Nshaka ko mugira imbabazi kuruta kumpa ibimazi.’* Kuko sinaje kurondera abagororotsi, ahubwo naje kurondera abanyavyaha."

21 Hanyuma Petero araza abaza Yesu ati: "Mwami, mbega mugenzanje ancumuyeko, nzomuharira kangahe? Incuro indwi?"

22 Yesu aramwishura ati: "Sindababwiye incuro indwi, ariko incuro mirongo indwi kugwiza indwi.

14 Kuko nimwaharira abantu ibibi babakoreye, na So wo mw’ijuru azobaharira namwe.

31 Ariko kubera imbabazi zawe nyinshi ntiwabaherengeteje canke ngo ubahebe, kuko uri Imana y’inyabuntu kandi y’inyembabazi.

5 Ni vyiza ko umuntu agira ubuntu akagurana abandi,

akadandaza mu kuri.

17 Ukugira neza kw’Uhoraho Imana yacu kube kuri twebwe

ukomeze igikorwa c’intoke zacu;

egome, komeza igikorwa c’intoke zacu.

16 Nuko muze twegere intebe y’Imana y’ubuntu dushize amanga, kugira ngo twakire imbabazi, turonke n’ubuntu vyo kudufasha mu gihe gikwiye.

1 None rero bene Data, kubera izo mbabazi nyinshi Imana yatugiriye, ndabinginga ngo mushikanire Imana imibiri yanyu nk’ibimazi bifise ubugingo, vyejejwe kandi biyihimbara. Uko ni ko kuyisenga kwanyu kwoyihimbara.

16 Kuko Imana yakunze abari kw’isi cane, bituma itanga Umwana wayo w’ikinege, kugira ngo uwumwizera wese ntazoranduke, ahubwo aronke ubugingo budashira.

29 Kuko mutagiriwe ubuntu bwo kwizera Kristo gusa, ahubwo mwahawe n’ubwo gushobora kubabazwa ku bwiwe.

1 Hezekiya atumako Abisirayeli bose n’Abayuda, kandi yandikira amakete Abefurayimu n’Abamanase, abaha ubutumire ngo baze mu Ngoro y’Uhoraho i Yerusalemu guhimbaza Pasika y’Uhoraho, Imana y’Abisirayeli. 2 Umwami n’abaganwa biwe n’ikoraniro ryose bari i Yerusalemu bari biyemeje guhimbaza Pasika mu kwezi kwa kabiri. 3 Ntibari bwashobore kuyihimbaza mu bihe vyategekanijwe kuko ata baherezi bakwiye bari bwarobanurwe, kandi abantu ntibari bwigere bakoranira i Yerusalemu. 4 Iyo nteguro yo guhimbaza Pasika yabonetse ko ari nziza ku mwami no ku bantu bose. 5 Baca bafata ingingo yo gutuma intumwa mu Bwisirayeli hose, uhereye i Berisheba mu bumanuko ugashika i Dani mu buraruko, bahamagara abantu ngo baze i Yerusalemu guhimbaza Pasika y’Uhoraho, Imana y’Abisirayeli. Ntibari bwayihimbaze ari benshi nk’uko vyari vyaranditswe.

6 Kw’itegeko ry’umwami, intumwa zikwira hose mu Bwisirayeli n’i Buyuda zitwaye amakete avuye ku mwami no ku baganwa biwe, avuga ngo:

"Yemwe Bisirayeli mwese, nimugaruke k’Uhoraho, Imana ya Aburahamu, na Isaka na Isirayeli, kugira ngo na we abagarukeko mwebwe abasigaye, mutahitanywe n’agatikizo k’abami b’i Ashuri. 7 Ntimube nka ba sogokuruza na benewanyu, babaye ibigaba imbere y’Uhoraho Imana ya ba sekuruza, ari co catumye ibahindura akajoreza nk’uko mubibona. 8 Ntimukomantaze imitima nk’uko ba sogokuruza banyu bayikomantaje; mwumvire Uhoraho. Muze mu Ngoro yiwe, iyo yejeje akayitoranya ibihe bidashira. Mukorere Uhoraho Imana yanyu, kugira ngo uburake bwiwe bw’inkazi bubaveko. 9 Nimwahindukirira Uhoraho, benewanyu n’abana banyu bazogirirwa akagongwe n’ababajanye nk’inyagano maze bagaruke muri iki gihugu, kuko Uhoraho Imana yanyu ari inyembabazi kandi igira ikigongwe cinshi. Nimwamuhindukirira, ntazobakurako inyonga ziwe."

10 Za ntumwa ziragenda, ziva mu gisagara zija mu kindi, mu Befurayimu no mu Bamanase, gushika mu Bazebuloni; ariko abantu baritwengera, barabakengera. 11 Yamara abantu bamwe bo mu Basheri, Abamanase n’Abazebuloni bicisha bugufi baja i Yerusalemu. 12 No mu Buyuda, ukuboko kw’Imana kuba ku bantu baho, abaha kugira umutima umwe wo gukora ivyo umwami n’abaganwa biwe bari bategetse, bivuye mw’ijambo ry’Uhoraho.

13 Nuko mu kwezi kwa kabiri, abantu benshi bakoranira i Yerusalemu ngo bahimbaze Umusi Mukuru w’imikate itarimwo umwambiro. 14 Bakuraho ibicaniro vyari i Yerusalemu, basambura n’ibicaniro batangirako ibimota neza, babita mu mwonga wa Kidironi.

15 Maze ku musi ugira cumi na kane w’ukwezi kwa kabiri, bakerera umwagazi wa Pasika. Abaherezi n’Abalewi bari buzuye ibimaramare, baca barihumanura maze bazana ibimazi vyo guturirwa mu Ngoro y’Uhoraho. 16 Maze baca baja mu bibanza vyabo nk’uko vyanditswe mu Vyagezwe vya Mose umuntu w’Imana. Abaherezi bamija ku gicaniro amaraso baherejwe n’Abalewi. 17 Kubera ko mw’ikoraniro harimwo abantu benshi batari bihumanuye, Abalewi ni bo bahavuye bakerera imyagazi y’intama ya Pasika y’abantu bose bari bahumanye, kuko batashobora gushikiriza iyo myagazi yabo Uhoraho. 18 Kandi naho abantu benshi mu bari bavuye mu Befurayimu, mu Bamanase, mu Bisakari no mu Bazebuloni batari bihumanuye, barariye Pasika, banyuranya n’uko vyanditswe. Ariko, Hezekiya arabasengera, avuga ati: "Icompa Uhoraho, kuko ari mwiza, akababarira umuntu wese 19 yashize umutima wiwe ku kurondera Uhoraho, Imana ya ba sekuruza naho ahumanye ku bw’amategeko y’Ahera." 20 Maze Uhoraho yumva ugusenga kwa Hezekiya, akiza abantu.

21 Abisirayeli bari i Yerusalemu bahimbaza Umusi Mukuru w’imikate itarimwo umwambiro, bamara imisi indwi banezerewe cane, mu gihe Abalewi n’abaherezi baguma bararirimbira Uhoraho ku musi ku musi, bakoresheje ibicurarangisho bisamirana, vyeguriwe Uhoraho.

22 Hezekiya avuga amajambo yo gutera intege Abalewi bose bari berekanye ko batahura neza igikorwa c’Imana. Muri iyo misi indwi bariye umugabane wabo batanga n’ibimazi vy’ishimwe barongera bahimbaza Uhoraho Imana ya ba sekuruza.

23 Maze ikoraniro ryose rica ryemeranya kwongerako iyindi misi indwi, bayimara bahimbaza Imana kandi banezerewe. 24 Hezekiya umwami w’i Buyuda ategura amashuri y’inka igihumbi n’intama n’impene ibihumbi indwi ku bw’iryo koraniro, n’abaganwa na bo batanga amashuri y’inka igihumbi n’intama n’impene ibihumbi cumi. Igitigiri kinini c’abaherezi barihumanura. 25 Ikoraniro ryose ry’Abayuda riranezerwa, hamwe n’abaherezi n’Abalewi n’abari bakoraniye hamwe na bo bavuye mu Bisirayeli, harimwo n’abanyamahanga bari baje bava mu Bwisirayeli n’ababa i Buyuda. 26 Hari umunezero mwinshi cane i Yerusalemu, kuko kuva mu misi ya Salomo mwene Dawidi umwami w’Abisirayeli hatari bwabe ikintu nk’ico i Yerusalemu. 27 Abaherezi n’Abalewi barahaguruka ngo bahezagire abantu, maze Imana irabumva, kuko isengesho ryabo ryashitse mw’ijuru, ahera hayo, aho iba.

1 Umugabo yirukanye umugore wiwe

maze akarongorwa n’uwundi mugabo,

mbega yosubira kumugarukana bakabana?

Mbega igihugu nticoca kirushiriza guhumana rwose?

Ariko wewe wabaye maraya, ufise abo wikundira benshi,

mbega wongarukako?"

ni ko Uhoraho abaza.

2 "Unamura amaso urabe impinga z’imisozi.

Mbega hoba hariho ahantu utahumanije?

Wicara ku nzira urindiriye abo wipfuza ukunda,

wicara nk’umuntu yangara mu bugaragwa.

Wahumanije igihugu

ugihumanishije ubusambanyi bwawe n’ibibi vyawe.

3 Ni co catumye imvura ibura,

n’imvura y’impeshi ntiyagwa.

Ariko mu maso hawe biraboneka ko uri maraya;

mugabo ntunamaramara.

4 Mbega ntiwamye umpamagara ngo:

‘Data, mukunzi wanje wo kuva nkiri muto,

5 mbega uzokwama ushavuye?

Mbega uburake bwawe ni ubw’ibihe vyose?’

Uko ni ko uvuga,

ariko ugakora ibibi uko ushoboye kwose."

6 Ku ngoma y’umwami Yosiya, Uhoraho yarambwiye ati: "Wabonye ivyo Isirayeli mutizigirwa yakoze? Yagiye ku musozi muremure wose no musi y’igiti cose gitotahaye maze asambanirayo. 7 Nibajije ko ahejeje gukora ivyo vyose azongarukako ariko si ko vyagenze, maze murumunawe Yuda arabibona. 8 Nahaye ikete ryo kwahukana Isirayeli maze ndamwirukana kubera ubusambanyi bwiwe bwose. Ariko nabonye na murumunawe Yuda mutizigirwa atigeze atinya; na we nyene yagiye mu vyo gusambana. 9 Kuko ubuhumbu bwa Isirayeli ata co bwamubwiye kinini, yahumanije igihugu asambana n’amabuye n’ibiti. 10 Naho vyabaye uko, murumunawe Yuda ntiyangarutseko n’umutima wiwe wose, atari mu majambo gusa," ni ko Uhoraho avuze.

11 Uhoraho arambwira ati: "Isirayeli mutizera ntakiri umugororotsi kurusha mutizigirwa Yuda. 12 Genda mumenyeshe iyi nkuru mutumbereye mu buraruko muti:

‘Garuka Isirayeli Mutizera,’ ni ko Uhoraho avuze.

‘Sinzosubira kukurakira,

kuko ndi umunyembabazi,’ ni ko Uhoraho avuze.

‘Sinzokwama ndatse ibihe vyose.

13 Pfa kwemera icaha cawe,

ko wagararije Uhoraho Imana yawe,

wasanzaje ubwiza bwawe ku mana z’inyamahanga

musi y’igiti cose gitotahaye,

kandi ntiwanyumviye,’ "

ni ko Uhoraho avuze.

14 "Nimungarukeko, mwa bana batizigirwa," ni ko Uhoraho avuze, "kuko ndi shobuja. Nzobatoranya, ndabakure iyo mwasabagiriye, umwe ndamukure mu gisagara kimwe na babiri mu muryango umwe, maze ndabazane i Siyoni. 15 Hanyuma nzobaha abungere bahuye n’uko umutima wanje ugomba, bazobarongora mu kumenya no mu gutahura. 16 Muri iyo misi, ibitigiri vyanyu nivyamara kwongerekana cane mu gihugu," ni ko Uhoraho avuze, "abantu ntibazosubira kuvuga ivy’Isandugu y’Isezerano ry’Uhoraho. Ntizosubira na rimwe kwinjira mu bwenge bwabo; ntizokwibukwa, kandi ntizosubirizwa. 17 Muri ico gihe bazokwita Yerusalemu Umugwa w’Uhoraho kandi amahanga yose azokoranira i Yerusalemu ngo bahe icubahiro izina ry’Uhoraho. Ntibazosubira gukurikira ugukomantara kw’imitima yabo mibi. 18 Muri iyo misi ab’inzu ya Yuda bazokwifatanya n’ab’inzu ya Isirayeli maze bose baze bavuye mu buraruko baze mu gihugu nahaye ba sekuruza babo kw’ishamvu.

19 Ni jewe ubwanje navuze nti:

‘Ese ukuntu binezera kugufata nk’umwana wanje

no kuguha igihugu ciza co kwipfuzwa,

itongo rirusha ayandi yose kuba ryiza mu bihugu vyose.’

Niyumvira ko muzonyita Data

kandi mutazontera ibitugu ngo mureke kunkurikira.

20 Ariko nk’uko umugore ahemukira umugabo wiwe,

ni ko mwampemukiye, yemwe ab’inzu ya Isirayeli,"

ni ko Uhoraho avuze.

21 Urwamo rwumvikana ku dutwe tw’imisozi,

Abisirayeli barira kandi batakamba,

kuko banduje inzira zabo

kandi bibagiye Uhoraho Imana yabo.

22 "Nimuhindukire, yemwe mwa bana batizerwa;

nzobakiza ndabakuremwo ugusubira inyuma."

"Egome, tuzokugarukako,

kuko uri Uhoraho Imana yacu.

23 Ni ukuri ugusenga ibigirwamana vyo ku dusozi

no ku misozi ni uruhendo;

ni ukuri agakiza k’Abisirayeli

kari k’Uhoraho Imana yacu.

24 Kuva mu buto bwacu imana ziteye isoni ni zo zatikije

ivyavuye mu butame bwa ba sogokuruza,

zariye imikuku n’amasho vyabo,

abahungu n’abakobwa babo.

25 Reka twubame hasi kubera ibiteterwe,

kandi ibimaramare vyacu bidutwikire.

Twacumuye k’Uhoraho Imana yacu,

twebwe na ba sogokuruza bacu;

kuva mu buto bwacu gushika uwu musi

ntitwumviye Uhoraho Imana yacu."