Mateus 14

Yaya faa ɲa

1 Nba, wo waati rɔ, mansa Herodi*14.1 Herodi ɲin de tɛrɛ ye Kalile jamanatiiya la. ka Isa la ko mɛn. 2 A ka a fɔ a la baaradenilu yɛ ko: «Yaya le ɲin di. A ra wuli ka bɔ saya rɔ. Wo le ka a kɛ, sebaya ye a bolo ka kabannakoilu kɛ.»

3 Nba, mansa Herodi tun da Yaya mira ka a sidi ka a bila kaso la. A ka wo kɛ a kɔrɔcɛ Filipe muso la ko le kosɔn, mɛn tɔɔ ko Herodiyasi, 4 baa Yaya tora a fɔla a yɛ ko: «Muso wo ma kan ka sii i kun. Wo dahanin tɛ!» 5 Herodi tun ye a fɛ ka Yaya faa, kɔni a silannin tɛrɛ jama yɛ, baa jama tɛrɛ ye Yaya jatela keladen fisamante le ri. 6 Herodi la sɔrɔn kunɲɔɔ, ii ka tolon kɛ. Herodiyasi denmuso ka dɔn kɛ mɔɔilu tɛma tolon diya ye. Wo diyara Herodi yɛ kosɛbɛ. 7 Wo rɔ, a ka a kali sunkurun yɛ ko a wa mɛn ɲinin a fɛ, a ri wo di a ma. 8 Sunkurun na ka a fɔ a yɛ a ka kan ka mɛn maɲininka mansa fɛ. Wo rɔ, a wara a fɔ mansa yɛ ko: «N ye a fɛ i ye muran di n ma, Yaya kun ye mɛn kɔndɔ.» 9 Kuma wo ka mansa niilafin kosɛbɛ. Kɔni a tun da ban a kalila a la mɔɔ kiliniilu bɛɛ ɲakɔrɔ. Wo rɔ, a ka jamarili di a la mɔɔilu ma ko ii ye Yaya kun di a ma. 10 A ka mɔɔ lɔ Yaya kun tɛɛla a la kaso la. 11 A ka a kun tɛɛ a la ka a bila muran do kɔndɔ. A nara wo ri sunkurun ma. Sunkurun wara a di a na ma. 12 Yaya la karandenilu nara a su ta ka wa a sutura. Ii wara wo kibaro lase Isa ma.

Isa ka dɔɔnnin di jama ma

13 Isa ka Yaya faa ko mɛn tuma mɛn na, a kelen donda kulun dɔ ka bɔ ye ka wa. A wara se yɔrɔ do ma, mɔɔ tun tɛ yɔrɔ mɛn. Mɔɔilu ka a wa ko mɛn tuma mɛn na, ii bɔra soilu kɔndɔ ka wa a kɔfɛ ii sen ma. 14 Isa bɔra kulun kɔndɔ tuma mɛn na, a ka jama ba yen. Ii kininkinin donda a rɔ. Jankarɔtɔ mɛnilu tɛrɛ ii tɛma, a ka woilu lakɛndɛya. 15 Wura fɛ, a la karandenilu ka ii madon a la ka a fɔ a yɛ ko: «A ragbɛ, an ye wula le kɔndɔ yan. Su ra ko. I ye sila di jama ma sa ii ri wa dɔɔnnifen san diya yan naminin so mɛsɛnilu kɔndɔ.» 16 Isa ka ii jabi: «Ii mako tɛ wo la. Ai jɛrɛ ye dɔɔnnin di ii ma.» 17 Karandenilu ka a fɔ ko: «Foyi tɛ an bolo yan fɔɔ burukala loolu a ni jɛɛ fila.» 18 Isa ka a fɔ ko: «Ai ye na woilu ri n ma yan.» 19 A ka a fɔ jama yɛ ko ii ye ii sii duu ma bin kɛndɛ kan. Wo kɔ rɔ, a ka burukala loolu ni jɛɛ fila ta, ka a ɲa layɛlɛ sankolo rɔ ka baraka bila Alla yɛ. A ka buru rakadikadi, ka a di a la karandenilu ma. Ii ka a ratalan jama la. 20 Mɔɔ bɛɛ ka dɔɔnnin kɛ ka ii fa. Jama bannin dɔɔnninna, Isa la karandenilu ka buru kunkundun tɔilu ladɛn, ka see tan ni fila lafa wo la. 21 Jama mɛn ka dɔɔnnin wo kɛ, cɛɛ waa loolu (5,000) ɲɔɔn tɛrɛ ye a rɔ. Musoilu ni denilu ma jate.

Isa ka a taama ji kan

22 Wo kɔ rɔ, Isa ka a fɔ a la karandenilu yɛ i kɔrɔ ko ii ye don kulun kɔndɔ. Ko ii ye wa dala kɔma a ɲɛrɔ. Ko ale watɔ sila dila jama ma. 23 Nba, a bannin sila dila jama ma, Isa kelen wara Alla tara diya koyinkɛ do kan. Su kora ka a tɛrɛn a kelen ye ye fɔlɔ. 24 Wo tuma, karandenilu la kulun da janfa pon gbelemala la. Ji kuruilu tɛrɛ ye ii la kulun namaala. Fɔɲɔ tɛrɛ ye ii kunbɛnna. 25 Dondon kasi waati ɲɔɔn, Isa ka a taama ji kan ka wa ii kɔ. 26 Kɔni karandenilu ka a taamatɔla yen ji kan tuma mɛn na, silan ba ka ii mira. Ii ka a fɔ ko, «su kɔrɔ do jiya le!» Ii kulera, baa ii silanni. 27 Kɔni Isa kumara ii yɛ i kɔrɔ. A ka a fɔ ko: «Ai ye ai jusulatɛɛ! Nde le. Ai kana silan!» 28 Piyɛri ka a fɔ ko: «Maari, ni ile le, i ye n jamari ko n ye taama ji kan ka wa i tɛrɛn ye.» 29 Isa ka a fɔ ko: «Na.» Piyɛri jiira ka bɔ kulun kɔndɔ ka taama ji kan ka wa Isa kɔ. 30 Kɔni Piyɛri ka a yen tuma mɛn na ko fɔɲɔ fanka ka bon kojuuya, a silanda ka jii damira ji kɔrɔ. A kulera ko: «Maari, i ye n nakisi!» 31 Isa ka a bolo rasɔmɔn i kɔrɔ ka Piyɛri mira. A ka a fɔ a yɛ ko: «Ile, mɛn na lemɛniya ka dɔɔ. Nfenna i ye sikasikala?» 32 Isa ni Piyɛri donda kulun kɔndɔ tuma mɛn na, fɔɲɔ ka a lɔ. 33 Karanden mɛnilu tɛrɛ ye kulun kɔndɔ, woilu ka ii birin Isa kɔrɔ. Ii ka a fɔ ko: «Tuɲa le, ile le Alla Dencɛ ri.»

Isa ka jankarɔtɔilu lakɛndɛya Kenesarɛti mara rɔ

34 Nba, ii ban mɛn kɛnin dala tɛɛla, ii sera Kenesarɛti mara rɔ. 35 Ye mɔɔilu ka a ɲayen tuma mɛn na ko Isa le, ii ka mɔɔilu lɔ a na ko fɔla mara fan bɛɛ rɔ. Wo rɔ, mɔɔilu nara ii la jankarɔtɔilu bɛɛ ri Isa ma, 36 ka a madiya ko a ye diɲɛ ii ye ii bolo maa a la duruki dakun gbansan na. Mɔɔ mɔɔ ka a bolo maa a la, woilu bɛɛ kɛndɛyara.