1 Ɛsʋn gɛnʋ̀n gɩɩya gaawi-gyegeyelɛ yaanɩ gɛtɛ begyu bɛɛ san akpa fɔ, Dafidi ɛ sa Yowabi, ma egyu bɛnɩ, ma Isareli bɩtà bʋʋ bɛtàlɛ powu, gɛ bɛ ma muru Amon bete, gɛ bɛ sʋ Raba ditele bɛ sa. Mɔ Dafidi ɛ wɔ ɛ sara Yerusalem ditele daanɩ.

2 Gɛ duwi dɩkɩ ɔgyɔlɔ Dafidi ɛ tɔ e ye wɔ gɛdʋrɔkʋn gɛ ɛ̀ san ɛ̀ san wo digyu-kwo dɩɩ gɛwalɩkʋn gatala, gɛ e we ɛnanɩ ɛkɩ ye gatala dʋkɔ ee kù. Fɔ ɛnanɩ fɔ ɛ̀ ba ɔmɩrɩ gepepe. 3 Ɛwʋ gɛ Dafidi ɛ sa ɛnɩ ɛkɩ alɛ ɛ ma lila alɛ ɛnyan gɛ wù di. Gɛ ɛnɩ fɔ ɛ bɛ dɔ̀ wɔ alan, <<Wù di Eliyam wobi-nanɩ Batiseba, gɛtɛ è di Hiti-te Uriya wɔsɔ fɔ.>> 4 Gɛ Dafidi ɛ sa bɛnɩ bɛ ma kpèlè wɔ bɛ ba. Gɛtɛ e be gyu fɔ, Dafidi ɛ dʋrɔ ma ɛwɔ. (Fɔ ɛnanɩ fɔ ɛ bɔ e kù e were.) Wʋ gama fɔ e biri ɛ da dɩkpaara. 5 Gamama fɔ ɛnanɩ fɔ e we gɛtɛ è de diboro, gɛ ɛ sa Dafidi ɔtʋn alan, <<Ǹ de diboro.>>

6 Okoro Dafidi ɛ sa Yowabi ɔtʋn alan,<<Yɛ Hiti-te Uriya ɛ̀ɛ̀ kya mɩ gʋlɔ.>> Gɛ Yowabi ɛ yɛ Uriya ɛ ba Dafidi wakʋn. 7 Gɛtɛ Uriya ɛ ba wakʋn fɔ, Dafidi e lila wɔ anlɛ gɛtɛ Yowabi è si, gɛ e lila wɔ anlɛ gɛtɛ bɩtà bʋʋ bɛtàlɛ fɔ bè we, ma anlɛ gɛtɛ akpa fɔ ɩɩ san. 8 Gɛ Dafidi ɛ dɔ̀ Uriya alan, <<San aa dɩkpaara, fɔ àà ma tuna.>> Gɛtɛ Uriya e ye digyu-kpara dʋkɔ fɔ, egyu Dafidi ɛ yɛ bɛ ka anyan-kyɛlɛ bɛ ma tɛ wɔ. 9 Mɔ Uriya ɛn san wɔ dɩkpaara. Ɛwɔ ma wofonte bɛsaranyan fɔ powu bɛ dʋrɔ gɛ digyu-kpaara fɔ diitunu.

10 Gɛtɛ bɛ dɔ̀ Dafidi alan, <<Uriya ɛn san wɔ dɩkpaara>> fɔ, Dafidi e lila Uriya alan, <<Anʋn yii koro gɛ an san dɩkpaara, aasɔ wakʋn gɛtɛ a ye ditele a kyɛrɩ lɛ? >> 11 Ɛwʋ gɛ Uriya ɛ dɔ̀ Dafidi alan, <<Yahwe Dikola dɩɩ dɩdaka fɔ, ma Isareli bɩtà bʋʋ bɛtàlɛ ma Yuda bete bɛ̀ dɔ ayan-kwo yaanɩ, gɛ miinfonte Yowabi ma wɔ bɛsaranyan mɔ bɛ̀ dɔ okòro dɩfa daanɩ. Waà mɛ lan gɛ nmɩ nan talɩ n san mɩɩn dɩkpaara n ma di, fɔ nan nyʋn, fɔ nan dʋrɔ ma mɩɩnsɔ? Na nya gɛtɛ à si nkpa lɛ, mɩn nan mɛ gɛlɛ gaade n nya.>> 12 Gɛ Dafidi ɛ dɔ̀ Uriya alan, <<Sara nfan duwi-kɩlɩn fɩya, fɔ gɩsa nan tiri wɔ̀ osele.>> Okoro Uriya ɛ wɔ Yerusalem duwi dɩtɔkɔ, ma duwi-nyɔɔfɛ fɔ. 13 Gɛ Dafidi e kpèlè wɔ alɛ e be di ma ɛwɔ. Uriya e di gɛ ɛ yɛ wɔ ɛ nyʋn bʋkan e suu. Mɔ gɛtɛ ofila wu gyu fɔ, Uriya ɛ ma dʋrɔ wofonte bɛsaranyan fɔ baakʋn, ɛn san wɔ dɩkpaara.

14 Gɛtɛ kere gɩ kpa gagyɩgyan fɔ, Dafidi ɛ ŋwara gɩkpa ɛ tɛ Uriya alɛ ɛ ka ɛ san ma Yowabi.

15 Ɛ ŋwara gɩkpa fɔ gaanɩ alan, <<Ka Uriya yela akpa fɔ yɩɩgba-gyegeyelɛ waanɩ, ɔkʋn gɛtɛ wʋ̀ ba ɔkɛma fɔ, fɔ àà kere wɔ ya, anlɛ gɛtɛ waà mɛ gɛ bàà wolo wɔ.>> 16 Gɛlɛ wuu koro gɛtɛ Yowabi ɛ bɛ sʋ ditele fɔ ɛ sa fɔ, ɛ yɛ Uriya ɛ ma yela ɔkʋn gɛtɛ ɛ̀ nyɩ̀ alɛ bɔɔ bɛkyʋnlɛ fɔ bɔɔ bɩtà bʋʋ bɛtàlɛ gɛtɛ bɛ̀ ba ɔkɛma fɔ bɛ̀ sa fɔ. 17 Gɛtɛ ditele fɔ dɩɩ bɛnɩ be ye bɛ ba bàà bɛ kpà ma Yowabi fɔ, Dafidi bɩtà bʋʋ bɛtàlɛ fɔ baanɩ bɛkɩ fɩya ma Hiti-te Uriya be ku. 18 Gɛ Yowabi ɛ sa bɛ ma dɔ̀ Dafidi ade gɛtɛ i sere akpa fɔ yaanɩ powu. 19 Gɛ ɛ dɔ̀ ɛwɔ gɛtɛ ɛ sa fɔ alan, <<Gengyi à dɔ̀ ade gɛtɛ i sere akpa fɔ yaanɩ powu a tɛ egyu Dafidi a were, 20 gɛ gengyi egyu Dafidi ɛ̀ ka owurufa, gɛ è lila wɔ alan, <Anʋn yii koro gɛ ɩ gbɛma yɩɩ bɛkyʋnlɛ fɔ boo ditele alɛ ɩ ma kpà? Ɩɩn nyɩ̀ alɛ ɛbɛ gɛtɛ bè yela ɩpɔrɩ fɔ yii koro fɔ baà tà yɩ bɩsɩnta be ye dʋkɔ? 21 Ɛnyan na wolo Yerube-seti wobi Abimeleki? Nka ɛnanɩ na fun dɩtaa-kpààràlɛ na ye ɔpɔrɩ fɔ wʋʋ gatala na bɛ nyɩ wɔ, gɛ e ku Tebesi ditele daanɩ?> Anʋn yii koro gɛ i yela ɩ gbɛma ɔpɔrɩ fɔ? Gengyi e lila wɔ gɛlɛ fɔ dɔ̀ wɔ alan, <Aasaranyan Hiti-te Uriya mɔ e ku.>>> 22 Okoro ɛsalɛ fɔ ɛ da, gɛ gɛtɛ ɛ ma gyu dʋkɔ fɔ, ɛ dɔ̀ Dafidi ade gɛtɛ Yowabi ɛ sa wɔ alɛ ɛ dɔ̀ wɔ fɔ powu. 23 Ɛsalɛ fɔ ɛ dɔ̀ Dafidi alan, <<Bɛnɩ fɔ be wura ɔkɛma tii koro, gɛ be ye okòro be be gyu taanɩ, mɔ ti berema bɛ tɩ san ditele fɔ diitunu. 24 Gɛ bɔɔ bɩsɩnta bʋʋ bɛtàlɛ fɔ bɛ tà aa bɛsaranyan fɔ bɩsɩnta be ye ɔpɔrɩ fɔ wʋʋ gatala, gɛ aa bɛnɩ fɔ bɛkɩ be ku. Aasaranyan Uriya Hiti-te fɔ mɔ e ku.>> 25 Gɛ egyu Dafidi ɛ dɔ̀ ɛsalɛ fɔ alan, <<Dɔ̀ Yowabi alan, <Kara yɛ nyawʋ wàà yɔ wɔ̀ koro, yema akpa yaanɩ bɩrɛ, ɛnɩ-kamasɛ ɛɛ̀ talɩ e ku. Ɩ sa aniya, fɔ yàà muru ditele fɔ.> Dɔ̀ gɛlɛ sa Yowabi aniya.>> 26 Gɛtɛ Uriya wɔsɔ ɛ nʋn alɛ wɔsan e ku fɔ, e wula wɔ. 27 Ɔya gɛtɛ e wula wɔsan e were fɔ, Dafidi ɛ sa bɛ ma ka wɔ bɛ ba wɔ dɩkpaara, gɛ e biligi wɔsɔ, gɛ e wo ebi-tenibi ɛ tɛ wɔ. Mɔ ade gɛtɛ Dafidi ɛ mɛ fɔ in di Yahwe gʋnʋn.