1 Wo lon wo rɔ, jama ba nara ii ladɛn ikɔ tuun. Dɔɔnninfen tun tɛ ii bolo. Wo rɔ, Isa ka a la karandenilu kili ka a fɔ ii yɛ ko: 2 «N kininkininnin jama ɲin ma. Dɔɔnninfen si tɛ ii bolo yan, ka a masɔrɔn ai ra tele sawa kɛ n dafɛ yan. 3 Ni n ka sila di ii kɔnkɔtɔ ma ko ii ye wa ii wara, ii fanka ri dɛsɛ sila la. Baa ii doilu bɔ diya ka jan.» 4 A la karandenilu ka a jabi: «An di buru sɔrɔn min wula kɔndɔ yan, mɛn di jama ɲin bɔ?» 5 Isa ka ii maɲininka ko: «Burukala yɛli ye ai bolo?» Ii ka a fɔ ko: «Burukala wɔrɔnwula.»

6 A ka a fɔ jama yɛ ko ii ye ii sii duu ma. Wo kɔ rɔ, a ka burukala wɔrɔnwula wo ta ka baraka bila Alla yɛ, ka a rakadikadi ka a di a la karandenilu ma ko ii ye a ratalan jama la. Ii ka buru ta ka a ratalantalan jama tɛma. 7 Jɛɛ mɛsɛnnin dɔndɔ fanan tɛrɛ ye ii bolo. Isa ka baraka bila Alla yɛ woilu la, ka a fɔ karandenilu yɛ ko ii ye wo fanan ratalantalan jama la. 8 Mɔɔilu bɛɛ ka dɔɔnnin kɛ ka ii fa. Buru kunkundun ni jɛɛ tɔ mɛn tonin, Isa la karandenilu ka see wɔrɔnwula lafa wo la. 9 Mɔɔ mɛnilu ka dɔɔnnin kɛ, woilu tun di mɔɔ waa naanin (4,000) ɲɔɔn bɔ. Awa, Isa ka sila di ii ma ko ii ye wa. 10 A ni a la karandenilu donda kulun do kɔndɔ i kɔrɔ, ka wa Dalimanuta mara rɔ.

11 Farisiilu nara ka Isa sɔsɔ damira. Ii ka a fɔ ko a ye tɔɔmasere kabannako do kɛ, mɛn di a yiraka ko Alla le a fɛ. Ii ka wo fɔ a kɔrɔbɔ kanma. 12 Isa ka a nilakili lajii bakɛ, ka a fɔ ko: «Nfenna bi mɔɔilu ye tɔɔmasere kabannako ɲininna? N di tuɲa fɔ ai yɛ: ko tɔɔmasere si tɛ yiraka bi mɔɔilu la.» 13 A bannin wo fɔla, Isa ka ii to ye. A donda kokura kulun kɔndɔ ka wa dala kɔma.

14 Karandenilu ɲinara, ii ma buru ta. Foyi tun tɛ ii bolo kulun kɔndɔ fɔɔ burukala kelen pe. 15 Isa ka a fɔ ii yɛ ka a magbɛlɛnya ko: «Ai ye a kɛ koɲuma. Farisiilu ni Herodi kana kɛ ai bolo ikomin lɛbɛn.» 16 Karandenilu ka a fɔ i ɲɔɔn yɛ ko: «Buru tɛ an bolo yan. Wo le ka a kɛ, a ka kuma wo fɔ.»

17 Isa ka ii miriya wo lɔn. Wo rɔ, a ka a fɔ ii yɛ ko: «Nfenna ai ye a fɔla ko buru tɛ ai bolo? Hankili tɛ ai la ka koilu famun fɔlɔ wa? Ai hankili datununnin wa? 18 Ɲa ye ai ma, ai ti yennin kɛla wa? Tolo ye ai ma, ai tɛ mɛnnin kɛla wa? Ai hankili tɛ bilala fen kɔ wa? 19 N ka burukala loolu rakadikadi waati mɛn na ko ai ye wo di mɔɔ waa loolu (5,000) ma, ai ka see yɛli le lafa buru kunkundun tɔ la?» Ii ka a fɔ ko: «See tan ni fila.» 20 A ka a fɔ ko: «N ka burukala wɔrɔnwula rakadikadi waati mɛn na ko ai ye wo di mɔɔ waa naanin (4,000) ma, ai ka see yɛli le lafa buru kunkundun tɔ la?» Ii ka a fɔ ko: «See wɔrɔnwula.» 21 A ka a fɔ ii yɛ ko: «A ye di? Ai ma a ɲayen fɔlɔ wa?»

22 Awa, Isa ni a la karandenilu sera Bɛtisayida so kɔndɔ. Mɔɔ doilu nara ɲa funyen do ri Isa ma ka a madiya ko a ye a bolo la a kan ka a lakɛndɛya. 23 Isa ka ɲa funyen mira a bolo ma ka bɔ so kɔndɔ a ri. A ka daji mun ɲa funyen ɲa la, ka a bolo la a kan, ka ban ka a maɲininka ko: «I ye fen doilu yenna sisɛn wa?» 24 Cɛɛ ka a ɲa layɛlɛ ka yennin kɛ. A ka a fɔ ko: «N ɲayen mɔɔilu la. Ii kɛnin ikomin jiriilu le, mɛnilu ye taamataamala.» 25 Isa ka a bolo birin a ɲa la ikɔ tuun. Cɛɛ ɲa lakara. A kɛndɛyara. A ka fen bɛɛ yen koɲuma. 26 Isa ka sila di a ma ko a ye wa a wara. Ko kɔni a kana don so kɔndɔ.

27 Awa, Isa ni a la karandenilu ka sila mira ka wa Sesare Filipi laminin soilu rɔ. Ka ii to sila kan, Isa ka ii maɲininka ko: «Mɔɔilu ye nde jatela yon di?» 28 Ii ka a jabi: «Doilu ka a fɔ ko i ye Yaya le ri. Doilu ka a fɔ ko i ye Eliya le ri. Dogbɛrɛilu ka a fɔ ko keladen fisamante kelen de i ri.» 29 A ka ii maɲininka ko: «Ai don? Ai ye n jatela yon di?» Piyɛri ka a fɔ ko: «I ye Alla la Mɔɔ Ɲenematɔmɔnin de ri.» 30 Isa ka a fɔ ii yɛ ka a magbɛlɛnya kosɛbɛ ko ii kana wo fɔ mɔɔ si yɛ.

31 Wo kɔ rɔ, Isa ka a kɛ a la karandenilu karan di. A ka a fɔ ko Mɔɔ Dencɛ ri tɔrɔ kosɛbɛ. Mɔɔbakɔrɔilu ni Alla la sarakalasela kuntiilu ni sariya karanmɔɔilu ri ii ban a rɔ ka a faa. Kɔni tele sawana lon a ri wuli saya rɔ.»

32 Isa ka ko wo fɔ ka a gbɛ. Wo rɔ, Piyɛri ka a kili ka a mabɔ talibidenba tɔilu la dɔɔnin, ka a makuma damira. 33 Kɔni Isa ka a tiliminnin tuma mɛn na ka a la karandenilu ragbɛ, a ka Piyɛri makuma ko: «Ile, Setana. Bɔ n kɔrɔ! Baa Alla sawo ye mɛn di, i tɛ i mirila wo ma, fɔɔ mɔɔilu sawo.»

34 Wo kɔ rɔ, Isa ka jama ni a la karandenilu kili ka a fɔ ii yɛ ko: «Ni mɔɔ mɛn ye a fɛ ka a bila n kɔ, fɔɔ wo tii ye a ban a jɛrɛ rɔ ka a gbɔngbɔn jiri mira ka a jɛrɛ bila n kɔ. 35 Baa mɔɔ mɛn ye a fɛ ka a nii lakisi, wo tii ri bɔnɔ. Kɔni ni mɔɔ mɛn bɔnɔra a nii rɔ nde ni kibaro ɲuma kosɔn, wo tii ri a jɛrɛ nii lakisi. 36 A ye di? Ni mɔɔ ka dunuɲa bɛɛ sɔrɔn ka bɔnɔ a nii rɔ, dunuɲa sɔrɔn ka nfen ɲa a ma wo rɔ? 37 Mɔɔ ri se nfen dila ka a nii kunka? 38 Bi mɔɔilu muruntini Alla kanma. Ii ye kojuukɛlailu le ri. Awa, ni mɔɔ do maloyara nde la a ni n na kumailu la mɔɔilu ɲakɔrɔ mɛnilu ye kojuukɛlailu ni muruntiilu ri, wo tii la ko ri nde Mɔɔ Dencɛ maloya wo lon, n wa na n Fa nɔɔrɔ rɔ mɛlɛka sɛnimanilu fɛ lon mɛn na.»