1 Nba, Isa bɔra yɔrɔ wo rɔ ka wa a wara so kɔndɔ. A la karandenilu wara a malɔ diya. 2 Ɲɔɲɔ Lon senin, Isa wara mɔɔilu karan damira salibon na. A lamɛnbailu tun ka siya ye. Ii kabannakoyara ka a fɔ ko: «A ye ko mɛnilu fɔla ɲin di, a ka woilu karan min? Yon ka walijiya wo di a ma? A ye kabannako mɛnilu kɛla ɲin di, a ye woilu kɛla di? 3 Jiribaarala le tɛ wo ri wa? Mariyamu dencɛ le tɛ wa? A dɔɔcɛilu tɛ Yakuba ni Jose ni Juda ni Simɔn di wa? A nakelenɲɔɔ musoilu siinin tɛ an tɛma yan wa?» Ii la miriya wo le kɛra sababu ri Isa gboyara ii yɛ. 4 Isa ka a fɔ ii yɛ ko: «Mɔɔilu ye Alla la keladen fisamante bonyala yɔrɔ bɛɛ rɔ fɔɔ a jɛrɛ wara, a ni a badenmailu ni a la denbayailu tɛma.» 5 Isa ma se kabannako kɛla ye fɔɔ ka a bolo la jankarɔtɔ dɔndɔ kan ka ii lakɛndɛya. 6 Ye mɔɔilu ma sɔn lemɛniyala mɛn kɛ, wo ka a kabannakoya.

Wo kɔ rɔ, Isa tɛrɛ a taamataamala so wo laminin soilu la ka mɔɔilu karan. 7 Isa ka a la talibidenba tan ni fila kili ka ii kelaya mɔɔ fila fila. A ka jena gbɛn se di ii ma. 8 A ka a fɔ ii yɛ ko: «Ai kana foyi ta taama rɔ, fɔɔ ai la taama gbeleke. Ai kana dɔɔnninfen ta, wala bɔrɔ. Ai kana wodi bila ai kun. 9 Ai ye sanbara don ai sen dɔ, kɔni ai kana duruki kɔrɔbila fila bila ai kan na.»

10 A ka a fɔ ii yɛ ikɔ tuun ko: «Ni mɔɔ do ka ai jiya, ai ye to wo bolo fɔɔ ka se ai bɔ lon ma so wo kɔndɔ. 11 Ni so mɛn mɔɔilu ti nala sɔnna ka ai jiya, ni wo tɛ, ni ii ti nala sɔnna ai la kuma ma, ai ye bɔ ye. Ai bɔtɔla, ai ye gbangban bɔ ai sen ma. Wo ri kɛ sere ri ye mɔɔilu kanma ko ii ma ɲin.»

12 Nba, karandenilu bɔra ye ka wa mɔɔilu kawandi ko ii ye tubi ka na Alla ma. 13 Ii ka jena siyaman gbɛn ka ii bɔ mɔɔilu fɛ. Ii ka tulu dɔɔnin kɛ jankarɔtɔ siyaman kun dɔ ka ii lakɛndɛya.

14 Awa, Isa la ko fɔra mansa Herodi yɛ, baa Isa tɔɔ bɔnin fan bɛɛ rɔ. Mɔɔ doilu ka a fɔ ko: «Yaya ra wuli ka bɔ saya rɔ. Wo le ka a kɛ, sebaya ye a bolo ka kabannakoilu kɛ.» 15 Doilu ka a fɔ ko: «Eliya le a ri.» Doilu fanan ka a fɔ ko: «Keladen fisamante le a ri, mɛn ye fɔlɔfɔlɔ kelalaselailu do ɲɔɔn di.»

16 Kɔni Herodi ka ko woilu mɛn tuma mɛn na, a ka a fɔ ko: «Yaya mɛn kun tɛɛra a la n bolo, wo ra wuli ka bɔ saya rɔ!» 17 Baa Herodi le tun ka jamarili di a la mɔɔilu ma ko ii ye Yaya mira ka a sidi ka a bila kaso la. Herodi ka wo kɛ a kɔrɔcɛ Filipe muso le la ko kosɔn, mɛn tɔɔ ko Herodiyasi. Herodi tun ka wo furu. 18 Baa Yaya tora a fɔla a yɛ ko: «I kɔrɔcɛ muso ma kan ka sii i kun. Wo dahani tɛ!» 19 Yaya la ko gboyara Herodiyasi yɛ kojuuya. A lɔɔ tɛrɛ ye a la ka Yaya faa. Kɔni a ma ɲa sɔrɔn. 20 Baa Herodi silanni tɛrɛ Yaya yɛ. Wo rɔ, a tɛrɛ Yaya lakandanna koɲuma. A ka a lɔn ko Yaya ye mɔɔ telennin de ri, a ni mɔɔ sɛniman. A wa a tolo malɔ Yaya la, a hankili ri ɲaamin. Wo bɛɛ ni a ta, a la kumailu duman a yɛ.

21 Ka ii to wo la, Herodiyasi sawona lon sera. Herodi sɔrɔnlon sankunbɛn kɛra lon mɛn, a ka tolon ba rabɛn ka a la ɲɛmɔɔilu kili, a ni tɛsidi kuntiilu ni Kalile mɔɔbailu. 22 Ka mɔɔilu ladɛnnin to tolon diya, Herodiyasi denmuso donda tolon diya ka dɔn kɛ. A diyara Herodi ni a la mɔɔ makilini bɛɛ yɛ. Herodi ka a fɔ a yɛ ko: «I ye mɛn fɛ, i ye a fɔ. N di a di i ma.» 23 Herodi ka lahidi ta a yɛ ka a kali ko: «Ni i ka fen fen tara n na, n di a di i ma, hali ni a kɛra n na mansaya talantɛ ri.» 24 Sunkurun bɔra ye ka wa a na maɲininka ko: «N ka kan ka nfen de ɲinin a fɛ?» A na ka a jabi: «A fɔ ko a ye Yaya kun di i ma.»

25 Sunkurun ka a kaliya ka a kɔsɛ Herodi ma i kɔrɔ. A ka a fɔ a yɛ ko: «N ye a fɛ i ye Yaya kun di n ma muran do kan sisɛn sisɛn.» 26 Kuma wo ka mansa niilafin kosɛbɛ. Kɔni a tun tɛ a fɛ ka a ban sunkurun na kuma ma. Baa a tun da ban a kalila a la mɔɔ makiliniilu bɛɛ ɲana. 27 Wo rɔ, a ka a la kuntɛɛla do kelaya i kɔrɔ ko a ye wa Yaya kun tɛɛ a la ka na a ri. Cɛɛ wo wara kaso bon na ka Yaya kun tɛɛ a la. 28 A ka kun wo bila muran do kan ka na a di sunkurun ma. Sunkurun wara a di a na ma. 29 Yaya la karandenilu ka a faa ko mɛn tuma mɛn na, ii wara a su ta ka wa a sutura.

30 Nba, Isa tun ka talibidenba mɛnilu kelaya, woilu ka ii kɔsɛ ka na Isa tɛrɛn. Ii tun ka ko mɛnilu bɛɛ kɛ, a ni ii tun ka mɔɔilu karan ɲa mɛn ma, ii ka wo bɛɛ dantɛɛ Isa yɛ. 31 Wo tuma, mɔɔ siyaman tɛrɛ taa ni sɛ kɛla. Wo bolo ma, Isa ni a la karandenilu ma dɔɔnnin fɛrɛ sɔrɔn. Wo rɔ, Isa ka a fɔ karandenilu yɛ ko: «An ye bɔ yan ka wa an dan na wula kɔndɔ. Ai ri ai ɲɔɲɔ dɔɔnin ye.»

32 Wo le rɔ, ii donda kulun do kɔndɔ ka dala tɛɛ, ka wa ii dan na wula kɔndɔ. 33 Kɔni mɔɔ siyaman ka ii watɔla yen kulun kɔndɔ, ka a lɔn ko iile le ye. Wo rɔ, ii bɔra ye soilu bɛɛ la ka ii bori ka wa se Isa ni karandenilu wa diya.

34 Isa bɔra kulun kɔndɔ tuma mɛn na, a ka jama ba yen ye. Ii kininkinin donda a rɔ, baa ii kɛnin a ɲana ikomin saailu, gbɛngbɛnna tɛ mɛnilu la. A ka ii karan damira fen siyaman na. 35 Awa, ka a tɛrɛn su kotɔla le, a la karandenilu ka ii madon a la ka a fɔ a yɛ ko: «A ragbɛ, an ye wula le kɔndɔ yan. Su kotɔla le. 36 I ye sila di jama ma sa ii ri wa dɔɔnnifen san yan naminin bondailu la, a ni so mɛsɛnilu kɔndɔ.» 37 Isa ka ii jabi: «Ai jɛrɛ ye dɔɔnnin di ii ma.» Ii ka a fɔ ko: «An di se wo la di? I ye a fɛ an ye wa *6.37 Waati wo rɔ wodi gbanan kɛmɛ fila (200) wo tɛrɛ ye mɔɔ kelen karo seyin baara sara le riwodi gbanan kɛmɛ fila (200) le san buru la ka a di jama ma wa?» 38 Isa ka ii maɲininka ko: «Buru yɛli ye ai bolo? Ai ye wa a ragbɛ.» Ii wara ka na a jabi: «Burukala loolu ye yan, a ni jɛɛ fila.»

39 Wo rɔ a ka a fɔ ii yɛ ko ii ye mɔɔilu kuru kuru lasii duu ma bin kɛndɛ kan. 40 Mɔɔilu ka ii sii mɔɔ kɛmɛ kɛmɛ (100), doilu fanan ka ii biloolu loolu sii kɛ (50). 41 Isa ka burukala loolu ni jɛɛ fila ta, ka a ɲa layɛlɛ sankolo rɔ ka baraka bila Alla yɛ. A ka buru rakadikadi, ka a di a la karandenilu ma ko ii ye a ratala jama tɛma. A ka jɛɛ fila wo fanan ratala jama bɛɛ tɛma wo ɲa kelen ma. 42 Mɔɔ bɛɛ ka dɔɔnnin kɛ ka ii fa. 43 Jama bannin dɔɔnninna, Isa la karandenilu ka buru ni jɛɛ kunkundun tɔilu ladɛn, ka see tan ni fila lafa wo la. 44 Jama mɛn ka dɔɔnnin wo kɛ, cɛɛ waa loolu (5,000) tɛrɛ ye a rɔ.

45 Wo kɔ rɔ, Isa ka a fɔ a la karandenilu yɛ i kɔrɔ ko ii ye don kulun kɔndɔ. Ii ye dala tɛɛ ka wa a ɲɛfɛ Bɛtisayida so fan fɛ. Ale watɔ sila dila jama ma. 46 Nba, Isa wara sila di jama ma, ka ban ka wa Alla tara diya koyinkɛ do kan. 47 Su kora ka karandenilu to kulun kɔndɔ dala tɛma. Isa kelen pe ye gbelema. 48 A ka a yen ko karandenilu ra sɛɛ kosɛbɛ kulun borila, baa fɔɲɔ ye ii kunbɛnna. Dondon kasi waati ɲɔɔn, Isa ka a taama ji kan ka wa ii kɔfɛ. A sera ii ma ka a kɛ ikomin a ye taminna ii la. 49 Kɔni karandenilu ka a taamatɔla yen ji kan tuma mɛn na, a kɛra ii ɲana ikomin su kɔrɔ do jiya le. Ii wulira ka a kɛ kule ri, 50 baa ii bɛɛ ka a yen ka silan kojuuya. A kumara ii yɛ i kɔrɔ. A ka a fɔ ko: «Ai ye ai jusulatɛɛ! Nde le. Ai kana silan!»

51 Wo kɔ rɔ, a donda ii fɛ kulun kɔndɔ. Fɔɲɔ ka a lɔ. Karandenilu kabannakoyara fɔɔ ka ii kɔnda ban. 52 Baa Isa tun ka buru lasiyaya kabannako mɛn kɛ, ii tun ma wo kɔrɔ famun fɔlɔ. Ii hankili datununnin tɛrɛ.

53 Nba, ii ban mɛn kɛnin dala tɛɛla, ii sera Kɛnesarɛti mara rɔ. Ii ka kulun nalɔ dala dala ye. 54 Ii bɔ mɛn kɛnin kulun kɔndɔ dɔrɔn, ye mɔɔilu ka Isa lɔn. 55 Ii ka ii bori ka wa mara fan bɛɛ rɔ. Ni ii ka a mɛn ko Isa ye yɔrɔ mɛn, ii ri wa jankarɔtɔilu ri lafen kan ye. 56 Isa wa wa yɔrɔ yɔrɔ, so bailu ni so mɛsɛnilu ni bondailu bɛɛ, mɔɔilu ri na jankarɔtɔilu ri ka ii la lɔɔfɛ rɔ, ka a madiya ko a ye sɔn ii ye ii maa a la duruki dakun gbansan na. Jankarɔtɔ mɛnilu ka ii maa a la, woilu bɛɛ kɛndɛyara.