1 Azü nə nɔ̂ âfɔ äwä bale ə nâ də Jezu gâ ətshi Pilatə. 2 Əndje vɔ̂tə̂ kə lea ətshə ə pa: «Ä sɔ̂tə̂ koshe səye, tshə sə̂ kə frɔ angâ ä də̂ Ajuwufu ə pa əndje dji əpʉ ama əgbro azü əgɔ dji ne ə piyi lapɔ pi mandânə səye kə âgbɔ̂ əyïngerə Sezarə ne. Tshə pâ də ə̂tə̂ ye ə pa əne sə tə Kristə, əyïngerə.» 3 Bale, Pilatə nə yû ətshə də əpʉ ə pa: «Əbə, bə sə tə əyïngerə nə̂ Ajuwufu a?» Jezu kîrə əpʉ kə ətshə ə pa: «Əpʉ nə kə sə̂ â bə pa kɔ.»

4 Pilatə nə pâ kə aâgbɔ̂ azü nə̂ aawotokrɔ nə də ə̂kpû azü nə ə pa: «Mə sɔtə̂ ə̈bə̈ əpʉ sɔ lə kumu koshe səye ndə kə pa mə wa ngbanga gâ pâ ye bale ne.» 5 Bale, əndje shêra ə pâ: «Tshə sə kə frɔ azü ndə kə pa əndje wəra tə̂ əndje tə̂ əpʉ ama əgbro azü əgɔ, ə yisə̂ əpʉ sə̂ kə azü lə əgɔ Jude nɔ̂. Tshə vɔ̂tə̂ nə mâ lə əgɔ Galile ʉrrr â wûtu də nə ndjɔ mâtəye kɔ.»

6 Alɔ ə̂në Pilatə nə djî əpʉ səkɔ, tshə yû ətshe ə pa: «Koshe səye sə tə əzü əgɔ Galile a?» 7 Alɔ ə̂në tshə wû ə pa Jezu sə̂ tə əzü əgɔ ə̂në Erɔdə sə̂ tə əyïngerə nə kɔ, tshə wlâ əndʉ ye kə Erɔdə nə ə̂në tshə sə̂ ndje mâ Jeruzalamə tə̂ tshekɨ nə səkɔ.

8 Alɔ ə̂në Erɔdə nə wû Jezu nə kɔ, tshelə ye sə̂ də âgbɔ̂ ə̂rû mbrə ə̂në ə mâ əlo ngbatshe də̂ tshə sə̂ də əgo kə wu ətshə kɔ. Tshə yîndə kə wu ətshə mbrə aəpʉ ə̂në tshə djî gâ pâ ye kɔ. Tshə yîndə kə wu ətshə də kə mbrə ə̈bə̈ ərə ə̈lü. 9 Tshə yû Jezu də aəpʉ ʉrrr, bale, Jezu nə kîrə əpʉ kîrə kə ətshə bale ne. 10 Aâgbɔ̂ azü nə̂ aawotokrɔ nə də aawoyisə̂ âgbɔ̂ əpʉ nə̂ Mayïzə sə̂ je, əndje lêa ətshə tə bandanə. 11 Erɔdə nə də atrugu nə̂ ye mbrə̂ tə̂ Jezu tə ərə kene ə mɔ̂ ətshə. Mandânə, əndje yî ləba ə̂në ə tshe ə tshe kɔ gâ tə̂ ye ə wlâ ətshə kwatəndje kə Pilatə nə. 12 Kʉ pə tə̂ alɔ nə səkɔ, Pilatə nə də Erɔdə nə mbrə̂ tə agbɔbəngâ, əndje ə̂në leme-e əndje djî tə̂ əndje djî ne kɔ.

13 Pilatə nə wlâ ətshe ndə aâgbɔ̂ azü nə̂ aawotokrɔ nə də əgbro azü əgɔ gâ ndə azü əgɔ nə 14 ə pâ kə əndje ə pa: «E nâ də koshe səye kə əmə ə pâ tshə sə̂ kə frɔ azü ndə kə pa əndje dji əpʉ ama əgbro azü əgɔ dji ne. Mə yû ətshə də ala e nɔ̂, mə sɔ̂tə̂ ə̈bə̈ əpʉ ə̂në e lêa ətshə tə̂ nə kɔ sɔ̂ bale ne. 15 Erɔdə ndje sɔ̂tə̂ ə̈bə̈ əpʉ sɔ̂ lə kumu ye ne, âdârə ə̂në tshə wlâ əndʉ ye kə əzə̂ kɔ kə sə̂. Koshe səye mâ ə̈bə̈ ərə ə̂në ə lï də ngbanga kuzu kɔ mâ bale ne. 16 Mə sə kə za ama ndə kə pa əndje da ətshə də djakwa. Mandânə, mə sə kə katə̂ ye.» [17 Alɔnɔ̂ tə̂ əlo sandaga Pakə, Pilatə sə̂ kə wora ə̈bə̈ əyïkânga bale kə əndje.]*23.17 Əpʉ səke sə sə lə alabə̈ aangbrɔ afraka Ndjapä də ama grakə ne.

18 Bale, əndje tâ râwâ mvrɔ ə pa: «Wö koshe səye ə wöra Barabasə kə ä!» 19 Əndje kânga Barabasə nə mbrə ə̂në tshə sə̂ lə takpa tə̂ azü ə̂në əndje âfɔ də awlra tə̂ əgbro azü əgɔ gâ ndə tə̂ ə̂në tshə wô əzü kɔ.

20 Pilatə nə kwâtə̂ye ə pâ əpʉ kə azü nə mbrə ə̂në tshə yîndə kə wora Jezu nə. 21 Bale, azü nə tâ râwâ ə pa: «Kü ətshə gâ ala masheyɔ! Kü ətshə gâ ala masheyɔ!»

22 Tə̂ äwä vəta nə, Pilatə nə pâ kə əndje ə pa: «Bale, əmbrʉ ərə yekɔ də̂ tshə mâ a? Mə sɔ̂tə̂ ə̈bə̈ əpʉ ə̂në ə lï də ngbanga kuzu kɔ sɔ̂ lə kumu ye bale ne. Mə sə kə za ama ndə kə pa əndje da ətshə də djakwa. Mandânə, mə sə kə wora ətshə.» 23 Bale, əndje shêra kprû ə tâ râwâ tə âgbɔ̂ ə pa tshə wo ətshə gâ ala masheyɔ. Râwâ əndje rô pâ Pilatə nə gâ ye. 24 Bale, Pilatə nə zâ ama Lïndə̂ ərə ə̂në əndje yîndə nə kɔ. 25 Tshə wôra koshe sə̂ ə̂në əndje kânga ətshə mbrə ə̂në əndje də azü âfɔ də awlra tə̂ əgbro azü əgɔ gâ ndə tə̂ ə̂në tshə wô əzü kɔ, mata ə̂në əndje yû tshuku nə kɔ. Bale, tshə zâ Jezu nə kə əndje ə pâ əndje ma ərə tshelə əndje tə̂ ye.

26 Alɔ ə̂në əndje sə̂ kə za Jezu nə na na ye kɔ, əndje zâ ə̈bə̈ koshe ə̂në əɨrɨ ye kə də̂ Shemɔ, əzü əgɔ Siranə kɔ, ə̂në tshə tô mâ lə kəndɨ â sə̂ kə gu nə kɔ. Əndje zâ masheyɔ nə gâ pâ əgʉ ye ndə kə pa tshə na də nə mandâ Jezu nə.

27 Ə̈bə̈ əgerə ə̂kpû azü sə̂ kə za äwä ye də alabə̈ ayashe. Ayashe nə kô kəna əndje gâ ndʉ əgʉ əndje ə sə̂ kə kɨ nə mbrə ətshə. 28 Jezu lîshi gâ mandâ ye gâ tə̂ ayashe nə ə pâ kə əndje ə pa: «Ayashe Jeruzalamə, e kɨ̈ kɨ̈ mbrə əmə ne! Bale, e kɨ̈ mbrə e də aləvu e, 29 mbrə ə̂në əlo sə kə na gu nə ə̂në azü sə kə pa nə ə pa: "Ənə̂ əndje tə ə̂rɔ̂nə, alayïmara də ayashe ə̂në əndje zû zû ne kɔ gâ ndə əndje ə̂në aneshe ɔ̂ angɔ əndje ɔ̂ ne kɔ!" 30 Bale, azü sə kə pa kə əgbro akaga ə pa: "E yɔ̈ gâ pâ ä!" Əndje sə kə pa nə kə aaya akaga ə pa: "E tshü ä!" 31 Mbrə ə̂në, kədə əndje mbrə marä tə̂ ərə rəke gâ tə̂ təyu ayɔ, ərə yekɔ də̂ əndje sə kə mbrə gâ tə̂ ə̈kü ayɔ?»

32 Azü nə kô ndje alabə̈ aəmbrʉ azü bishi ə nâ də əndje ndə kə wo əndje äwä bale də Jezu nə.

33 Alɔ ə̂në əndje yî kumu əndje mâ tə̂ ətshe ə̂në əndje djî əɨrɨ nə ə pa «Gbɔkrɔ» kɔ gâ ye kɔ, əndje kû Jezu gâ ala masheyɔ nə kôto gâ ndə aəmbrʉ azü nə bishi nə, əndje kû ə̈bə̈ nə djoko ndə ndəkɔ ye ə kû bale nə djoko ndə gəle ye. 34 Jezu pâ əpʉ ə pa: «Abä, gbä tshelə əpʉ lə kumu əndje, mbrə ə̂në əndje wusə̂ ərə ə̂në əndje sə kə mbrə nə kɔ wu ne.»

Əndje krû tshelə aləba nə̂ ye lə takpa tə̂ əndje tə̂ äwä kə tɔ də kədi.*23.34 Wu Ətsh 22.19. 35 Ə̂kpû azü nâ ə kâ ndə kə wu aərə nə. Aâgbɔ̂ azü nə̂ Ajuwufu mɔ̂ ətshə ə pâ: «Tshə tshɔ̂ azü lə kuzu. Kədə tshə sə tə Kristə ə̂në Ndjapä kê ətshə ngâ gâ ye kɔ, tshə tshɔ̈ tə̂ ye də ə̂tə̂ ye lə kuzu!» 36 Atrugu nə ndje mɔ̂ ətshə. Əndje nâ trö də ətshə ə zâ duva ə̂në ə kpi ə kpi kɔ kə ətshə 37 ə pâ: «Kədə bə sə tə əyïngerə nə̂ Ajuwufu, tshɔ̈ tə̂ zə də ə̂tə̂ zə lə kuzu!» 38 Djoko lafɔ, pâ kumu ye, əndje tâ ə̈bə̈ ngrowô ə pa: «Ətshə koye sə tə əyïngerə nə̂ Ajuwufu.»

39 Ə̈bə̈ əmbrʉ əzü nə bale ə̂në əndje kû əndje gâ lafɔ kɔ gû Jezu ə pâ: «Bə sə sə tə Kristə ne a? Tshɔ̈ tə̂ zə də ə̂tə̂ zə lə kuzu ə tshɔ̈ ä ndje!» 40 Bale, bəngâ nə səkɔ ngâ kə ətshə ə pâ: «Bə kpe rawa Ndjapä kpe ne a? Ə də̂ kʉtə̂ ngbanga ə̂në əndje wâ gâ pâ zə də əndje wâ ndje gâ pâ ye kɔ ne a? 41 Ənə̂ əzə̂, ə sə də äwänə, mbrə ə̂në ä sɔtə̂ ərə Lïndə̂ aərə ə̂në ä mbrə̂ gâ ye kɔ. Bale, ətshə koye, tshə mâ ə̈bə̈ əmbrʉ ərə mâ bale ne.» 42 Mandânə, tshə pâ: «Jezu, ə̂sə̂ əmə djërə əbə djërə ne alɔ ə̂në bə vɔtə̂ ngerə nə̂ zə.» 43 Jezu kîrə əpʉ ə pa: «Djatra əpʉ, mə pa kə əbə: kpəsəye, kpəsəye, a də aəmə sə kə sə mâ lə paradi.»

44 Ə̂në alɔ kâ kpə ə̂grû ətshe kɔ, ətshe bû sɔ pâ ashɔ nɔ̂ ʉrrr alɔ nɔ̂nɔ tə̂ ye gâ ə̂grû nə. 45 Tshela alɔ bû. Tshelə əgerə ləba ə̂në əndje dû gâ lafɔ ə wâ tshelə Anda Ndjapä nə kɔ tshelə nə sûru kprû bishi. 46 Jezu tâ râwâ tə âgbɔ̂ ə pa: «Abä, mə za yîrə̂ əmə gâ lə kəna zə.»*23.46 Wu Ətsh 31.6. Mandânə ə̂në tshə pâ əpʉ səkɔ, tshə tshû. 47 Ə̂në kapita nə̂ atrugu nə wû aərə sə̂ rəkɔ, tshə mbê Ndjapä ə pâ: «Djatra əpʉ, koshe səye sə tə ə̂rɔ̂ əzü.»

48 Ə̂kpû azü nə nɔ̂ ə̂në əndje nâ ndə kə wu ərə ə̂në ə mbrə kɔ, əndje dô tə̂ əndje gu na ye ə kô kəna əndje gâ ndʉ əgʉ əndje. 49 Azü nɔ̂ ə̂në əndje yêrɔ Jezu də ayashe ə̂në əndje vɔ̂tə̂ nə pə mâ Galile ndə kə za äwä ye kɔ, əndje kâ ngrʉ̂ â wû ərə ə̂në ə sə̂ kə mbrə nə kɔ.

50 Ə̈bə̈ əyïngbanga nə̂ Ajuwufu bale sə̂ je, əɨrɨ ye kə də̂ Jozafu. Tshə sə̂ tə ə̂rɔ̂ əzü, kə mbrə tə̂ ye sə̂ də äwänə. 51 Tshə yîndə ərə ə̂në angâ nə zâ ama ndə kə mbrə nə də aərə ə̂në əndje mbrə̂ kɔ yî ne. Tshə sə̂ tə əzü əgɔ Arimate, gala nə̂ Ajuwufu. Tshə sə̂ kə ka tə̂ alɔ ngerə nə̂ Ndjapä. 52 Tshə nâ mâ ndə Pilatə nə ə yû ətshə ndə kə za əko Jezu nə. 53 Jozafu nə nâ ə djɔ̂ əko Jezu nə la masheyɔ nə gâ tʉ ə wôle ətshə də ləba ə shî ətshə gâ lə ə̈bə̈ ə̂dû ə̂në əndje djî gâ lə əkpʉ ə̂në əndje tê tê pa ə shi kuzu gâ lə nə ne kɔ. 54 Alɔ nə səkɔ sə̂ tə̂ əlo kə gamba aərə mbrə saaba ə̂në ə ndô trö kɔ.

55 Ayashe nə ə̂në əndje âfɔ mâ Galile ə zâ äwä Jezu nə kɔ, əndje nâ mandâ Jozafu nə. Əndje wû ə̂dû nə də äwä ə̂në əndje zâ əko Jezu nə gâ lə nə kɔ. 56 Mandânə, əndje dô tə̂ əndje ə gû na ye ndə kə gamba kâdâ də yombo. Tə̂ əlo saaba nə, əndje wû tə̂ əndje mata ə̂në âgbɔ̂ əpʉ yîsə̂ nə kɔ.