1 Farisiilu ka a mɛn ko Isa ye karandenilu sɔrɔnna ka tamin Yaya kan, ko a ye karandenilu sunna ji rɔ ka tamin Yaya la fanan. 2 (Kɔni Isa jɛrɛ tɛ mɔɔilu sunna ji rɔ; a la karandenilu le ye mɔɔilu sunna ji rɔ.) 3 Isa kɛni wo kalema, a bɔra Jude mara rɔ, ka a kɔsɛ Kalile. 4 A taatɔla Kalile, a ka kan ka Samari mara ratɛɛ.

5 A sera Samari so do kɔndɔ, so wo tɔɔ le Sikari. A tɛrɛ ye Yakuba la sɛnɛ tɔrɔfɛ, a ka mɛn di a dencɛ Yusufu ma. 6 Awa, yɔrɔ wo rɔ Yakuba la kɔlɔn ye ye. Isa a tɛrɛ ra kɔri taaman na. A ka i sii kɔlɔn da la, tele tala waati.

7 Samarika muso do nara ji ta diya. Isa ka a fɔ a yɛ ko: «N sɔ ji rɔ n ni n min.» 8 (A la karandenilu tun da wa so kɔndɔ dɔɔnninta santa ɲinin diya.) 9 Samarika muso ka a fɔ Isa yɛ ko: «Nfenna ile, Judiya cɛɛ, ri n maɲininka ko n ye i sɔ ji rɔ, nde mɛn ye Samarika muso ri?» A damira ye mɛn di Judiyailu ni Samarikailu mako tɛ i ɲɔɔn na. 10 Isa ka a jabi: «Ni i ka Alla la sanba lɔn a ni mɛn ye a fɔla i yɛ ko: ‹n sɔ ji rɔ n ni n min,› ile tun da a maɲininka, a ni a tun da ji don i bolo, ɲenemaya ji kɔnin.» 11 Muso ka a fɔ: «N maari, jilafɛ si tɛ i bolo ka ji ta mɛn na kɔlɔn kɔndɔ, baa kɔlɔn da jiinin ba le. Ji mɛn ye ɲenemaya dila mɔɔ ma, wo sɔrɔnna min? 12 Ile, i ka bon ka tamin an benba Yakuba la, an buruju mɛn ka kɔlɔn ɲin di an ma? A ni a dencɛilu ni a la kolofenilu tɛrɛ ye ji minna kɔlɔn ji ɲin de la.»

13 Isa ka a jabi: «Ni mɔɔ ka imin ji ɲin na, ji lɔɔ ri a mira fanan, 14 kɔni n ye ji mɛn dila, ni mɔɔ mɔɔ ka wo ji min, ji lɔɔ tɛ wo tii mira butun fewu. Baa ji wo ri kɛ ikomin tenke a kɔndɔ ka ɲenemaya banbali di a ma.» 15 Muso ka a fɔ a yɛ ko: «Maari, ji wo di n ma. Wo wa kɛ ji lɔɔ tɛ n fanan mira. N mako ti bilala kɔlɔn ji ɲin na butun.» 16 Isa ka a fɔ a yɛ ko: «I ye wa i furucɛ kili ka na yan sisɛn.» 17 Muso ka a jabi: «Furucɛ ti n bolo.» Isa ka a fɔ a yɛ: «I jo ye a rɔ ka a fɔ ko: ‹Furucɛ ti n bolo.› 18 A damira ye mɛn di i ra furucɛ mɔɔ loolu sɔrɔn. Cɛɛ mɛn ye i bolo sisɛn, i la cɛɛ tɛ wo ri. I ka tuɲa le fɔ.»

19 Awa, muso ka a fɔ: «N maari, n da a ɲayen ko i ye keladen fisamante le ri. 20 Ande Samarikailu, an burujuilu ka Alla bato koyinkɛ ɲin kan. Kɔni aile Judiyailu ka a fɔ ko a fɛrɛ tɛ fo mɔɔilu ye Alla bato Jerusalɛmu le. A ye di wo rɔ?» 21 Isa ka a fɔ a yɛ ko: «Ai ye la nde la, waati natɔ ai ti Fa batola koyinkɛ ɲin kan, wala Jerusalɛmu. 22 Aile Samarikailu, ai ye fen batola ai ma fen mɛn lɔn. Andeilu, Judiyailu, an ye fen de batola, an ka fen wo lɔn, ka a masɔrɔn kisi ko bɔni Judiyailu le rɔ. 23 Awa, waati natɔ kɔnin, a ra se an ma, Alla batola bɛrɛ bɛrɛ ri Fa bato a sɔnɔmɛ ɲuma la a ni tuɲa la, baa Fa ye mɔɔ wo ɲininna mɛn di kɛ a batola bɛrɛ bɛrɛ ri. 24 Alla ye Nii le ri, mɛn bɛɛ ye a batola ii ka kan ka a bato sɔnɔmɛ ɲuma la a ni tuɲa la.» 25 Muso ka a fɔ Isa yɛ ko: «N ka a lɔn ko Mɔɔ Suwandinin natɔ, mɛn ye kilila Mɔɔ Ɲenematɔmɔnin. A wa na, a ri a bɛɛ ɲafɔ an yɛ.» 26 Isa ka a jabi: «Nde mɛn ye kumala i yɛ ɲin di.»

27 Waati wo la a la karandenilu kɔsɛtɔla le tɛrɛ. Ii kabannakoyara ka Isa yen kumala Samarika muso yɛ. Kɔni, mɔɔ si ma a maɲininka ko: «I ye nfen kɛla wa?» Ni wo tɛ, «Nfenna i ye kumala muso ɲin yɛ?» 28 Awa, muso ka a la jitafen bila yɔrɔ wo rɔ i kɔrɔkɔrɔ, ka i kɔsɛ so kɔndɔ. A ye taminna a fɔla mɔɔilu yɛ ko: 29 «Ai ye na a ragbɛ. N da ɲɔɔn bɛn cɛɛ do la, a ka a fɔ n yɛ n da fosi kɛ, a ka wo bɛɛ ɲafɔ. A ye Mɔɔ Ɲenematɔmɔnin de ri, wo rɔ wa?» 30 Mɔɔ ye bɔla so fan bɛɛ rɔ ka na Isa ma.

31 Waati wo rɔ, Isa la karandenilu ka a madiya ko: «Karanmɔɔ, dɔɔnnin kɛ.» 32 Kɔni Isa ka a fɔ ii yɛ ko: «Damunin fen do ye n bolo ai ma mɛn lɔn.» 33 Wo rɔ, a la karandenilu tɛrɛ ye i ɲɔɔn maɲininkala ko: «Mɔɔ le nara dɔɔnninta di a ma wa?»

34 Isa ka a fɔ ii yɛ ko: «N balo ye mɛn di: mɛn ka n nana n ye wo sawo kɛ, fo n ye wo kɛ ka a ban. 35 Ai ye a fɔla fanan ko: ‹Yani karo naanin, ko suman nadan waati le wo ri›, kɔni nde ye a fɔla ii yɛ ko: Ai ɲa lɔ. Ai ye suman tɔnsɔn mafɛne sɛnɛ rɔ. Suman ka waati ra se. 36 Mɛn ye suman kala, wo ye a sara sɔrɔnna sisɛn. Ii ye mɛn nadɛnna, woilu ri ɲenemaya banbali sɔrɔn ten. Wo rɔ, sifoyila ni sumankala ri sɛwa i ɲɔɔn fɛ. 37 Nba, tuɲa le sanda wo ri: ‹Do ye foyili kɛla dogbɛrɛ ri na sumanka kɛ.› 38 N da ai lana sumanka diya mɛn ma baara kɛ fɔlɔ. Doilu ra baara kɛ, a ni ai ra tɔnɔ sɔrɔn woilu la baara la.»

39 Nba, Samarika muso wo wara sereya bɔ sokɔndɔ mɔɔilu yɛ ko: «N ka ko mɛn kɛ kɔrɔman, cɛɛ wo ka wo bɛɛ fɔ n yɛ.» Wo le kosɔn, Samarika siyaman lemɛniyara Isa ma. 40 Wo le rɔ, Samarikailu nara Isa tɛrɛn ye tuma mɛn na, ii ka a madiya ko a ye waati do kɛ ii wara. Isa sɔnda ka tele fila kɛ ii wara ye. 41 Nba, mɔɔ siyaman gbɛrɛilu lemɛniyara a ma a jɛrɛ la kumakan kosɔn. 42 Ii ka a fɔ muso yɛ ko: «Fɔlɔfɔlɔ an lemɛniyara a ma i la kumakan de ma gbansan, kɔni sisɛn an da a la kuma lamɛn fanan ka la a la. An lani a la ko tuɲa le. An ka lɔn ko a ye Kisiba le ri, mɛn di se dunuɲa bɛɛ kisila.»

43 Tele fila taminnin kɔ rɔ Isa bɔra yɔrɔ wo rɔ ka a wa Kalile. 44 (A jɛrɛ ka kuma ɲin sereya ko Alla la keladen fisamante tɛ bonyanin a jɛrɛ la jamana kɔndɔ.) 45 Kɔni ni Isa sera Kalile, Kalilekailu ra a labɛn kun yɛ. Nba ii ra wa Jerusalɛmu Taminkunna Sali kɛ diya, wo rɔ ii tun ka a yen Isa ka ko mɛnilu kɛ.

46 Isa ka a kɔsɛ Kana, Kalile mara rɔ. A tun ka ji yɛlɛman so mɛn kɔndɔ ka a kɛ rɛsɛnji ri. Ɲɛmɔɔ tɔnɔman dencɛ ma kɛndɛ Kapɛrinahumu so kɔndɔ. 47 Ɲɛmɔɔ wo tɛrɛ ye kuma mɛnna ko Isa ra na ka bɔ Jude mara rɔ ka na Kalile mara rɔ. Wo rɔ a wara ka wa Isa tɛrɛn ka a madiya ko a ni na Kapɛrinahumu ka a dencɛ lakɛndɛya, ka a masɔrɔn a faatɔla le tɛrɛ. 48 Isa ka a fɔ ko: «Na ai ma tɔɔmasere yen, fen mɛn ye kabannako ri, ai ti lala n na.» 49 Ɲɛmɔɔ wo ka a fɔ ko: «N maari, na n wara, sani n dencɛ ye faa.» 50 Isa ka a fɔ a yɛ ko: «Wa i wara. I dencɛ ra kɛndɛya.» Cɛɛ wo lara Isa la kuma la ka i kɔsɛ.

51 A tɛrɛ ye silala tuma mɛn na a la jɔnilu nara a kun kɔrɔ bɛn. Ii ka a fɔ a yɛ ko: «I dencɛ kɛndɛ le tɛrɛ.» 52 Ɲɛmɔɔ ka ii maɲininka ko: «A kɛndɛyara waati ɲuman?» Ii ka a jabi: «Kunun tele tala ra tamin waati kelen ɲɔɔnna a fari sumara.» 53 A fa hankili bilara ko Isa ka kuma fɔ a yɛ waati wo le la ko: «I dencɛ ra kɛndɛya.» Ɲɛmɔɔ lara Isa la, a ni a la denbaya bɛɛ.

54 Nba, Isa ka tɔɔmasere kabannako filana wo kɛ Kalile a bɔ kɔ rɔ Jude.