Ester 4

Modekayi ɛ fɔ gɛkpà e ye Esita wakʋn

1 Gɛtɛ Modekayi ɛ nʋn ade powu gɛtɛ i sere fɔ, ɛ fɛɛran wɔ ngba, gɛ ɛ sa bekotoku bɔɔ ngba, gɛ ɛ ka bʋtɔ e tin wo duyu. Gɛ ɛ tɔ ɛ da ditele daanɩ ɛɛ gbɛrɛ afala-kin-kin ee wula gɛtɛ ɛn taa kere ɛ ya. 2 Mɔ ɛ bɔ ɛ san ɛ ma ten gɛ egyu dɩkpara diitunu, yema ɛnɩ ɛkɩ ɛn ma osele ɛ̀ sa bekotoku gyu dɩkpaara fɔ daanɩ. 3 Gɛtʋnkwaa-kamasɛ gaanɩ gɛtɛ bɛ kalan egyu-dɩrɛ wose fɔ, Yuda bete bɛ sara dɩkpʋkpʋ-dɩrɛ ma onyun wʋʋ gɛban ma gɛtʋrʋn yaanɩ. Yuda bete fɔ bɛ sa bekotoku bɔɔ ngba, gɛ bɛ kpà bʋtɔ be lù baayu.

4 Gɛtɛ Esita bɛsʋgʋgyan, ma wɔ bɛsaranyan gɛtɛ be tiri aforobi fɔ bɛ bɛ dɔ̀ wɔ ade gɛtɛ Modekayi ɛ mɛ fɔ, e gyu dɩyɩyɛ-dɩrɛ daanɩ. Gɛ ɛ sa bɛ alɛ bɛ ka ayan bɛ sa ma Modekayi fɔ èè tiri bekotoku bɔɔ ngba fɔ, mɔ en yera. 5 Ɛwʋ gɛ Esita e kpèlè egyu-dɩrɛ wɔsaranyan Hataki gɛtɛ be tiri aforobi gɛ egyu-dɩrɛ e tiri wɔ gɛtɛ ɛ̀ɛ̀ tɩ mɛ gʋtʋn tɛ ɛwɔ Esita fɔ alɛ ɛ san ɛ̀ɛ̀ ma nya alɛ, anʋn n de Modekayi.

6 Okoro Hataki ɛ san Modekayi wakʋn ditele fɔ dii getumakʋn, digyu-kpaara diitunu wʋʋ bʋnʋn. 7 Ɛwʋ gɛ Modekayi ɛ dɔ̀ wɔ ade powu gɛtɛ ì de wɔ fɔ, ma sɩka-fututu wɔkʋna gɛtɛ Haman ɛ dɔ̀ ɛ sɩ̀ alɛ, eè le ɛ sa gigyu-bɩya gɩɩ gatɩn fɔ, gɛtɛ bàà ka be wolo Yuda bete fɔ. 8 Modekayi e biri ɛ ka gɩkpa gɛtɛ bɛ ŋwara, gɛ gɩɩ tɛ ose bàà muru Yuda bete fɔ gɛ bɛ gbɛrɛ gii digbongbo Susa ditele powu daanɩ ɛ tɛ Ataki. Gɛ Modekayi ɛ dɔ̀ Hataki alɛ ɛ ka gɩkpa fɔ ɛ ma wùlà Esita, fɔ èè tiri gaanɩ tɛ wɔ. Gɛ ɛ dɔ̀ wɔ gɛtɛ ɛ̀ɛ̀ dɔ̀ wɔ fɔ ɛ̀ɛ̀ san egyu-dɩrɛ wakʋn, fɔ ɛ̀ɛ̀ ma koturu egyu-dɩrɛ, fɔ èè wula ɛwɔ Esita bɛnɩ gutunkoro.

9 Okoro Hataki e biri ɛ san Esita wakʋn ɛ ma dɔ̀ wɔ ade gɛtɛ Modekayi ɛ dɔ̀ fɔ. 10 Gɛ Esita ɛ dɔ̀ Hataki alɛ ɛ ma dɔ̀ Modekayi alan, 11 <<Egyu bɛndɩrɛbi ma ntʋnkwaa fɔ bʋʋ bɛnɩ powu bɛ̀ nyɩ̀ gɛtɛ eteni ɛkɩ abɛɛ ɛnanɩ ɛkɩ ɛɛn talɩ ɛ san digyu-kpaara gɛtɛ egyu en kpèlè wɔ, yema ose wʋ̀ sa gɛtɛ baà wolo wɔ. Mɔ gengyi egyu-dɩrɛ ɛ̀ tʋna wo bugyu buuyon-tonlɛ fɔ e wùlà ɛnɩ fɔ, ɛwʋ bɩrɛ, bɛn nan wolo wɔ. Mɔ awi dikpilin ma fwo ɩ lɛ, gɛtɛ egyu-dɩrɛ en kpèlè mɩ wo digyu-kpaara.>>

12 Gɛtɛ bɛ bɛ dɔ̀ Modekayi Esita wanyun-gyebi fɔ, 13 Modekayi e biri e tiri ade fɔ yiinyun alan, <<Kara sa amɩnlɛ alɛ à si digyu-kpaara wuu koro, awɔ aako aà ye waanɩ gengyi bee wolo Yuda bete fɔ. 14 Okoro gengyi à gye aanyun a tin ɔya nyawʋ waanɩ fɔ, Yuda bete bɩrɛ, Wurubwarɛ ɛɛ̀ talɩ ɛ kpà bɛ bàà wura getoya. Mɔ baà muru awɔ ma aate dɩkpaara. Ɛnyan n nyɩ̀? Nkɩfɔ ɛtɩ taade nyayɩ yii koro gɛ bɛ sɩ̀ wɔ̀ egyu-nanɩ-dɩrɛ ɔkʋna nyawʋ lɛ>>

15 Ɛwʋ gɛ Esita e tiri ade fɔ yiinyun ɛ tɩyɛma Modekayi alan, 16 <<San ma kʋla Yuda bɛnɩ powu gɛtɛ bɛ̀ sa Susa ditele daanɩ fɔ, fɔ yàà ban onyun ɩ tɛ mɩ. Ɩ kara di gɛ ɩ kara nyʋn gɛlɛɛ awi asiyee odon ma ofilibo. Gɛlɛ ke gɛ nmɩ ma mɩɩn bɛsʋgʋgyan mɔ taà mɛ anlɛ gɛtɛ yaà mɛ fɔ. Tɩ̀ mɛ gɛlɛ ti were fɔ, nan san egyu wakʋn, ma gɛtɛ ose fɔ wʋn taa tɛ osele gba fɔ. Gɛ gengyi na ku fɔ, wu were!>>

17 Okoro Modekayi ɛ tɔ ɛ da, gɛ ɛ ma mɛ anlɛ gɛtɛ Esita ɛ dɔ̀ wɔ fɔ powu.