2 Samweli 24

Dafidi ɛ kalan bɛnɩ

1 Yahwe e biri ɛ ka owurufa Isareli bete boo koro, gɛ ɛ fʋba ɛ sa Dafidi gɛtɛ ɛ ma ha bɛ. Gɛ ɛ dɔ̀ wɔ alan, <<San, fɔ a ma kalan Isareli ma Yuda bete.>>

2 Okoro Egyu Dafidi ɛ dɔ̀ Yowabi gɛtɛ è di bɩtà bʋʋ bɛtàlɛ bɔɔ bɛndɩrɛ fɔ alan, <<San Isareli wo-ifoli fɔ powu yaanɩ, fɔ àà yɛ bàà kalan bɩtà bʋʋ bɛtàlɛ ye Dan ma sere Beeseba ditele. Fɔ nan wura n nyɩnla baasɔ.>>

3 Mɔ Yowabi ɛ dɔ̀ egyu fɔ alan, <<Yahwe aa Wurubwarɛ fɔ ɛ yɛ bɛnɩ fɔ baasɔ fɩya disere akpilin ton, fɔ miinfonte egyu ɛ̀ɛ̀ ka wɔ gʋnʋn we bɛ. Mɔ anʋn yii koro gɛ miinfonte egyu ee len ɛ̀ɛ̀ mɛ gɛlɛ gaade nyayɩ?>>

4 Mɔ egyu fɔ wanyun-gyebi fɔ ɩ da Yowabi ma bɩtà bʋʋ bɛtàlɛ bɛndɩrɛ fɔ. Okoro be kpe be ye egyu fɔ bʋnʋn bɛ da, gɛtɛ bàà ma kalan Isareli bɛnɩ fɔ.

5 Gɛtɛ bɛ kààrà Yodan getu fɔ, bɛ sara bɛ gbɛma Arore ditele gɩlan gatɩn gɛtɛ dɩ̀ sa dɩtagba fɔ dii getite, wʋʋ gama fɔ bɛ bʋn bɛ da Gadi ma Yaseri atele yaanɩ. 6 Bɛ san Gileyadi ma Tatim-Hodisi ma Dan-Yaan ma gyu Sidon ditele. 7 Ɛwʋ gɛ bɛ san Tire ditele gɛtɛ be sere ɔpɔrɩ be silin dɩ fɔ daanɩ, ma Hiwi bete ma Kanaan bete baatele yaanɩ. Gɛ bɛ san Beeseba gɛtɛ wʋ̀ sa Yuda fɔ.

8 Gɛtɛ bɛ san atele fɔ powu yaanɩ be tuma fɔ, be biri bɛ ba Yerusalem. Be di bebon yɛkɩ ma awi dikpilin.

9 Ɛwʋ gɛ Yowabi ɛ ka bɩtà bʋʋ bɛtàlɛ gɛtɛ ɛ kalan fɔ baasɔ e be wùlà egyu. E wura bɛnɩ asepekyi akpilin anyɔɔ (800,000) ye Isareli gɛtɛ baà talɩ bɛ san akpa. Gɛ e wura bɛnɩ asepekyi dikpilin ma ton (500,000) e ye Yuda.

10 Mɔ gɛtɛ Dafidi ɛ kalan bɛnɩ fɔ e were fɔ, woturu wʋ gbɛrɛ wɔ. Gɛ Dafidi ɛ dɔ̀ Yahwe alan, <<Na mɛ ade-kpen-dɩrɛ yema ade gɛtɛ na mɛ lɛ yii koro. Yahwe, n fɔ wɔ̀ gɛ, ka nmɩ aasaranyan maade-kpen kyɛ mɩ, yema na mɛ anyimapu-de.>>

11 Pɛ Dafidi ɛ̀ bɛ lama tɔ gagyɩgyan-fuu fɔ, Yahwe ɛ wɛrɛ tabʋrʋ ma wɔtabʋrʋlɛ Gadi gɛtɛ è di ewelɛ tɛ Dafidi fɔ alan, 12 <<San ma dɔ̀ Dafidi alan, <Nmɩ Yahwe alɛ, ǹ de geten-tiira akpen asiyee ntɛ sɩ̀ aa bʋnʋn. Tiri yaanɩ wʋkɩ fɔ nan yɛ wʋ wàà ba aa koro.> >>

13 Okoro Gadi ɛ san Dafidi wakʋn gɛ ɛ ma lila wɔ alan, <<Aa len dɩkpan dàà ba aa gɛtʋnkwaa gii koro bɩkyan bisiyee? Abɛɛ, aa len gɛtɛ àà serenti ye aa bɛkyʋnlɛ baakʋn bebon besiyee ɔkʋna gɛtɛ ɛbɛ mɔ bɛ kpa bɛ gyaga aa koro? Abɛɛ aa len gɛtɛ gyerebi ɛ̀ɛ̀ nʋ̀n aa gɛtʋnkwaa gii koro awi asiyee? Okoro sa waamɩnlɛ fɔ àà dɔ̀ mɩ anlɛ gɛtɛ nan biri n ma dɔ̀ ɛwɔ gɛtɛ ɛ sa mɩ fɔ.>> 14 Gɛ Dafidi ɛ dɔ̀ Gadi alan, <<Ade fɔ powu ì di ade ma gɩsaa tɛ mɩ. Yɛ tɩ tàà nʋ̀n Yahwe walɔ yaanɩ, yema wo gutunkoro gɩ̀ sɔ. Mɔ kara yɛ tɩ tàà nʋ̀n bɛnɩ-nyalɛ baalɔ yaanɩ.>>

15 Okoro Yahwe ɛ yɛ gyerebi ɛ nʋ̀n Isareli gɛtʋnkwaa gii koro ye gagyɩgyan gɩtɔkɔ ma sere ɔkʋna gɛtɛ ɛ sɩ̀. Gɛ bɛnɩ gɛtɛ be ku ye Dan ma sere Beeseba fɔ, bɛ ba asepekyi asiyee ma ɩgbaa ton (70,000) 16 Gɛtɛ Wurubwarɛ wɔsalɛ ɛ tʋna wɔ gʋlɔ gɛtɛ ɛ̀ɛ̀ mɩna Yerusalem fɔ, Yahwe e foma wamɩnlɛ ma giten gii getiira gɛtɛ gɩɩ tama bɛ fɔ. Gɛ ɛ dɔ̀ wɔsalɛ gɛtɛ ee wolo bɛnɩ fɔ alan, <<Ten! Wʋ kʋtɩ gɛlɛ!>> Fɔ Yahwe wɔsalɛ fɔ è yela Yebusi-te Arawuna wanaabi yii getibakʋn.

17 Gɛtɛ Dafidi e we Wurubwarɛ wɔsalɛ gɛtɛ ee wolo bɛnɩ fɔ, ɛ dɔ̀ Yahwe alan, <<Nmɩ na mɛ ade-kpen gɛ na mɛ ade gɛtɛ ɩn kɔlɔ. Mɔ nyabɛ bɩrɛ, bè di gɛ bɛyɛran, anʋn gɛ bɛ mɛ? Tiira gɛ nmɩ, ma mɩɩn dɩkpaara dɩɩ bɛnɩ giten.>>

Dafidi e sere gedi gɩɩ gɛtɛ̀kʋn

18 Duwi dɩtɔkɔ daanɩ fɔ Gadi ɛ san Dafidi wakʋn, gɛ ɛ dɔ̀ wɔ alan, <<Bʋn san gatala, fɔ àà ma sere gedi gɩɩ gɛtɛ̀kʋn tɛ Yahwe, Yebusi-te Arawuna wanaabi yii getibakʋn fɔ gaanɩ.>> 19 Okoro Dafidi ɛ bʋn ɛ da anlɛ gɛtɛ Yahwe ɛ dama Gadi wo koro ɛ dɔ̀ fɔ. 20 Gɛtɛ Arawuna ɛ nya gɛ e we egyu fɔ ma wɔ bɛnɩ gɛtɛ bɛɛ ba wakʋn fɔ, ɛ gbɛrɛ e ye okòro gɛ e kura egyu bɩsɩrɩ baanɩ ɛ ka wɔ bʋnʋn e tin gɛtʋnkwaa.

21 Gɛ Arawuna ɛ dɔ̀ alan, <<Anʋn na ba gɛ miinfonte egyu aa ba nmɩ aasaranyan maakʋn lɛ?>>

Dafidi e tiri wuunyun alan, <<Na ba nan be siye aanaabi yii getibakʋn fɔ, fɔ nan talɩ n mara gedi gɩɩ gɛtɛ̀kʋn n tɛ Yahwe, fɔ wàà yɛ gyerebi gɛtɛ ɛ nʋn bɛnɩ fɔ boo koro fɔ èè ten.>> 22 Ɛwʋ gɛ Arawuna ɛ dɔ̀ Dafidi alan, <<Miinfonte egyu, ka gɩnyan-kamasɛ gɛtɛ gii di wɔ gʋnʋn fɔ tɛ Yahwe gedi. Nya Bɛkwɔ-teni n yela lɛ, ka bɛ tɛ gekuma gii gedi, gɛ anaabi yii getibakʋn fɔ ɩ lɛ fɩya ma iyon gɛtɛ bɛɛ sa bɛkwɔ be-tiira fɔ, àà ka yɩ mɛ bʋtan. 23 Arawuna ɛ ka yɩ powu ɛ tɛ egyu fɔ, gɛ ɛ dɔ̀ wɔ alan, <<Yahwe aa Wurubwarɛ ɛ nʋn aanyun-tiri.>>

24 Mɔ egyu fɔ e tiri wuunyun ɛ tɛ Arawuna alan, <<Kwa, nan le wɔ̀ anyan fɔ yii gutoro. Mɩn nan tɛ Yahwe miin Wurubwarɛ gekuma gii gedi gɛtɛ mɩn nan le gɩnyankɩ.>>

Okoro Dafidi ɛ ka gɛ sɩka-fututu abi akpilin anyɔɔ ma fwo (50) e siye anaabi yii getibakʋn ma bɛkwɔ-teni fɔ. 25 Dafidi e sere gedi gɩɩ gɛtɛ̀kʋn ɛ tɛ Yahwe dʋkɔ, gɛ ɛ tɛ wɔ gekuma ma olila yii gedi. Ɛwʋ gɛ Yahwe ɛ nʋn gɛtʋnkwaa fɔ giinyun-tiri, gɛ ɛ yɛ gyerebi gɛtɛ nafɔ ɛ̀ sa Isareli fɔ e ten.