1 Gɛ Dafidi e lila alan, <<Ɛnɩ ɛkɩ e ni kuruma Sawulo dɩkpaara, gɛtɛ nan tiri miin gelen n wùlà wɔ Yonatan wo koro?>> 2 Ɔkʋna wʋtɔkɔ fɔ, Sawulo dɩkpaara dɩɩsaranyan ɛkɩ ɛ sara gɛtɛ bee kpèlè wɔ alɛ Siba. Be kpèlè wɔ bɛ mɔma Dafidi, gɛ e lila wɔ alan, <<Awɔ n di Siba?>> Gɛ e yera alan, <<Ɩɩn.>>

3 Gɛ Dafidi e lila wɔ alan, <<Ɛkɩ en mini kuruma Sawulo dɩkpaara, gɛtɛ nan tiri Wurubwarɛ gelen n wùlà wɔ?>> Gɛ Siba e tiri wuunyun ɛ tɛ egyu Dafidi alan, <<Yonatan wobi-teni ɛkɩ gɛtɛ è di ɔtagasɩ fɔ n sa.>>

4 Ɛwʋ gɛ Egyu-dɩrɛ Dafidi e lila wɔ alan, <<Ganɩ gɛ ɛ̀ sa?>> Gɛ Siba e tiri wuunyun alan, <<Ɛ̀ sa Lo-Deba ditele, Amile wobi Makiri dɩkpaara.>>

5 Gɛ Egyu-dɩrɛ Dafidi ɛ sa bɛnɩ Lo-Deba ditele, Amile wobi Makiri dɩkpaara, gɛ bɛ ma ka wɔ bɛ ba.

6 Gɛtɛ Yonatan wobi Mefiboseti gɛtɛ è di Sawulo wɔnana ɛ ba Dafidi wakʋn fɔ, ɛ waran e kura gebù gaanɩ. Gɛ Dafidi e kpèlè wɔ alan,<<Mefiboseti!>> Gɛ Mefiboseti e yera wɔ alan, <<Miinfonte!>>

7 Gɛ Dafidi ɛ dɔ̀ wɔ alan, <<Kara yɛ gɩsaa gàà ton wɔ̀, yema nan nyɩ n tiri gɩnɩ-gelen n wùlà wɔ̀, aate Yonatan wo koro. Nan birima ntʋnkwaa gɛtɛ bu di aatu Sawulo woyo fɔ powu n tɛ wɔ̀. Gɛ aà di ma nmɩ mɩɩnkpʋlɔ wuu koro ɔya-kamasɛ.>> 8 Gɛ Mefiboseti ɛ waran e kura gɛ ɛ dɔ̀ alan, <<Ɛnyan gɛ nmɩ aasaranyan ǹ di, gɛ a kʋna nmɩ gɛtɛ n we anlɛ ɛkpɛɛ-kulɛ lɛ miin koro?>> 9 Ɛwʋ gɛ Egyu-dɩrɛ Dafidi e kpèlè Sawulo wɔsaranyan Siba, gɛ ɛ dɔ̀ wɔ alan, <<Ǹ de gɩnyan-kamasɛ gɛtɛ gì di Sawulo ma wɔ dɩkpaara dɩɩ bɛnɩ powu booyo fɔ ntɛ tɛ aafonte wɔnana. 10 Awɔ ma aa bebi, ma aa bɛsaranyan yaà fʋn gɛtʋnkwaa fɔ, fɔ yàà ka anyandilɛ ɩ bɛ tɛ wɔ, fɔ aafonte wɔnana èè wura anyandilɛ. Mɔ Mefiboseti, aafonte wɔnana fɔ bɩrɛ, eè ti di gɛ mɩɩnkpʋlɔ wuu koro.>> Fɔ Siba ɛ̀ ba bebi-teni fwo-ton, ma bɛsaranyan dikpilin. 11 Ɛwʋ gɛ Siba ɛ dɔ̀ Egyu-dɩrɛ Dafidi alan, <<Miinfonte, nmɩ aasaranyan nan mɛ ade-kamasɛ gɛtɛ a dɔ̀ mɩ fɔ.>> Okoro Mefiboseti e di egyu Dafidi wɔkpʋlɔ wuu koro anlɛ egyu bebi-tenibi fɔ. 12 Fɔ Mefiboseti ɛ̀ ba ebi-teni gɛtɛ bee kpèlè wɔ alɛ Mika. Gɛ Siba dɩkpaara dɩɩ bɛnɩ powu be biligi Mefiboseti bɛsaranyan. 13 Okoro Mefiboseti ɛ sara Yerusalem, yema ee di gɛ egyu Dafidi wɔkpʋlɔ wuu koro ɔya-kamasɛ. Mɔ Mefiboseti è di gɛ ɔtagasɩ.