Mateus 4

Ibulusa ka Isa kɔrɔbɔ

1 Wo kɔ rɔ, Nii Sɛniman ka Isa ɲɛmira ka wa a ri wula kɔndɔ a kɔrɔbɔ kanma Ibulusa bolo. 2 Isa ka tele binaanin (40) ni su binaanin (40) kɛ, a ye sun donna. Wo bannin kɔ, kɔnkɔ ka a mira. 3 Majuuwalila ka a madon a la, ka a fɔ a yɛ ko: «Ni ile le ye Alla Dencɛ ri, i ye a fɔ kabakudun woilu yɛ ko ii ye yɛlɛman ka kɛ buru ri.» 4 Kɔni Isa ka a jabi: «A sɛbɛnin Alla la kitabu kɔndɔ ko:

‹Mɔɔ ti se balola buru gbansan na.

Ɛn-ɛn, mɔɔ mako ye Alla la kumailu fanan na ka balo,

kuma mɛnilu bɛɛ ye bɔla Alla da rɔ.›»*4.4 Wo sɛbɛnin Sariyailu kitabu kɔndɔ suran 8 kuma diya 3

5 Wo kɔ rɔ, Ibulusa ka Isa ta ka wa a ri Jerusalɛmu, ni a ye so sɛniman di. A ka a lalɔ Alla batobonba kun dɔ, 6 ka a fɔ a yɛ ko: «Ni ile le Alla Dencɛ ri, i ye i juran ka bɔ yan, baa a sɛbɛnin ko:

‹Alla ri a la mɛlɛkailu jamari i la ko rɔ.

Wo rɔ, ii ri ii bolo sii i kɔrɔ

kosa i sen ti nala latula kaba si la.›»

7 Isa ka Ibulusa jabi: «A sɛbɛnin fanan ko: ‹I kana i Maari Alla kɔrɔbɔ.›»

8 Wo kɔ rɔ, Ibulusa wara a ri koyinkɛ jan ba do kan, ka dunuɲa mansaya bɛɛ yiraka a la, a ni ii la gbiliya. 9 A ka a fɔ Isa yɛ ko: «Ni i sɔnda ka i ɲɔnkin n kɔrɔ ka n bato, n di woilu bɛɛ di i ma.» 10 Isa ka a fɔ a yɛ ko: «I bɔ n kɔ fɛ Setana, baa a sɛbɛnin ko: ‹I ye i Maari Alla le bato ka baara kɛ ale kelen pe yɛ.›»

11 Wo rɔ, Ibulusa bɔra a kɔfɛ ka wa. Mɛlɛkailu nara ka Isa makoilu ɲa.