28 Mandâ ərə səkɔ, Jezu wûsə̂ nə ə pa kpəsəye ərə nɔ̂ nglɔ̂ gâ ye kɔ, â ndə kə pa ndəma əpʉ ə̂në Fraka nə̂ Ndjapä pâ kɔ mbrə, tshə pâ: «Əgo ə̂ngû mi əmə.»* 29 Ə̈bə̈ ləsû sə̂ kôto ə̂në duva ə̂në ə kpi ə kpi kɔ sə̂ lə nə. Atrugu nə zâ ə̈bə̈ ndɔkɔrɔ, ə ndrû lə duva nə ə̂në ə kpi ə kpi kɔ ə î gâ tə̂ ə̈bə̈ ama ayɔ izɔpə ə nâ də nə trö gâ tə̂ ama Jezu nə. 30 Alɔ ə̂në Jezu nə trâ duva nə ə̂në ə kpi ə kpi kɔ, tshə pâ əpʉ ə pa: «Ərə nɔ̂ nglɔ̂ gâ ye.» Â tshə têrə kumu ye gâ tʉ ə tshû.

23 Mandânə ə̂në atrugu nə kû Jezu nə gâ ala masheyɔ nə gâ ye kɔ, əndje kô aləba nə̂ ye, ə krû tshelə nə vəna, əzü bale bale də ənə̂ ye. Əndje zâ ndje əkro ləba nə̂ ye ə̂në əndje sû sû ə sû ne kɔ, ə̂në ə sə kʉ yerogbodo nə mâ tə̂ kumu nə ʉrrr ndjɔ mâ tə̂ budu nə kɔ. 24 Əndje pâ lə takpa tə̂ əndje ə pa: «A sü süru tshelə nə ne, bale a tɔ̈ kədi ndə kə wu əzü ə̂në tshə sə kə sɔtə̂ nə kɔ.» Ə sə rə ndə kə pa əpʉ ə̂në Fraka nə̂ Ndjapä pâ gâ ye kɔ, ndəma nə mbrə, ə̂në ə pa:

«Əndje krû tshelə aləba nə̂ əmə tə̂ əndje.

 əndje zâ əgerə ləba nə̂ əmə ə tɔ̂ də kədi.»*

Ərə ə̂në atrugu nə mbrə̂ kɔ kə sə̂.

25 Trö tə̂ masheyɔ nə ə̂në əndje kû Jezu nə gâ ala nə kɔ, əyï nə gâ ndə aye əyï nə, Marə̂, əwɔ Klɔpasə gâ ndə Marə̂ tshe Magədala sə̂ je, əndje kâ kôto. 26 Ə̂në Jezu nə wû əyï nə gâ ndə trawaya ə̂në tshə yîndə ye kɔ, trö də əyï nə nə kɔ, tshə pâ kə əyï nə ə pa: «Anə̂, ɨrɨ zə kə səye.» 27 Mandânə, tshə pâ kə trawaya nə ə pa: «Əyï zə kə səye.» Bale, kʉ pə tə̂ alɔ nə səkɔ, trawaya nə zâ əyï Jezu nə mâ ndə ye-e.

33 Alɔ ə̂në əndje yî kumu əndje mâ tə̂ ətshe ə̂në əndje djî əɨrɨ nə ə pa «Gbɔkrɔ» kɔ gâ ye kɔ, əndje kû Jezu gâ ala masheyɔ nə kôto gâ ndə aəmbrʉ azü nə bishi nə, əndje kû ə̈bə̈ nə djoko ndə ndəkɔ ye ə kû bale nə djoko ndə gəle ye. 34 Jezu pâ əpʉ ə pa: «Abä, gbä tshelə əpʉ lə kumu əndje, mbrə ə̂në əndje wusə̂ ərə ə̂në əndje sə kə mbrə nə kɔ wu ne.»

Əndje krû tshelə aləba nə̂ ye lə takpa tə̂ əndje tə̂ äwä kə tɔ də kədi.* 35 Ə̂kpû azü nâ ə kâ ndə kə wu aərə nə. Aâgbɔ̂ azü nə̂ Ajuwufu mɔ̂ ətshə ə pâ: «Tshə tshɔ̂ azü lə kuzu. Kədə tshə sə tə Kristə ə̂në Ndjapä kê ətshə ngâ gâ ye kɔ, tshə tshɔ̈ tə̂ ye də ə̂tə̂ ye lə kuzu!» 36 Atrugu nə ndje mɔ̂ ətshə. Əndje nâ trö də ətshə ə zâ duva ə̂në ə kpi ə kpi kɔ kə ətshə 37 ə pâ: «Kədə bə sə tə əyïngerə nə̂ Ajuwufu, tshɔ̈ tə̂ zə də ə̂tə̂ zə lə kuzu!» 38 Djoko lafɔ, pâ kumu ye, əndje tâ ə̈bə̈ ngrowô ə pa: «Ətshə koye sə tə əyïngerə nə̂ Ajuwufu.»

39 Ə̈bə̈ əmbrʉ əzü nə bale ə̂në əndje kû əndje gâ lafɔ kɔ gû Jezu ə pâ: «Bə sə sə tə Kristə ne a? Tshɔ̈ tə̂ zə də ə̂tə̂ zə lə kuzu ə tshɔ̈ ä ndje!» 40 Bale, bəngâ nə səkɔ ngâ kə ətshə ə pâ: «Bə kpe rawa Ndjapä kpe ne a? Ə də̂ kʉtə̂ ngbanga ə̂në əndje wâ gâ pâ zə də əndje wâ ndje gâ pâ ye kɔ ne a? 41 Ənə̂ əzə̂, ə sə də äwänə, mbrə ə̂në ä sɔtə̂ ərə Lïndə̂ aərə ə̂në ä mbrə̂ gâ ye kɔ. Bale, ətshə koye, tshə mâ ə̈bə̈ əmbrʉ ərə mâ bale ne.» 42 Mandânə, tshə pâ: «Jezu, ə̂sə̂ əmə djërə əbə djërə ne alɔ ə̂në bə vɔtə̂ ngerə nə̂ zə.» 43 Jezu kîrə əpʉ ə pa: «Djatra əpʉ, mə pa kə əbə: kpəsəye, kpəsəye, a də aəmə sə kə sə mâ lə paradi.»

33 Ə̂në alɔ kâ kpə ə̂grû ətshe kɔ, ətshe bû sɔ pâ ashɔ nɔ̂ ʉrrr alɔ nɔ̂nɔ tə̂ ye gâ ə̂grû nə. 34 Ə̂në alɔ nə nɔ̂nɔ tə̂ ye gâ ə̂grû nə gâ ye kɔ, Jezu tâ râwâ tə âgbɔ̂ ə pa: «Eloyi, Eloyi, lama sabatani?», âdâ nə kə də̂: «Ndjapä nə̂ əmə, Ndjapä nə̂ əmə, mbrə yekɔ də̂ bə tshî əmə tʉ kɔ?»*

51 Kʉ pə kôto səkɔ, əgerə ləba ə̂në əndje dû gâ lafɔ ə wâ tshelə Anda Ndjapä nə kɔ, tshelə nə sûru kprû bishi ə vɔ̂tə̂ nə mâ lafɔ ʉrrr ndjɔ mâ tə̂ budu nə. Ashɔ même, tshelə əgbro aəkpʉ sûru, 52 amanda aə̂dû krɔ̂ â ə̂kpû azü nə̂ Ndjapä ə̂në əndje tshû gâ ye kɔ shê. 53 Əndje wûtu lə aə̂dû nə ə gû gâ lə gala Jeruzalamə nə ə̂në ə sə kpî mbrə Ndjapä kɔ, mandâ kə shê Jezu nə, â azü ngbatshe wû əndje.

54 Alɔ ə̂në kapita nə̂ atrugu də atrugu nə ə̂në əndje sə̂ kə bata Jezu nə kɔ wû kə meme ashɔ nə də aərə ə̂në ə wûtu kɔ, âgbɔ̂ awa zâ əndje â əndje pâ: «Koshe səye sə ngâ tə Ɨrɨ Ndjapä.»

13 Ə̈bə̈ âgbɔ̂ kə yi tə̂ ə̂në ə ro ənə̂ sə̂ ə̂në əzü ka tə̂ ye də sorô ye nɔ̂ mbrə agbɔbəngâ nə kɔ guta gu ne.

16 Mbrə ə̂në Ndjapä yîndə azü tshepashɔ wââ â zâ Ɨrɨ nə kʉ kpiabale kɔ, kanika əzü nɔ̂ ə̂në tshə za lɔsu ye kə ətshə, tshə sə sə kə tshu nə ne, bale tshə sə də sorô nə̂ alɔnɔ̂.

10 A sə̂ leme-e tə alayïkowɔ nə̂ Ndjapä, bale tshə shê tshelə takpa tə̂ əzə̂ də aəndje gâ tə̂ nə gâ ye tə̂ äwä kuzu Ɨrɨ nə. Â gu də̂, ə̂në tshelə takpa tə̂ əzə̂ də aəndje nə tɔ̂ gâ tə̂ nə gâ ye kɔ, a sə sə kə she lə kuzu tə̂ äwä sorô Ɨrɨ nə ne a!

16 A wusə̂ kə yi tə̂ tə̂ äwä ərə səye: Jezu Kristə nə kâ tə̂ ye də sorô ye nɔ̂ mbrə əzə̂. Əzə̂ ndje, a lï ndə kə pa a ka tə̂ əzə̂ də sorô əzə̂ nɔ̂ mbrə alaye əzə̂.

2 Mbrə ə̂në, Jezu Kristə nə də ə̂tə̂ ye tshû mbrə əzə̂ ndə kə gba tshelə anyaka nə̂ əzə̂, ə də̂ kʉtə̂ ənə̂ əzə̂ nə də̂ ne, bale ənə̂ azü tshepashɔ nɔ̂ ndje.

8 tshə mbrə̂ tə̂ ye də ə̂tə̂ ye teashe

ə dô tə̂ ye tə awodji əpʉ ama Ndjapä

ʉrrr ndjɔ ə tshû kuzu, kuzu la masheyɔ.

9 Ä wusə̂ nə ə pa Kristə nə ə̂në tshə shê lə takpa tə̂ akuzu gâ ye kɔ, tshə sə sə kə tshu kwatə̂ye ne; kuzu sə sə də awlra gâ pâ ye kwatəndje ne. 10 Ə̂në tshə tshû gâ ye kɔ, mbrə nyaka də̂ tshə tshû kɔ, äwä kpiabale gbrä; â ə̂në tshə sə də sorô kɔ, tshə sə də sorô nə mbrə Ndjapä.

3 E wusə̂ nə wu ə pa əzə̂ nɔ̂ ə̂në a zâ batamo nə̂ Jezu Kristə gâ ye kɔ, batamo kuzu ye də̂ a zâ gâ ye kɔ ne a? 4 Tə̂ äwä batamo kuzu səkɔ, əndje shî əzə̂ də a-Jezu gâ ye ndə kə pa, mata ə̂në Kristə nə shê lə takpa tə̂ akuzu, tə̂ äwä ə̂yî Abä gâ ye kɔ, əzə̂ ndje a sə lə tafa kə sə əzə̂.

27 Â mata ə̂në əndje za äwä kə azü ndə kə pa əndje tshu kʉ äwä bale kɔ, â mandânə ngbanga sə kə sə je kɔ, 28 äwä bale ndje, Kristə nə kâ tə̂ ye kʉ äwä bale gâ ye ndə kə pa tshə ko anyaka nə̂ ə̂kpû azü lə kumu əndje. Tshə wutu tə̂ bishi nə je, ə də̂ ndə kə pa tshə ko anyaka nə̂ azü də̂ ne, bale ndə kə pa tshə she azü ə̂në əndje sə kə ka mbrə ətshə kɔ lə kuzu.

22 «Azü əgɔ Isərayalə, e djï əpʉ ə̂në mə sə kə pa nə kɔ: Jezu, əzü əgɔ Nazaratə, sə tə əzü ə̂në Ndjapä yîsə̂ nə gashu kə e ə pa əne kə wlâ ətshə kɔ. Tə̂ äwä ye, Ndjapä mbrə̂ aərə ə̈lü kpî kpî kpî lə takpa tə̂ e, mata ə̂në, e-e də ə̂tə̂ e, e wusə̂ nə kɔ. 23 Əndje zâ koshe səkɔ gâ lə kəna e ə lï də ərə ə̂në Ndjapä zâ ama ndə kə mbrə nə də ərə ə̂në tshə gâmba ndə kə mbrə nə kɔ. E zâ ətshə gâ lə kəna adulu â əndje kû ətshə gâ ala masheyɔ â wô ətshə. 24 Bale, Ndjapä shê ətshə lə takpa tə̂ akuzu, ə djɔ̂ ətshə lə əyo kuzu, mbrə ə̂në kuzu lï lï ndə kə pa ə ro pâ ye ne.

11 «Əmə, mə də̂ ə̂rɔ̂ awobata andalimi. Ə̂rɔ̂ awobata andalimi nə za sorô ye mbrə andalimi nə̂ ye nə.

26 Mbrə ə̂në, alɔnɔ̂ ə̂në e sə kə zɨ mapa səye, ə sə kə ndju kopo səye, e mʉ̈ əpʉ kuzu Âgbɔ̂ Əyïngerə kə azü ʉrrr ndjɔ tshə gu.