2 Samweli 4

Isi-Boseti diku

1 Gɛtɛ Sawulo wobi Isi-Boseti ɛ nʋn gɛtɛ Abineri e ku Hebron ditele daanɩ fɔ, koro gi ku wɔ, gɛ wʋ mɛ Isareli bete powu gɩsaa. 2 Fɔ Sawulo wobi Isi-Boseti ɛ̀ ba bɩtà bʋʋ bɛtàlɛ bɛndɩrɛ bɛnyɔɔ bɛkɩ. Baayere n di Baana ma Rekabi. Boote n di Rimon, gɛtɛ e ye Bereto ditele, Benyamin wofoli waanɩ fɔ. Beereti bete bɛ̀ fɩya ma Benyamin bete, 3 yema bɛnɩ gɛtɛ nafɔ bè si Bereti ditele fɔ, be serenti bɛ san Gitayim, gɛ bè si dʋkɔ be ye ma ǹdò gisela gisela.

4 Fɔ, Sawulo wobi Yonatan ɛ̀ ba ebi-tenibi ɛkɩ gɛtɛ bee kpèlè wɔ Mefiboseti. E di bɩkyan ton pɛgɛ be wolo Sawulo ma Yonatan Yesirele wakpa fɔ yaanɩ. Gɛtɛ wɔkyalalɛ fɔ ɛ nʋn ade fɔ gɛ ɛ ka wɔ ee serenti fɔ, ee kutuma gʋsɔ gʋsɔ okoro ebi fɔ e ye ɛ nʋ̀n, gɛ wʋ yɛ wɔ e bilingi ɔtagasɩ.

5 Duwi dɩkɩ Bereto-te Rimon bebi Rekabi ma Baana be ye bɛ da Isi-Boseti dɩkpaara. Gɛtɛ bɛ ma gyu dʋkɔbɛ ofila-kenken fɔ, ɛ̀ dɔ ee tuna. 6 Ɔya wʋtɔkɔ fɔ, dɩkpaara fɔ dɩɩnyalɛ gɛtɛ ɛɛ fʋba amɔrɔ fɔ, ɛ fwa bʋda. Okoro Rekabi ma wonobi Baana bɛ mɔlɩ be gyu dikwo fɔ dɩɩ gamɩ anlɛ gɛtɛ bɛ ma kpa amɔrɔ, gɛ be sere wɔ edon diboro daanɩ, gɛ Rekabi ma wonobi be serenti bɛ da. 7 Gɛtɛ be gyu dikwo fɔ daanɩ gɛlɛ fɔ, Isi-Boseti ɛ̀ dɔ wɔ npa wo koro wo dikwo-dʋrɔlɛ daanɩ. Gɛtɛ be sere wɔ edon be wolo be were fɔ, be kebi wo duyu, gɛ bɛ ka dɩ bɛ da. Bɛ san odente fɔ powu waanɩ bɛ da Yodan dɩtagba daanɩ. 8 Gɛ bɛ ka Isi-Boseti duyu fɔ bɛ bɛ tɛ Dafidi Hebron ditele, gɛ bɛ dɔ̀ wɔ alan, <<Aakyʋnlɛ Sawulo, gɛtɛ e len èè wolo wɔ̀ fɔ wobi Isi-Boseti duyu dɩ lɛ. Ǹdò Yahwe e le Sawulo ma wɔ bɛnana gutoro ɛ tɛ awɔ miinfonte egyu.

9 Ɛwʋ gɛ Dafidi ɛ dɔ̀ Bereto-te Rimon bebi, Rekabi ma wonobi Baana alan, <<Na nya Yahwe gɛtɛ ɛ̀ sa gɛ e tiri mɩ e ye dɩyɩyɛ powu daanɩ alɛ, 10 ɛnɩ ɛkɩ ɛ bɛ dɔ̀ mɩ alɛ Sawulo e ku, fɔ ɛ̀ nyɩ̀ alɛ è de gɛ ade-kpara ɛɛ mɔma mɩ, mɔ fɔ, na gye wɔ, gɛ na wolo wɔ Sikilagi ditele daanɩ. Nyawʋ n di wo gutoro gɛtɛ na le wɔ ade gɛtɛ ɛ bɛ dɔ̀ mɩ fɔ yii koro. 11 Waà mɛ lan gɛ gengyi omiri-kpen wʋʋ bɛnɩ bè wolo ɛnɩ ɛwɔ gbagba wɔ npa wo koro, wo dikwo-dʋrɔlɛ daanɩ gɛtɛ ɛn nyɩ̀ ade ɩkɩ yaanɩ fɔ, n kara lila wɔ nkalan n ye baalɔ yaanɩ, fɔ nan muru bɛ n ye gɛtʋnkwaa nyagɩ gii koro?>> 12 Okoro Dafidi ɛ yɛ wɔ bɛnɩ be wolo bɛ. Be kebi baalɔ ma bɔɔ bɩsɩrɩ, gɛ bɛ ka koro-kpaba fɔ bɛ kyɔlɔga gbɛma Hebron ditiribun diinyun. Mɔ bɛ ka Isi-Boseti duyu, gɛ be lò di Abineri gɩsàn gaanɩ Hebron dʋkɔbɛ.