1 Dafidi bugyu buu gedi gaawi yaanɩ fɔ, dɩkpan-dɩrɛ di sere bɩkyan bisiyee powu. Gɛ Dafidi e lila Yahwe. Gɛ Yahwe ɛ dɔ̀ wɔ alan, <<Nkalan wʋ sɔ Sawulo ma wɔ dɩkpaara dii koro, yema e wolo Gibeyon bete.>> 2 Okoro egyu e kpèlè Gibeyon bete fɔ, gɛ ɛ tabʋrʋ ma ɛbɛ. Gibeyon bete fɔ ben di Isareli bɛnɩ, mɔ bè di gɛ Amori bete gɛtɛ be kuruma fɔ. Wʋ̀ sa waanɩ alɛ, Isareli bete bɛ dɔ̀ gɛtɛ nafɔ bàà we boo gutunkoro, mɔ Sawulo e len gɛtɛ nafɔ èè muru bɛ, yema gelen-dɩrɛ gɛtɛ ɛ̀ ba tɛ Isareli ma Yuda bete fɔ wuu koro. 3 Gɛ Dafidi e lila Gibeyon bete fɔ alan, <<Anʋn gɛ n mɛ n tɛ yɩ? Lan gɛ nan mɛ fɔ yiituru wàà nʋ̀n yɩ, fɔ yàà bwala Yahwe gbagba bɛnɩ?>> 4 Gibeyon bete fɔ bɛ dɔ̀ alan, <<Wun di sɩka-fututu ma sɩka-sɩya waade n sa ɛtɩ ma Sawulo ma wɔ dɩkpaara dii getite, gɛ wun di taamɩnlɛ gɛtɛ taà wolo Isareli wɔnɩ ɛkɩ.>> Gɛ e lila bɛ alan, <<Anʋn gɛ ɩɩ dɔ̀ alɛ, n mɛ n tɛ yɩ?>> 5 Bɛ dɔ̀ egyu fɔ alan, <<Ɛnɩ gɛtɛ e muru tɩ, gɛ ɛ mɛ wamɩnlɛ alɛ ɛɛ̀ mɩna tɩ, anlɛ gɛtɛ waà mɛ gɛtɛ tɩn nan wura gɛsarakʋn Isareli atele yaanɩ fɔ, 6 yɛ bàà tɛ tɩ wodu waanɩ wʋʋ bɛnɩ kwarankɩ (7), fɔ tàà ka bɛ tɩ san Gibeya ditele, Sawulo wɔlɛ Yahwe odon fɔ wuu koro, fɔ tàà ma wolo bɛ Yahwe bʋnʋn.>> Gɛ egyu fɔ alan, <<Nan ka bɛ n tɛ yɩ.>> 7 Mɔ egyu fɔ e we Sawulo wobi Yonatan wobi Mefiboseti gutunkoro, yema Efonte wɔ ntam, gɛtɛ wʋ̀ sa Dafidi ma Sawulo wobi Yonatan boo getite fɔ wuu koro. 8 Egyu fɔ ɛ ka Ayiya wobi Risipa bebi-tenibi bɛnyɔɔ gɛtɛ e wo ɛ tɛ Sawulo, Arimoni ma Mefiboseti fɔ, ma Sawulo wobi Merabi bebi-tenibi ton, gɛtɛ e wo ɛ tɛ Mewola-te Basilayi wobi Adirile fɔ, 9 gɛ ɛ ka bɛ ɛ tɛ Gibeyon bete fɔ. Gɛ be wolo bɛ fà Yahwe bʋnʋn, odon fɔ wuu koro, gɛ bɔɔ bɛnɩ kwarankɩ powu be muru disere-kɩlɩn. Be wolo bɛ afɩnaa yii gesila yii duwi-gyangbasɛlɛ daanɩ. 10 Ayiya wobi Risipa ɛ ka disepekyi dɩɩ dɩyan, gɛ ɛ sɩ̀ ɛ tɛ wo koro ataa fɔ yii koro. Ye kyangbelele ofila ma sere ɔya gɛtɛ ɛsʋn ɛ nʋ̀n e lu bekpena boo koro gɛ ɛ sɩ̀ disepekyi dɩɩ dɩyan fɔ. Ɛn yɛ bɛsɩsɩra bàà be di bɛ difilawi daanɩ, abɛɛ dɩfa dɩɩ bɛnan bàà bɛ̀ kɔrɔ bɛ odente. 11 Gɛtɛ bɛ dɔ̀ Dafidi gɩnyan gɛtɛ Sawulo wodima Ayiya wobi Risipa ɛ mɛ fɔ, 12 Dafidi ɛ san ɛ ma ka Sawulo ma wobi Yonatan baanankʋba e ye Yabesi-Gileyadi. Be yuri bɛ be ye Beti-San bɛnɩ boo getumakʋn, ɔkʋn gɛtɛ Filisiti bete bɛ fà bɛ duwi gɛtɛ Filisiti bete be wolo Sawulo Gilibowa odon wuu koro fɔ. 13 Dafidi ɛ ka Sawulo ma wobi Yonatan baanankʋba e ye dʋkɔ ɛ ba, gɛ ɛ kʋla ɛbɛ gɛtɛ be wolo bɛ fà fɔ mɔ baanankʋba. 14 Be lò Sawulo ma wobi Yonatan baanankʋba Sela ditele, Benyamin bete bɔɔ gɛtʋnkwaa gii koro, wote Kisi gɩsàn gɩɩpɩ. Anlɛ gɛ bɛ mɛ ɛwʋ gɛtɛ egyu e wùlà bɛ fɔ powu. Ɛwʋ wʋʋ gama fɔ, Wurubwarɛ ɛ nʋn boo inyun-tiri tɛ gɛtʋnkwaa fɔ. 15 Akpa i biri i sere Filisiti bete ma Isareli bete boo getite, gɛ Dafidi ɛ san ma wɔ bɩtà bʋʋ bɛtàlɛ, gɛ bɛ kpà ma Filisiti bete fɔ. Gɛ Dafidi ɛ fana. 16 Gɛ Rafa bɛkɛmalɛ fɔ baanɩ bɔɔnana ɛkɩ Isibi wonobi, gɛtɛ wɔ gɩwɔrɔnyan-sɩya gii giturunyan gɩɩdʋrʋ wʋ̀ ba bekilo besiyee gɛ è de edon-fon fɔ, ɛ sa amɩnlɛ gɛtɛ eè wolo Dafidi. 17 Mɔ Seruya wobi Abisayi ɛ bɛ kpà Dafidi, gɛ Abisayi ɛ kpà ma Filisita-te fɔ, gɛ e wolo wɔ. Gɛ Dafidi bɛnɩ fɔ bɛ kan ntam alan, <<Dafidi, an nan nɩ san akpa ma ɛtɩ kpa, fɔ Isareli bete bɔɔtan wʋ kara bè ku.>> 18 Nyawʋ wʋʋ gama fɔ akpa i biri i sere ma Filisiti bete Gobi ditele dɩɩ gɩlan. Gɛ Wusa-te Sibekayi e wolo Safi, gɛtɛ è di Rafa bɛkɛmalɛ fɔ wodu waanɩ wʋʋnɩ ɛkɩ. 19 Gɛ akpa-fon i biri i sere ma Filisiti bete Gobi ditele dɩɩ gɩlan. Gɛ Betelehem-te Yaare-Oregim wobi Elihanan e wolo Gati-te Goliyati, gɛtɛ wodon wù we anlɛ gɩtʋrʋnyan gɛtɛ bɛɛ ka bɛ lɔ ayan fɔ. 20 Akpa-fon i biri i sere Gati ditele dɩɩ gɩlan. Gɛ ete-dɩrɛ ɛkɩ gɛtɛ ɛ̀ ba alobi ma bɩsɩrɩbi kooron-kooron, gɛ ɛyɩ powu ɩ ma mɛ dikpilin ma anaa fɔ ɛ̀ fɩya ma ɛbɛ, gɛ ɛwɔ mɔ è di Rafa bɛkɛmalɛ fɔ boodu waanɩ. 21 Gɛtɛ ɛ nya Isareli bete alɛ bè di bɛfɔbʋlɩlɛ fɔ, Dafidi wonobi Simeya wobi Yonatan e wolo wɔ. 22 Bɛnɩ bɛnaa nyabɛ powu, bè di gɛ Rafa bɛkɛmalɛ bɔɔ bɛnana gɛtɛ bɛ̀ sa Gati fɔ, gɛ bɛ nʋ̀n Dafidi ma wɔ bɛsaranyan fɔ baalɔ yaanɩ.