1 Nba, Isa bɔ mɛn kɛnin Alla batobonba jin kɔndɔ, a la karanden do ka a fɔ a yɛ ko: «Karanmɔɔ, a ragbɛ! Alla batobonba lɔnin kabakudun dagbɛlɛn bailu le la! A bonilu ka ɲin ba le!» 2 Isa ka a jabi: «I ɲa ye bon ba mɛnilu la ten, lon do rɔ ɲin bɛɛ ri te, ka a kabakudunilu bɛɛ jɛnsɛn ka a bɔ i ɲɔɔn kan.»

3 Ka Isa siinin to Olibiye Koyinkɛ kan ka a ɲasin Alla batobonba la, Piyɛri ni Yakuba ni Yuhana ni Andere nara a maɲininka diya ii dan na. 4 Ii ka a fɔ ko: «Karanmɔɔ, i kan ye ko mɛnilu ma, woilu ri kɛ waati ɲuman? Tɔɔmasere su ɲuman di a yiraka ko waati wo ra se?»

5 Isa ka ii jabi: «Ai ye ai janto ai jɛrɛ rɔ sa mɔɔ si kana ai lafili. 6 Mɔɔ siyaman di na n tɔɔ rɔ, ka a fɔ ko: ‹Nde le.› Ii ri mɔɔ siyaman nafili wo rɔ. 7 Ni a fɔra ai ɲana ko kɛlɛ kɛnin yɔrɔ do rɔ, wala ko kɛlɛ kuma wa lamɛn, wo kana bara ai rɔ ka ai masilan. Fɔɔ ko woilu ye kɛ, kɔni wo tɛna kɛ dunuɲa laban di fɔlɔ. 8 Siya ri wuli siya gbɛrɛ kanma. Mansayala do ri wuli dogbɛrɛ kanma. Duukolo yɛrɛyɛrɛ ri kɛ yɔrɔ doilu rɔ. Kɔnkɔ bailu fanan di don. Ko woilu ye tɔrɔya damira le ri, ikomin tinkɔnɔdimin ye muso moyitɔla mirala ɲa mɛn ma.

9 «Nba, ai ye ai janto ai jɛrɛ rɔ. Mɔɔilu ri ai mira ka wa ai ri jamana kititɛɛlailu wara. Mɔɔilu ri ai gbasi gbiɲɛ la Judiyailu la salibonilu kɔndɔ. Mɔɔilu ri wa ai ri jamana ɲɛmɔɔilu ni mansailu wara ka a masɔrɔn ai ye n ta ri. Wo ri kɛ sababu ri ai ri kɛ n sere ri ii ɲana. 10 Fɔlɔ, fɔɔ kibaro ɲuma ye lase siyailu bɛɛ ma.

11 «Mɔɔilu wa ai mira ko ii watɔ ai ri kititɛɛ diya, ai ri mɛn fɔ ye, ai kana hamin wo la fɔlɔ. Kuma wa di ai ma waati wo jɛrɛ rɔ, ai ye wo fɔ. Baa ai tɛ nala kumala ai kelen na. Ɛɛn de, Alla Nii Sɛniman di kumailu don ai da rɔ.

12 «Mɔɔ ri a badenma don mɔɔilu bolo kosa ii ri a faa. Fa fanan di wo ɲɔɔn kɛ a den na. Mɔɔilu ri kɛ ii sɔrɔnbailu juuilu ri ka kɛ sababu ri mɔɔilu ri woilu faa. 13 Ai ri gboya mɔɔilu bɛɛ yɛ n tɔɔ kosɔn. Kɔni mɔɔ mɛn wa a muɲun fɔɔ a laban, wo tii ri kisi.

14 «Ai ri Fen Haramunnin yen, wo mɛn gboman Alla yɛ kojuuya. A ma kan ka kɛ yɔrɔ mɛn dɔ, ai ri a lɔnin ye yen. (Mɛnilu ye sɛbɛ ɲin karanna, fɔɔ ii ye wo famun.) Ni waati wo sera, mɔɔ mɛnilu ye Jude mara rɔ, woilu ye ii bori ka wa koyinkɛilu kan. 15 Ni waati wo ka mɔɔ mɛn tɛrɛn bon kun bilinin kan, wo tii kana jii ka don bon kɔndɔ ko a ye fen do tala. 16 Wo wa mɔɔ mɛn tɛrɛn sɛnɛ rɔ, wo tii kana a kɔsɛ a wara ko a ye a la durukiba tala. 17 Waati wo la, muso kɔnɔmailu ri tɔrɔ kosɛbɛ, a ni muso denba tiilu. 18 Ai ye Alla matara, sa ko woilu ti nala kɛla nɛnɛ tuma rɔ. 19 Baa lon woilu kɔrɔ, tɔrɔya ri gbɛlɛnya kojuuya. Wo ɲɔɔn ma kɛ fɔlɔ kɛbi Alla ka dunuɲa dan waati mɛn na fɔɔ ka na se bi ma. A don tɔrɔya wo ɲɔɔn tɛ nala kɛla butun. 20 Ni Maari tun ma a latɛɛ ka tɔrɔya waati wo lasudunya, mɔɔ si tun tɛ nala bɔla a rɔ. Kɔni a ra a latɛɛ ka waati wo lasudunya a la mɔɔ suwandininilu la ko kosɔn. 21 Wo tuma, ni mɔɔ do ka a fɔ ko Ɲenematɔmɔnin ye yan, wala a ye ye, ai kana la a la. 22 Baa wuyafɔlailu ri wuli, mɛnilu wa a fɔ ko ii ye Ɲenematɔmɔnin de ri, wala Alla la keladen fisamante. Woilu ri tɔɔmasereilu ni kabannakoilu kɛ, sa a ri Alla la mɔɔ suwandininilu lafili, ni wo ri se kɛla. 23 Wo rɔ, ai ye a kɛ koɲuma. N da woilu bɛɛ fɔ ai yɛ sani ii ye kɛ.

24 «Nba, waati wo la, tɔrɔya woilu taminnin kɔ, tele ri fin, karo ti nala kɛnɛ bɔla butun. 25 Loloilu ri bebe ka bɔ sankolo rɔ. Sankolo kɔndɔ fankatiilu ri juujuu ka bɔ ii nɔ rɔ. 26 Wo tuma, ii ri Mɔɔ Dencɛ natɔla yen duru rɔ sebaya ba la, a ni nɔɔrɔ. 27 A ri a la mɛlɛkailu kelaya ka wa telebe ni telebɔ rɔ, a ni tele kankan bolomaran ni tele kankan bolokinin dɔ, ka a la mɔɔ suwandininilu ladɛn. Ii ri woilu ladɛn ka a bɔ dunuɲa kun do la fɔɔ ka wa se a kun do fanan na.

28 «Ai ye toroju lakɔrɔsi. Ai wa a bolonilu yen naronna ka fira kurailu labɔ, ai ri a lɔn ko sama ra wuli donna. 29 Wo ɲa kelen ma, ni ai ka ko ɲinilu kɛtɔla yen tuma mɛn na, ai ri a lɔn ko wo waati ra sudunya, fɔdiya a ra se. 30 N di tuɲa fɔ ai yɛ: sani bi mɔɔilu ye ban sala, ko ɲinilu bɛɛ ri ban kɛla. 31 Lon do rɔ, sankolo ni duukolo ri ban ka tunun fewu. Kɔni n na kuma tɛ tamin habadan!

32 «Ko ɲinilu ri kɛ waati mɛn na a ni lon mɛn na, mɔɔ si ma wo lɔn. Hali harijeene mɛlɛkailu a ni Alla Dencɛ jɛrɛ ma a lɔn, fɔɔ Fa Alla kelen pe. 33 Ai ye a kɛ koɲuma; ai ye to ai ɲana. Ai ma ko woilu kɛ waati lɔn.

34 Nba, a kɛnin ikomin cɛɛ mɛn watɔ taama rɔ. Cɛɛ wo ri bɔ bon na ka bonkɔndɔ koɲailu bɛɛ karifa a la jɔnilu la, bɛɛ ni a la baara. A ri a fɔ bonda la kɔrɔsiba yɛ ko a ye to a ɲana. 35 Wo le rɔ, ai fanan ye to ai ɲana, baa ai ma a lɔn bontii ri na waati mɛn. A ri na wura la, wala duu talama, wala dondon kasi waati, wala sɔɔma da la, ai ma wo lɔn. 36 A kana na bara ai rɔ ka ai tɛrɛn sunɔɔ rɔ. 37 N ye mɛn fɔla ai yɛ ɲin di, n ye wo fɔla mɔɔilu bɛɛ yɛ: ko ai ye to ai ɲana.»