1 E mbrə̈ ərə kʉ mata əmə, mata ə̂në əmə də ə̂tə̂ əmə, mə sə kə mbrə ərə mata Kristə kɔ.

2 Mə sə kə tra e mbrə ə̂në lə aərə nɔ̂, e sə kə li tshelə e tə̂ əmə ə sə kə bata aəpʉ nə̂ əmə mata ə̂në mə yîsə̂ nə kə e gâ ye kɔ. 3 Bale, mə yində kə pa e wusə̂ əpʉ səye: Kristə nə sə tə makɔndji nə̂ akoshe nɔ̂, koshe sə tə makɔndji nə̂ yashe â Ndjapä sə tə makɔndji nə̂ Kristə nə. 4 Koshe ə̂në tshə sə kə yu Ndjapä, wala tshə sə kə pa ndəma Ndjapä, â za ə̈bə̈ ərə gâ tə̂ kumu ye, tshə mbrə̂ gana gâ tə̂ Kristə, makɔndji nə̂ ye gâ ye. 5 Bale, yashe ə̂në tshə sə kə yu Ndjapä, wala tshə sə kə pa ndəma Ndjapä, â î ərə î gâ tə̂ kumu ye ne, tshə mbrə̂ gana gâ tə̂ äkɔ̈ nə tə makɔndji nə̂ ye nə gâ ye. Ə sə mata əndje lʉ̂ sukumu ye gâ ye. 6 Kədə ə̈bə̈ yashe kə i ərə i gâ tə̂ kumu ye ne, bale tshə wä sukumu ye nə gâ ye. Bale, â sə tə ərə gana ndə kə pa yashe wa sukumu ye, wala əndje lʉ sukumu ye nə, tshə ï ərə gâ tə kumu ye. 7 Koshe lï lï ndə kə pa tshə i ərə gâ tə̂ kumu ye ne, mbrə ə̂në tshə sə tə foto Ndjapä də ərə kə yisə̂ ə̂yî Ndjapä nə gashu, â yashe sə ənə̂ ye tə ərə kə yisə̂ ə̂yî koshe gashu. 8 Mbrə ə̂në Ndjapä zâ ərə tshekotə̂ yashe zâ â mbrə̂ də koshe kɔ ne, bale tshə zâ ərə tshekotə̂ koshe â mbrə̂ də yashe kɔ. 9 Ndjapä mbrə̂ koshe mbrə̂ mbrə yashe ne, bale tshə mbrə̂ yashe mbrə koshe. 10 Âdârə ə̂në, mbrə atrawaya nə̂ Ndjapä, yashe lï ndə kə pa tshə i ərə gâ tə̂ kumu ye kanika ə yisə̂ nə ə pa əne sə gâ tshekudu ə̈bə̈ əzü. 11 Bale, ətshi Âgbɔ̂ Əyïngerə, yashe sə sə tə ambanə tə̂ koshe, wala koshe sə sə tə ambanə tə̂ yashe ne. 12 Mbrə ə̂në äwä bale mata ə̂në Ndjapä zâ ərə tshekotə̂ koshe â mbrə̂ də yashe kɔ, äwä bale ndje yashe sə kə zu koshe, â aərə nɔ̂ to mâ ndə Ndjapä-e.

13 E-e də ə̂tə̂ e, e wü: ə sə də äwänə ndə kə pa ə̈bə̈ yashe sə kə yu Ndjapä ə i ərə i gâ tə̂ kumu ye ne a? 14 Tsheshu də ə̂tə̂ ye yisə̂ ərə yi kə e ə pa ə sə tə ərə gana ndə kə pa sukumu koshe tɔ ʉrrr ə gu ngbatshe ne a? 15 Bale, ə də̂ ənə̂ yashe, ə sə tə ərə ndə kə pa azü lʉ ətshə tə̂ nə, mbrə ə̂në ə̈ngrʉ̈ sukumu ye nə sə mata sərabəte. 16 Kədə ə̈bə̈ əzü kə yində kə wəra tə̂ ye tə̂ əpʉ səye, ə sə sə tə mandʉ ərə nə̂ ä, wala ənə̂ Alaglizə nə̂ Ndjapä ne.

17 Ə̂në mə sə kə za ama kə e də əpʉ səye kɔ, mə sə sə kə tra e ne. Mbrə ə̂në, alɔ ə̂në e ngbo tə̂ e lə aangbɔ, aangbɔ nə̂ e nə ma ə̂rɔ̂ nə ma kə e ne, bale ə ma də əmbrʉ nə kə e. 18 Angbʉlînə, mə djî ə pa alɔ ə̂në e ngbo tə̂ e gâ tə̂ nə lə Laglizə, əpʉ kə ea ətshe sə lə takpa tə̂ e. Mə wusə̂ nə ngâ ə pa ə də̂ əterə nɔ̂ də̂ kə sə̂ ne. 19 Ə lï ndə kə pa tshelə takpa tə̂ e nə sɔ, kanika azü yerɔ kpro, lə takpa tə̂ e, azü ə̂në əndje sə ngâ tə aawobata lɔsu əndje kɔ. 20 Rəkɔ, alɔ ə̂në e ngbo tə̂ e gâ tə̂ nə, ə də̂ rəgo nə̂ Âgbɔ̂ Əyïngerə də̂ e ngbo gâ tə̂ nə ndə kə zɨ nə kɔ ne. 21 Mbrə ə̂në, alɔ ə̂në e sə kə zɨ rəgo nə, əzü bale bale vɔtə̂ kə zɨ rəgo nə̂ ye də ə̂tə̂ ye, əlînə tə̂ ə̂dû angâ nə, â alabə̈ azü sə də əgo â ə̂pî sə kə mbrə alabə̈ ata əndje. 22 E sə sə də aanda nə̂ e ndə kə pa e zɨ rəgo ə ndju ərə lə nə ne a? Wala, e sə kə wu Laglizə nə̂ Ndjapä nə tə ərə kene, ə mbrə gana lə ala azü ə̂në əndje sə sə də ə̈bə̈ ərə bale ne kɔ a? Mə sə kə pa atâ kə e? Mə tra e ə tra a? Gâ pâ əpʉ səye, mə sə sə kə tra e ne.

23 Mbrə ə̂në, əmə, əpʉ ə̂në Âgbɔ̂ Əyïngerə yîsə̂ nə kə əmə, â mə pâ ndəma nə kə e gâ ye kɔ kə səye: də tsheləbu nə ə̂në əndje kâ ətshə kɔ, Âgbɔ̂ Əyïngerə Jezu zâ mapa 24 ə zâ mərshe kə Ndjapä ə ngɔ̂ tshelə nə ə pâ: «Ə sə tə tshekotə̂ əmə, ə̂në ə sə mbrə e. E mbrə̈ ərə səye ndə kə pa e li tshelə e tə̂ əmə.» 25 Äwä bale ndje, mandâ rəgo nə, tshə zâ kopo duva ə pâ: «Kopo səye sə tə tafa mbʉkʉ tə̂ äwä ə̈ndjï əmə. E mbrə̈ ərə səye ndə kə pa e li tshelə e tə̂ əmə alɔnɔ̂ ə̂në e sə kə ndju nə.» 26 Mbrə ə̂në, alɔnɔ̂ ə̂në e sə kə zɨ mapa səye, ə sə kə ndju kopo səye, e mʉ̈ əpʉ kuzu Âgbɔ̂ Əyïngerə kə azü ʉrrr ndjɔ tshə gu.

27 Âdârə ə̂në əzü ə̂në tshə zɨ mapa nə, wala tshə ndju kopo nə̂ Âgbɔ̂ Əyïngerə nə â lʉ lʉ ətshə ne, əpʉ sə gâ lə kumu ye mbrə tshekotə̂ Âgbɔ̂ Əyïngerə nə də ə̈ndjï ye nə. 28 Rəkɔ, əzü bale bale lï tshelə ye gâ pâ kə mbrə tə̂ ye kanika ə zɨ mapa nə ə ndju kopo nə. 29 Mbrə ə̂në, əzü ə̂në tshə zɨ mapa nə ə ndju kopo nə ə wu wu tə tshekotə̂ Âgbɔ̂ Əyïngerə ne, tshə za əpʉ gâ lə kumu ye də ə̂tə̂ ye â zɨ, â ndju kɔ. 30 Âdârə ə̂në, lə takpa tə̂ e, alayïrəka də alabə̈ azü ə̂në alabə̈ aərə tshekotə̂ əndje ndɨ̂ gâ ye kɔ sə je ngbatshe â alabə̈ azü ngbatshe tshû gâ ye kɔ kə sə̂. 31 Kədə əzə̂ də ə̂tə̂ əzə̂ kə li tshelə əzə̂ gâ pâ kə mbrə tə̂ əzə̂, əpʉ sə sə kə sə lə kumu əzə̂ ne. 32 Bale, Âgbɔ̂ Əyïngerə nə zâ əpʉ gâ lə kumu əzə̂, ndə kə pa tshə yisə̂ äwä kə əzə̂ kanika tshə wa ngbanga wa gâ lə kumu əzə̂ də ə̂dû azü tshepashɔ ne.

33 Rəkɔ, alaye əmə, alɔ ə̂në e ngbo tə̂ e gâ tə̂ nə tə̂ rəgo nə, e kä ə kä mbrə angâ e. 34 Kədə əgo kə mi ə̈bə̈ əzü, tshə zɨ̈ rəgo mâ lə anda mâ ndə ye, kanika e za əpʉ za gu nə gâ lə kumu e alɔ ə̂në e ngbo tə̂ e gâ tə̂ nə ne. Alɔ ə̂në mə â yi kumu əmə mâ je, mə wu əpʉ gâ pâ ə̂dû aəpʉ nə je.