1 Kibaro ɲuma mɛn ye Alla Dencɛ Isa Ɲenematɔmɔnin na ko fɔla, wo damira le ɲin di. 2 Awa, a sɛbɛnin Esayi la kitabu kɔndɔ ko:

«Nde Alla, n di n na keladen nawa i ɲɛ,

mɛn di sila rabɛn i yɛ.

3 Cɛɛ do ye a kan ba labɔla wula kɔndɔ ka a fɔ ko:

Ai ye sila rabɛn Maari yɛ,

ka silailu latelen a yɛ.»

4 Nba, Yaya wulira mɔɔilu sunna ji rɔ wula kɔndɔ. A tɛrɛ ye mɔɔilu kawandila ka ii lalɔnnin ko ii ka kan ka ii kɔnkɔ don ii hakɛilu la ka sun ji rɔ, sa Alla ri ii la hakɛilu makoto.

5 Mɔɔ siyaman ba tɛrɛ ye bɔla Jude mara rɔ, a ni Jerusalɛmu so kɔndɔ, ka wa Yaya kɔfɛ. Ii wa ii lɔ ii la hakɛilu la, Yaya ri ii sun ji rɔ Juridɛn Ba rɔ. 6 Durukiba mɛn tɛrɛ Yaya kan na, wo tɛrɛ ɲɔɔmɛ si le ri. A tɛsidinin tɛrɛ gbolojulu la. A tɛrɛ tonkasailu ni waa rɔ li le dɔɔnna. 7 A tɛrɛ mɔɔilu kawandila ko: «Mɔɔ mɛn natɔ n kɔ, wo fanka ka bon n ta ri. Hali ka n birin ka a la sanbara julu fulen a yɛ, wo ka bon nde ma. 8 N di ai sun ji rɔ, kɔni ale ri ai sun Alla Nii Sɛniman dɔ.»

9 Wo waati rɔ, Isa nara ka bɔ Nasarɛti so kɔndɔ, mɛn ye Kalile mara rɔ. Yaya ka a sun ji rɔ Juridɛn Ba rɔ. 10 Isa bɔtɔla ji rɔ, a ka sankolo da lakanin yen, ka Alla Nii Sɛniman fanan jiitɔla yen a kan ikomin kanba. 11 Kumakan do bɔra sankolo rɔ ko: «I ye n diyanan dencɛ le ri. I la ko duman ba le n yɛ.»

12 Awa, Alla Nii Sɛniman ka Isa lawa wula kɔndɔ i kɔrɔ. 13 A ka tele binaanin (40) kɛ wula kɔndɔ, Setana ye a kɔrɔbɔla. Waarɔ soboilu fanan tɛrɛ ye ye. Mɛlɛkailu tɛrɛ a mako ɲala.

14 Nba, Yaya bila kɔ kaso la, Isa wara Kalile mara rɔ ka kibaro ɲuma lase mɔɔilu ma, kibaro ɲuma mɛn faranin Alla la. 15 A tɛrɛ a fɔla mɔɔilu yɛ ko: «Alla ka waati mɛn natɛɛ, wo ra se. Alla la mansaya ra madon ai la. Wo le kosɔn, ai ye tubi ai hakɛilu ma, ka la kibaro ɲuma la.»

16 Lon do rɔ, Isa tɛrɛ taamanna Kalile Dala dafɛ. A ka Simɔn a ni a dɔɔcɛ Andere yen. Ii tɛrɛ ye jɛɛmira jɔɔ lafilila dala kan ji rɔ, ka a masɔrɔn ii tɛrɛ sɔmɔnɔ le ri. 17 Isa ka a fɔ ii yɛ ko: «Ai ye na ai bila n kɔfɛ. N di ai karan mɔɔ ɲininna ka a lana Alla ma ikomin ai ye jɛɛ sɔmɔnna ɲa mɛn ma.» 18 Ii ka ii la jɔɔilu to ye ka ii bila Isa kɔfɛ i kɔrɔ.

19 Isa taminnin yɔrɔ wo la dɔɔnin, a ka Yakuba ni a dɔɔcɛ Yuhana yen, mɛn tɛrɛ Sebede dencɛilu ri. Ii siinin tɛrɛ ii la jɔɔilu rabɛnna ii la kulun kɔndɔ. 20 Isa ka ii kili i kɔrɔ. Ii ka ii fa ni baaradenilu to kulun kɔndɔ ka ii bila Isa kɔfɛ.

21 Wo kɔ rɔ, Isa ni a la karandenilu wara Kapɛrinahumu so kɔndɔ. Ɲɔɲɔ Lon senin, Isa donda salibon na ka mɔɔilu karan. 22 A la karanɲa ka mɔɔilu kabannakoya, baa a ka ii karan ikomin se ye mɛn bolo. A ma ii karan ikomin sariya karanmɔɔilu ye ii karanna ɲa mɛn ma. 23 Wo waati jɛrɛ rɔ, cɛɛ jenatɔlamɔ do wulira salibon kɔndɔ ka a kɛ kule ri ko: 24 «Ɛɛ, Isa Nasarɛtika! I ye nfen kɔ an tɛma yan? I nanin an halaki kan de ma wa? I ye mɔɔ mɛn di, n ka wo lɔn: Alla la Mɔɔ Sɛniman de i ri.» 25 Isa jamanda jena ma ka a fɔ a yɛ ko: «I makun! Bɔ cɛɛ wo fɛ!» 26 Jena ka cɛɛ wo layɛrɛyɛrɛ kojuuya, ka kule ba kɛ, ka bɔ a fɛ. 27 Mɔɔ bɛɛ kabannakoyara fɔɔ ka a fɔ i ɲɔɔn yɛ ko: «Nfen de ɲin di? Karan kura le, se ye mɛn yɛ. A ye jamarili dila hali jenailu ma. A wa mɛn fɔ ii yɛ, ii ye wo labatola.» 28 Isa tɔɔ bɔra Kalile mara yɔrɔ bɛɛ rɔ jonna.

29 Wo kɔ rɔ, Isa ni a la karandenilu bɔra salibon kɔndɔ ka wa Simɔn ni Andere wara. Yakuba ni Yuhana tɛrɛ ye ii malɔla. 30 Simɔn biranmuso lanin tɛrɛ, farikalaya ye a la. Ii ka a ko fɔ Isa yɛ. 31 Isa ka a madon a la, ka a mira a bolo ma ka a lawuli. Farimakaliya ka a bila. A wulira ka dɔɔnnin di ii ma.

32 *Nba, wura dafɛ, tele be kɔrɔ, so mɔɔilu nara jankarɔtɔilu ri Isa tɔrɔfɛ, a ni jenatɔla mɔɔilu bɛɛ. 33 So kɔndɔ mɔɔilu bɛɛ ka ii ladɛn bonda la. 34 Isa ka jankarɔtɔ siyaman nakɛndɛya mɛn tɛ jankarɔ su kelen di. A ka jenailu gbɛn mɔɔ siyaman fɛ fanan. Kɔni a ma sɔn jena woilu ye kuma, baa ii ka a lɔn a ye mɔɔ mɛn di.

35 Nba, wo lon duu sa gbɛ sɔɔma da la jonna, ka a tɛrɛn kɛnɛ ma bɔ fɔlɔ, Isa wulira. A bɔra bon na ka wa Alla matara diya wula kɔndɔ. 36 Simɔn ni a duɲɔɔilu wara Isa ɲinin diya. 37 Ii ka a yen tuma mɛn na, ii ka a fɔ a yɛ ko: «Mɔɔ bɛɛ ye i diya ɲininna.» 38 Isa ka ii jabi: «An ye bɔ yan ka wa yan naminin soilu la, sa n di ye mɔɔilu fanan kawandi. Baa n nanin wo le kanma.» 39 Wo rɔ a wara Kalile mara fan bɛɛ rɔ. A ka mɔɔilu kawandi salibonilu kɔndɔ, ka jenailu gbɛn ka ii bɔ mɔɔilu fɛ fanan.

40 Lon do rɔ, *kunatɔ do nara ka a ɲɔnkin Isa kɔrɔ, ka a madiya ko: «Ni a duman i yɛ, i ri se n nadahala.» 41 Cɛɛ kininkinin donda Isa rɔ. Isa ka a bolo maa a la ka a fɔ a yɛ ko: «N da sɔn. I ye daha.» 42 Kuna ka cɛɛ wo bila i kɔrɔkɔrɔ. A dahara. 43,44 Isa ka a fɔ a yɛ ka a magbɛlɛnya ko: «I ye a kɛ koɲuma, i kana wo ko fɔ mɔɔ si yɛ. Wa, Alla la sarakalasela ye i mafɛnɛ. Wo wa ban, Musa ka saraka mɛn fɔ, i ye wo bɔ ka a yiraka bɛɛ la ko i ra kɛndɛya.» Wo fɔ kɔ rɔ, Isa ka sila di cɛɛ ma i kɔrɔ.

45 Cɛɛ bɔra ye ka wa. Kɔni ko mɛn kɛra a yɛ, a ka wo lakali damira fan bɛɛ rɔ. Wo le ka a kɛ, Isa ma se donna so gbɛrɛ si kɔndɔ butun. A tɛrɛ tola wula le kɔndɔ. Wo bɛɛ ni a ta, mɔɔilu tɛrɛ ye bɔla fan bɛɛ rɔ ka wa a tɛrɛn ye.