1 I kana mɔɔba lali jaman dɔ, kɔni a lali ikomin i fa le a ri, a ni kanberenilu fanan ikomin i dɔɔniilu le ii ri, 2 a ni musokɔrɔilu fanan ikomin i na, a ni sunkurunilu fanan ikomin i dɔɔmusoilu sɛninya bɛɛ rɔ.

3 I ye cɛsamusoilu gbiliya a gbengben mɛnilu ye tola kelenya rɔ. 4 Kɔni ni denilu wala mamarenilu cɛsamuso ye mɛnilu bolo, woilu ye ii la Alla lɔn yiraka ii la denbayailu le fɔlɔ la, ka ii janto ii rɔ, ka ii la mɔɔbailu sara ii la waliɲuma kɔrɔilu la, baa wo le duman Alla yɛ. 5 Kɔni cɛsamuso mɛn ye kelen di, a jii lani Alla rɔ, wo ye tola Alla matarala le su ni tele. 6 Kɔni cɛsamuso mɛn bilanin a jɛrɛ diyanan koilu kɔfɛ, hali a ye a nii la, a faanin de a ri. 7 I ye ii jamari wo la kosa ii ye kɛ mɔɔ ri sɔn juu tɛ mɛn na. 8 Ni mɔɔ ma a wara mɔɔilu dɛmɛn katarabi a la denbaya ma, wo ra a ban lemɛniya rɔ. Wo tii juuman lemɛniyabali ri.

9 Cɛsamuso mɛn tɔɔ ka kan ka sɛbɛ lemɛniya jama cɛsamusoilu tɔɔ tɛma fɔɔ mɛn da san biwɔɔrɔ (60) sɔrɔn, a ni mɛn siini tɛrɛ cɛɛ kelen kun ma, 10 mɛn lɔnnin a la baara ɲumailu fɛ den kolo rɔ wala londan jiya a wara wala jama sɛniman sen mako rɔ* wala mɔɔ tɔrɔniilu dɛmɛn ko wala bila ko baara ɲuma bɛɛ rɔ.

11 Kɔni cɛsamuso mɛnilu ma kɔrɔya i kana woilu tɔɔilu sɛbɛ baa ii diyanan koilu ri se ii lasɛla Ɲenematɔmɔnin kɔfɛ, furu lɔɔ ri ii mira. 12 Wo rɔ, ii ri kiti labe ii jɛrɛ kan baa ii ra ii la lahidi tani fɔlɔ tiɲan. 13 Ka la wo kan, ii dorini tɛ foyi kɛla, ka wa bon ni bon na, ka to mɔɔilu mafɔla, ka nafiya la baarabaliya kan, ka ko fɔ mɛnilu ma kan ka fɔ. 14 Wo le rɔ, n ye cɛsamuso sunkurunilu lalila ko ii ye sii cɛɛ bon nasii rɔ, ka denilu sɔrɔn, ka ii janto ii la denbaya rɔ, kosa ii kana fɛrɛ si di an juu ma a ye kuma juu fɔ. 15 Ka a masɔrɔn cɛsamuso doilu ra sila bila sisɛn, ka bila Setana kɔfɛ. 16 Kɔni ni cɛsamuso doilu ye lemɛniya muso do la denbaya rɔ, a ka kan ka woilu dɛmɛn. Woilu kana kɛ lemɛniya jama donin di, kosa lemɛniya jama ye se cɛsamusoilu dɛmɛnna mɛnilu toni cɛɛtanya rɔ.

17 Lemɛniya jama mɔɔba mɛnilu lɔni jama ɲɛrɔ koɲuma, woilu dahani ka kunnafulen siidiyama fila le sɔrɔn, a gbengben mɛnilu ye kawandili kɛla, a ni mɛnilu ye mɔɔilu karanna. 18 Ka a masɔrɔn Kitabu ka a fɔ ko, «I wa nisi lɔ suman dɔn na, i kana a da sidi.» A ye a fɔla fanan ko, «Baaraden dahani ka a sara sɔrɔn.»* 19 Ni mɔɔilu ka lemɛniya jama mɔɔba do tɔɲɔ, i kana i tolo malɔ fɔɔ ni sereya fila wala sawa ra bɔ a ma. 20 Mɛnilu ra hakɛ kɛ, woilu sɔn ye fɔ bɛɛ ɲakɔrɔ, kosa doilu fanan ye silan.

21 N da i jamari Alla ni Isa Ɲenematɔmɔnin ni mɛlɛka suwandininilu ɲakɔrɔ, ko i ye ko ɲinilu mira. I kana mɔɔ si lafisaya ii ɲɔɔn ko i kɛwaliilu rɔ. 22 I kana gbɛrɛn i bolo lala mɔɔilu ma Alla matara rɔ ii lɔ ko la Alla la baara la, a ni i kana wa doilu la hakɛ kɔfɛ. To i la sɛninya rɔ.

23 I kana to ji gbansan minna, kɔni i ye rɛsɛnji dɔɔnin basan a la i kɔnɔ la ko rɔ, a ni i ye jankarɔla waati bɛɛ.

24 Mɔɔ doilu julumunilu ye yenna le sani ii ye se kiti yɔrɔ. Doilu tailu ye lɔnna ii kɔma le. 25 A ye wo ɲa le ma, baara ɲumailu ye lɛnkɛnɛmayala le hali mɛnilu ma kɛ gbɛ ma, woilu ti se dokonna.