1 Nba, Ɲɔɲɔ Lon taminnin kɔ, Mariyamu Makidalaka ni Salome a ni Yakuba na Mariyamu ka tulu sumaduman san ko ii watɔ wo kɛla Isa su kan. 2 Lahadi lon sɔɔma da la jonna, tele bɔ tumana, muso woilu ka sila mira ka wa kaburu dala. 3 Ii tun ka a fɔ i ɲɔɔn yɛ ko: «Yon di kabakudun ba makurukuru ka a bɔ kaburu da la?»

4 Kɔni ii ka kaburu ragbɛ tuma mɛn na, ii ka a yen ko kabakudun belebele ba, wo ra makurukuru ka bɔ kaburu da la. 5 Ii donnin kaburu kɔndɔ, ii ka kanberen do siinin yen ii bolokinin fan fɛ. Durukiba gbɛman ye a kan na. Ii silanda kosɛbɛ. 6 Kanberen wo ka a fɔ ko: «Ai kana silan. Ai ye Isa Nasarɛtika le ɲininna, mɛn gbɔngbɔnnin tɛrɛ jiri kan. A ra wuli! A tɛ yan. Ii ka a su la yɔrɔ mɛn dɔ, ai ye wo ragbɛ. 7 Ai ye wa a fɔ a la karandenilu yɛ a ni Piyɛri fanan yɛ ko a watɔ ai ɲɛrɔ Kalile. Ai ri a yen ye ikomin a ka a fɔ ai yɛ ɲa mɛn ma.»

8 Nba, musoilu bɔra kaburu kɔndɔ ka ii bori ka wa. Ii yɛrɛyɛrɛnin, ii kɔndafilinin kojuuya. Ii ma foyi fɔ mɔɔ si yɛ baa ii silannin.

9 *[Isa wulira ka bɔ saya rɔ lahadi lon sɔɔma da la jonna. A wulinin kɔ, a ka a jɛrɛ yiraka Mariyamu Makidalaka le fɔlɔ la, a tun ka jena wɔrɔnwula gbɛn ka a bɔ wo mɛn fɛ. 10 Mariyamu wo le wara kibaro wo bɛɛ fɔ Isa kɔmɔɔilu yɛ. A ka ii jusumakasanin tɛrɛn ye. Ii ye kasila. 11 Ii ka a mɛn tuma mɛn na ko Isa kɛndɛ, ko Mariyamu ka a yen, ii ma la wo la fewu.

12 Wo kɔ rɔ, ka Isa la karanden fila to taamanna waa rɔ, Isa ka a jɛrɛ yiraka ii la ɲa su gbɛrɛ ma. 13 Mɔɔ fila wo bɔra ye ka na wo kibaro fɔ karanden tɔilu yɛ. Kɔni woilu ma la ii fanan na.

14 Wo kɔ rɔ, ka talibidenba tan ni kelen to dɔɔnninna, Isa ka a jɛrɛ yiraka ii la. A ka ii jalaki ka a masɔrɔn ii tun ma lemɛniya, a ni ii kun janin tɛrɛ fanan. Baa mɛnilu ka a ɲenema yen a wuli kɔ ka bɔ saya rɔ, ii ma la woilu la kuma la. 15 A ka a fɔ ii yɛ ko: «Ai ye wa dunuɲa fan bɛɛ rɔ ka kibaro ɲuma lase mɔɔilu bɛɛ ma. 16 Ni mɔɔ mɛn lemɛniyara a ma ka sun ji rɔ, wo tii ri kisi. Kɔni ni mɔɔ mɛn ma lemɛniya a ma, Alla la kiti ri be wo tii kan. 17 Lemɛniya mɔɔilu ri tɔɔmasere mɛnilu yiraka, woilu le ɲin di: ii ri jenailu gbɛn ka bɔ mɔɔilu fɛ n tɔɔ rɔ. Ii ri kuma kan gbɛrɛilu rɔ, ii tun ma mɛnilu lɔn kɔrɔman. 18 Ii ri saailu mira ii bolo la. Ni ii ka dabaari min, a ti nala foyi kɛla ii la. Ii wa ii bolo la jankarɔtɔilu kan, jankarɔtɔilu ri kɛndɛya.»

19 Maari Isa banda wo fɔla ii yɛ tuma mɛn na, a kɔrɔtara ka wa sankolo rɔ, ka wa a sii Alla bolokinin ma.

20 Karandenilu bɔra ye kawandili kanma yɔrɔ bɛɛ rɔ. Maari ka ii dɛmɛn baara wo la, ka tɔɔmasereilu kɛ, mɛnilu ka a yiraka ko kuma wo ye tuɲa le ri.]