Mateus 2

Walijiilu ka Isa yɔrɔ ɲinin

1 Isa sɔrɔnda Bɛtilɛhɛmu so kɔndɔ, ni a ye Jude mara rɔ. Wo tuma, mansa Herodi siini mansaya la. Isa sɔrɔnnin kɔ, waliji doilu bɔra telebɔ rɔ ka na Jerusalɛmu. 2 Ii ka a maɲininka ko: «Judiyailu la mansa mɛn sɔrɔnda sisɛn, wo ye min? Ka an to an wara telebɔ rɔ, an ka a lolo yen. An da na a bonya diya.» 3 Kuma wo fɔra mansa Herodi yɛ tuma mɛn na, a kɔndafilira, a ni Jerusalɛmukailu bɛɛ. 4 Mansa ka Isirayɛlikailu la sarakalaselailu ni sariya karanmɔɔilu bɛɛ ladɛn, ka ii maɲininka ko, «Ɲenematɔmɔnin ka kan ka sɔrɔn min?» 5 Ii ka a fɔ ko: «A ka kan ka sɔrɔn Bɛtilɛhɛmu le, ni a ye Jude mara rɔ, baa keladen fisamante do ka a sɛbɛ ko:

6 ‹Ile Bɛtilɛhɛmu, ile mɛn ye Jude mara rɔ,

i tɛ Jude mara soilu rɔ dɔɔmannin di de!

Baa kuntii do ri bɔ i kɔndɔ,

mɛn di a janto n na jama Isirayɛlikailu*2.6 Wo sɛbɛnin Mika la kitabu kɔndɔ suran 5 kuma diya 2 rɔ.›»

7 Wo kɔ rɔ, Herodi ka waliji woilu kili dokon dɔ ka ii maɲininka lolo bɔ waati ma. Ii tun ka a yen waati mɛn, ii ka wo fɔ a yɛ. 8 Wo rɔ, a ka sila di ii ma ko ii ye wa Bɛtilɛhɛmu. A ka a fɔ ko: «Ai ye wa den yɔrɔ ɲinin koɲuma. Ai wa a yen, ai ye kela lana n ma, sa n fanan di wa a bonya.» 9 Herodi ka kuma wo fɔ ka ban tuma mɛn na, walijiilu bɔra ye ka wa. Ka ii to sila kan, ii ka lolo kelen wo yen ii ɲɛfɛ, ii tun ka mɛn yen ii wara telebɔ rɔ. Den tɛrɛ ye yɔrɔ mɛn dɔ, lolo wo wara a lɔ yɔrɔ wo kun dɔ. 10 Walijiilu ka lolo yen tuma mɛn na, ii jusu sɛwara kosɛbɛ. 11 Ii don mɛn kɛra bon na, ii ka den ni a na Mariyamu yen ye. Ii ka ii ɲɔnkin ka den bonya. Wo kɔ rɔ, ii ka ii la kankirailu da laka ka sɔlifen sankɔgbɛlɛnilu labɔ ka woilu di den ma. Ii ka sanin di a ma, a ni wusulan ni latikɔlɔn sumaduman mɛn tɔɔ ko muri. 12 Wo kɔ rɔ, Alla ka a lasobi walijiilu la sibo rɔ ko ii kana ii kɔsɛ Herodi wara butun. Wo rɔ, ii ka sila gbɛrɛ ta ka wa ii la jamana rɔ.

Yusufu ka Mariyamu ni Isa ta ka wa Misiran

13 Nba, walijiilu wanin kɔ, Maari la mɛlɛka do ka a jɛrɛ yiraka Yusufu la sibo rɔ, ka a fɔ a yɛ ko: «I wuli ka den ni a na ta ka i bori ka wa Misiran jamana rɔ. I ye to ye fɔɔ n wa a fɔ i yɛ lon mɛn ko i ye na, baa Herodi kɛtɔ den yɔrɔ ɲininna a faa ko rɔ.» 14 Wo rɔ, Yusufu wulira su rɔ, ka den ni a na ta ka wa Misiran. 15 A tora Misiran fɔɔ ka Herodi sa. Wo kɛra ka Maari la kuma kanbali, a tun ka mɛn don a la keladen fisamante da rɔ ko: «N ka n dencɛ kili ko a ye bɔ Misiran.»*2.15 Wo sɛbɛnin Hoseya la kitabu kɔndɔ suran 11 kuma diya 1

16 Nba, Herodi ka a ɲayen tuma mɛn na ko walijiilu ra a majuuwaya, a jusu bɔra kojuuya. A ka mɔɔilu lawa Bɛtilɛhɛmu so kɔndɔ, a ni a mara yɔrɔ bɛɛ rɔ. Ko den cɛman mɛnilu si ma tamin san fila kan fɔlɔ, ii ye woilu bɛɛ faa. Herodi danda san fila dencɛilu ma ka a bɛn walijiilu la lolo yen waati ma, ii tun ka mɛn fɔ a yɛ. 17 Wo rɔ, keladen fisamante Jeremiya tun ka mɛn fɔ, wo kanbalira ko:

18 «Kan do bɔra Rama so kɔndɔ,

kasi mankan ba ni jusumakasa mankan ba.

Rasɛli ye kasila a denilu la ko la.

A tɛ sɔn a ye masabari ka a masɔrɔn a denilu tɛ ye butun.»*2.18 Wo sɛbɛnin Jeremiya la kitabu kɔndɔ suran 31 kuma diya 15

Yusufu bɔra Misiran ka a kɔsɛ Isirayɛlikailu la jamana rɔ

19 Herodi sanin kɔrɔ, Maari la mɛlɛka do ka a jɛrɛ yiraka Yusufu la sibo rɔ Misiran. 20 Mɛlɛka ka a fɔ a yɛ ko: «I wuli ka den ni a na ta. Ai ye i kɔsɛ Isirayɛlikailu la jamana rɔ, baa mɔɔ mɛnilu tɛrɛ ye a ɲininna ka den faa, woilu ra sa.» 21 Yusufu wulira wo le rɔ, ka den ni a na ta ka wa Isirayɛlikailu la jamana rɔ. 22 Kɔni Yusufu ka a mɛn ko Arikilayosi le siinin mansaya la Jude mara kun na a fa Herodi nɔ rɔ. Wo rɔ, a silanda ka wa Jude mara rɔ. Alla ka a lasobi sibo rɔ ko a ye wa Kalile mara rɔ. 23 A wara a sii Nasarɛti so kɔndɔ. Wo kɛni sa Alla la kuma ri kanbali, a ka mɛn don a la kelalaselailu da rɔ ko mɔɔilu ri a fɔ Isa ma ko Nasarɛtika.