1 Tele dɔndɔ taminnin kɔ, Isa nara Kapɛrinahumu so kɔndɔ ikɔ tuun. Mɔɔilu ka a mɛn ko a ye bon na ye. 2 Ii siyaman nara ii ladɛn bon na fɔɔ lɔdiya ma sɔrɔn butun hali bonda la ye. Isa tɛrɛ ye Alla la kuma lasela ii ma. 3 Ka a to wo la, mɔɔ doilu nara cɛɛ kɔrɔngbɔbatɔ wo tɔrɔfɛ. Mɔɔ naanin de ka a ta. 4 Ii ma se ii madonna Isa la jama bolo. Wo rɔ, ii yɛlɛra bon kun bilinin kan ka wo do bɔ Isa sii diya san ma, ka ban ka cɛɛ kɔrɔngbɔbatɔ ni a lafen najii woo wo la. 5 Isa ka ii la lemɛniya yen tuma mɛn na, a ka a fɔ kɔrɔngbɔbatɔ yɛ ko: «N dencɛ, i hakɛilu ra makoto.»

6 Wo ka sariya karanmɔɔ doilu siinin tɛrɛn ye. Woilu ka a fɔ ii jɛrɛ kɔndɔ ko: 7 «Nfenna cɛɛ ɲin ye kumala ten? A ra Alla tanama kuma fɔ! Yon di se hakɛilu makotola ni Alla kelen tɛ?» 8 Isa ka ii miriya lɔn a jɛrɛ ma i kɔrɔ. A ka a fɔ ii yɛ ko: «Nfenna ai ye ai mirila ten? 9 A ye di? Ka a fɔ kɔrɔngbɔbatɔ yɛ ko: ‹I hakɛilu ra makoto›, wala: ‹I ye wuli ka i la lafen ta ka i taama›, wo fila rɔ ɲuman fɔ nɔman? 10 Nba, n di a yiraka ai la ko a se ye nde Mɔɔ Dencɛ yɛ ka hakɛilu makoto dunuɲa rɔ yan.» Wo rɔ, a ka a fɔ kɔrɔngbɔbatɔ yɛ ko: 11 «N ye a fɔ i yɛ ko: ‹I wuli ka i la lafen ta ka wa i wara.›»

12 Cɛɛ wo wulira ka a la lafen ta i kɔrɔ ka bɔ kɛnɛma mɔɔilu bɛɛ ɲana. Ii bɛɛ kabannakoyara ka a kɛ Alla tando ri ko: «An tun ma ɲin ɲɔɔn yen fɔlɔ fewu!»

13 Awa, Isa ka a kɔsɛ dala da la. Jama ba nara a tɛrɛn ye. A ka ii karan. 14 Awa, a tamintɔla, a ka cɛɛ do siinin yen *niisɔnkɔ mira diya. Alife dencɛ Lebi le wo ri. Isa ka a fɔ a yɛ ko: «I ye bila n kɔfɛ.» A wulira ka a bila Isa kɔfɛ.

15 Wo kɔ rɔ, Isa wara dɔɔnnin diya Lebi wara. Niisɔnkɔmirala siyaman ni kojuukɛla siyaman siinin tɛrɛ dɔɔnnin kɛla Isa ni a la karandenilu dafɛ, baa woilu siyaman bilanin tɛrɛ Isa kɔ. 16 Sariya karanmɔɔ doilu tɛrɛ ye ye, mɛnilu tɛrɛ Farisiilu ri. Woilu ka a yen tuma mɛn na ko Isa ye dɔɔnnin kɛla niisɔnkɔmiralailu ni kojuukɛlailu dafɛ, ii ka Isa la karandenilu maɲininka ko: «Nfenna ai la karanmɔɔ ye dɔɔnnin kɛla niisɔnkɔmiralailu ni kojuukɛlailu dafɛ?»

17 Isa ka mɔɔ woilu la kuma mɛn tuma mɛn na, a ka a fɔ ii yɛ ko: «Mɔɔ mɛnilu kɛndɛ, woilu mako tɛ dandalila la. Jankarɔtɔilu le mako ye dandalila la. N ma na telenbailu kili kanma. N nanin kojuukɛlailu le kili kanma.»

18 Nba, lon do rɔ, ka Yaya la karandenilu ni Farisiilu la karandenilu to sun dɔ, mɔɔ doilu nara Isa tɛrɛn ye ka a maɲininka ko: «Nfenna Yaya la karandenilu ni Farisiilu la karandenilu ye sun donna, kɔni ile la karandenilu tɛ wo kɛla?»

19 Isa ka ii jabi: «A ye di? Ka kɔɲɔcɛ to a teriilu dafɛ kɔɲɔmalɔ rɔ, kɔɲɔcɛ teriilu ri se sun donna wa? Ka kɔɲɔcɛ to ii dafɛ, ii ti se sun donna. 20 Kɔni lon do natɔ, mɔɔilu ri kɔɲɔcɛ bɔ ii tɛma. Wo lon, ii ri sun don.

21 «Mɔɔ tɛ faanin kura kunkundun ta ka faanin kɔrɔ labadi. Ni mɔɔ ka wo kɛ, faanin kura ri faanin kɔrɔ sɔmɔn ka a fara. A faraɲa wo ri juuya ka tamin fɔlɔmanta la. 22 Mɔɔ tɛ rɛsɛnji kura kɛla foroko kɔrɔ kɔndɔ. Ni mɔɔ ka wo kɛ, rɛsɛnji kura ri jidi ka kanka, ka foroko kɔrɔ fara. Rɛsɛnji ni foroko bɛɛ ri tiɲan. Ɔɔn, mɔɔ ri rɛsɛnji kura kɛ foroko kura le kɔndɔ.»

23 Ɲɔɲɔ Lon do rɔ, Isa ni a la karandenilu tɛrɛ ye taminna sɛnɛ do tɛma. Ii tamintɔla, a la karandenilu ka sɛnɛsuman tɔnsɔn doilu kadi damira. 24 Farisiilu ka a fɔ Isa yɛ ko: «A ragbɛ, nfenna i la karandenilu ye ko wo kɛla Ɲɔɲɔ Lon? Wo dahanin tɛ!»

25 Isa ka ii jabi: «A ye di? Mansa Dawuda ka mɛn kɛ fɔlɔfɔlɔ, ai ma wo karan wa? Kɔnkɔ tɛrɛ a ni a taamaɲɔɔilu la. Fen tun tɛ ii bolo. 26 Wo rɔ, Abiyatara tɛrɛ Alla la sarakalasela kuntiiya la waati mɛn na, Dawuda donda Alla la bon kɔndɔ ka buru ta ka a dɔɔn, buru mɛn bilanin Alla yɛ ye. A ka wo do di a taamaɲɔɔilu fanan ma. Kɔni ka a bɛn sariya ma, mɔɔ si ma kan ka buru wo dɔɔn ni Alla la sarakalaselailu tɛ.»

27 Wo kɔ rɔ, Isa ka a fɔ Farisi woilu yɛ ko: «Alla ka Ɲɔɲɔ Lon kɛ mɔɔ munanfan ko le ri. A ma mɔɔ dan Ɲɔɲɔ Lon na. 28 Wo le rɔ, nde Mɔɔ Dencɛ ye Ɲɔɲɔ Lon fanan kuntii le ri.»