44 Etiyɛn ka a fɔ ko: «An benbailu tɛrɛ ye wula kɔndɔ taamanna tuma mɛn na, Alla la teriya tɔɔmasere daa makɛ faaninbon tɛrɛ ye ii bolo. Musa tun ka faaninbon wo ladan ikɔ Alla ka a fɔ a yɛ ɲa mɛn ma. Alla ka mɛn yiraka a la, a ka a ladan ka a ni wo ra kanya. 45 Daa makɛ faaninbon wo tɛrɛ ye an benbailu la denilu bolo ii la waati rɔ. Ii ni Josuwe le ka jamana bɛɛ mira, Alla ka jamana wo mɔɔilu gbɛn ii ɲɛfɛ. Ii nara daa makɛ faaninbon di jamana rɔ, a mɛnda ye haan an mansa Dawuda tele rɔ. 46 Dawuda la ko diyara Alla yɛ. Ale le ka Alla madiya ko a ye a fɛ ka sii diya lɔ Yakuba Alla yɛ. 47 Kɔni Dawuda dencɛ mansa Sulemani le ka bon wo lɔ Alla yɛ.

48 «Kɔni Alla Kɔrɔtaninba tɛ a siila bon na, mɛn lɔni adamaden bolo. A ye ikomin keladen fisamante ka a fɔ ɲa mɛn:

49 ‹Allabatala ka a fɔ ko: Sankolo le ye n na mansaya siifen de ri.

Duukolo ye n sen lɔ yɔrɔ le ri.

A ye di? Ai ri bon su ɲuman lɔ nde yɛ?

N siibon di kɛ yɔrɔ ɲuman?

50 Fen ɲinilu bɛɛ danni tɛ nde le bolo wa?›»