1 Ai ka mɛn sɛbɛ Alla la dinmali sɔnɔmɛ rɔ, n badenmailu, n tɛ a fɛ ai ye to ko lɔnbaliya rɔ. 2 Ai ye a lɔn ko ai tɛrɛ lemɛniyabaliya rɔ waati mɛn na, ai bilanin tɛrɛ jooilu le kɔfɛ mɛnilu tɛ kumala. 3 Wo le rɔ, n ye a fɔla ai yɛ ko, mɔɔ si ye kumala Alla la Nii Sɛniman baraka rɔ, wo ti se a fɔla ko, «Isa ye danka.» Mɔɔ ti se a fɔla fanan ko, «Maari le Isa ri,» Alla la Nii Sɛniman kɔma.

4 Alla la Nii Sɛniman kelen pe le a ri, kɔni a la sɔlifen su ka siya. 5 Maari kelen pe le a ri, kɔni mɔɔilu ye baarala a yɛ ɲa siyaman. 6 Baara su ka siya, kɔni Alla kelen de woilu bɛɛ dafala mɔɔilu bɛɛ rɔ. 7 Alla ka a kɛ ka a la Nii Sɛniman nabɔ gbɛma mɔɔ kelen kelenna bɛɛ fɛ kosa jama bɛɛ ye a tɔnɔ sɔrɔn. 8 Mɔɔ do ye waliji kelaya sɔrɔnna Alla la Nii Sɛniman baraka le rɔ. Mɔɔ gbɛrɛ ye lɔnnin kelaya sɔrɔnna Alla la Nii Sɛniman baraka le rɔ. 9 Mɔɔ gbɛrɛ ye lemɛniya sɔrɔnna Alla la Nii Sɛniman baraka le rɔ. Mɔɔ gbɛrɛ ye dandannin sebaya sɔrɔnna wo Nii Sɛniman kelen baraka le rɔ. 10 Mɔɔ gbɛrɛ ye kabannako kɛ sebaya sɔrɔnna, mɔɔ gbɛrɛ ye nabiya kumailu sɔrɔnna, gbɛrɛ ye fanka juuilu ni Alla fanka dannafara bɔla, gbɛrɛ ye kan su gbɛrɛilu sɔrɔnna, gbɛrɛ fanan ye kan gbɛrɛilu lataminna. 11 Kɔni ale Alla la Nii Sɛniman kelen de wo bɛɛ kɛla. Ale le mɔɔ kelen kelenna bɛɛ sɔla ikomin a ye a fɛ ɲa mɛn ma.

12 Nba, Ɲenematɔmɔnin kɛnin de ikomin faribanku kelen kɔni fan siyaman ye a ma. Kɔni hali a fanilu ka siya, faribanku kelen de a ri. 13 Baa an bɛɛ sunnin ji rɔ Alla la Nii Sɛniman kelen de baraka rɔ, ka an don faribanku kelen dɔ, Judiyailu ni Kirɛkiilu, jɔnilu ni hɔrɔilu, Alla ra Nii Sɛniman kelen di an bɛɛ ma.

14 Faribanku ladannin tɛ sɔrɔmaɲa kelen di kɔni sɔrɔmaɲa siyaman ye a ma. 15 Ni sen ka a fɔ ko, «Nde tɛ faribanku rɔ, baa n kɛnin tɛ bolo ri,» wo tɛ a bɔ fari ma. 16 Ni tolo ka a fɔ ko, «Nde tɛ faribanku rɔ, baa n kɛnin tɛ ɲa ri,» wo tɛ a bɔ fari ma. 17 Ni faribanku bɛɛ kɛra ɲa le dɔrɔn di, ko tɛrɛ mɛnna di wo rɔ? Ni faribanku bɛɛ kɛra tolo le dɔrɔn di, fen suma tɛrɛ mɛnna di wo rɔ? 18 Kɔni Alla ra faribanku sɔrɔmaɲa bɛɛ ɲabɔ ikomin a ye a fɛ ɲa mɛn ma. 19 Ni a bɛɛ tɛrɛ kɛra fen kelen pe ri, faribanku tɛrɛ tola min? 20 A ye ɲa mɛn ma ten, sɔrɔmaɲa ka siya kɔni faribanku kelen de.

21 Wo le rɔ, ɲa ti se a fɔla bolo ma ko, «N mako ti i la.» Kun tɛ a fɔ senilu ma ko, «N mako tɛ ai la.» 22 A ka jan wo la. Hali fanka tɛ faribanku fan mɛnilu la, ii lɔdiya ye ye. 23 Hali fari fan mɛnilu mamaloyanin ka tamin fari fanilu bɛɛ la, an ye woilu masidila gbiliya rɔ kosɛbɛ. Fari fan mɛnilu ma kan ka yen, an ye yɔrɔ woilu sutura doilu ko. 24 Kɔni faribanku fan mɛnilu mamaloyanin tɛ, woilu mako tɛ wo la. Alla jɛrɛ ra an faribanku fanilu ɲabɔ, ka gbiliya di faribanku fanilu ma a dɛsɛnin tɛrɛ mɛnilu ma, 25 kosa faribanku kana latalan, kɔni sɔrɔmaɲa fanilu bɛɛ ye ii janto ii ɲɔɔn ko. 26 Ni faribanku fan do ye tɔrɔya rɔ, faribanku fan tɔ bɛɛ ri tɔrɔ a fɛ. Ni fan kelen ka gbiliya sɔrɔn, doilu bɛɛ ri sɛwa a fɛ.

27 Nba, aile le Ɲenematɔmɔnin faribanku ri. A sɔrɔmaɲa fan do le ai kelen kelenna bɛɛ ri. 28 Lemɛniya jama rɔ, Alla ka talibidenba le lasii lɔdiya fɔlɔ rɔ, a filana kelalaselailu, a sawana karanmɔɔilu, a ni kabannako kɛ mɔɔilu, ni mɛnilu sɔnin mɔɔ dandalila dinmalifen dɔ, a ni dɛmɛnnin kɛ dinmalifen, ni ɲɛmɔɔ dinmalifen a ni mɛnilu ye kumala kan gbɛrɛilu rɔ. 29 Bɛɛ ti kɛ talibidenba ri, wala kelalaselailu wala karanmɔɔilu wala kabannako kɛ mɔɔilu 30 wala mɔɔ mɛn sɔnin dandannin kɛ ma wala kan gbɛrɛ fɔ wala kan natamin. 31 Kɔni, ai ye kunfan dinmalifen fisamantɛilu kɔfɛ. Sisɛn n ye sila fisamantɛ le yiraka ai la. Wo le ten: