Dɛsɛbatɔ sɔ ɲa
1 «Ai ye ai janto ai jɛrɛ rɔ. Ai kana ai la telenbaya kɛwaliilu kɛ mɔɔilu ɲana sa ii ri woilu kɛni yen ai bolo. Ni ai ka wo kɛ, ai Fa mɛn ye sankolo rɔ, wo tɛna baraji foyi dila ai ma.
2 «Wo rɔ, i wa kɛ dɛsɛbatɔ sɔla, i kana buru fɛ i mayira kanma ikomin jɛrɛmayuwailu ye a kɛla ɲa mɛn ma. Ii ye wo kɛla salibonilu kɔndɔ, a ni sila dailu la, sa mɔɔilu ri ii tando. N di tuɲa fɔ ai yɛ: ii la baraji dan de mɔɔilu la tandoli wo ri. 3 I wa kɛ dɛsɛbatɔ sɔla i bolokinin na, i bolomaran ma kan ka wo lɔn, 4 kosa, i la dɛsɛbatɔ sɔli ri kɛ dokon dɔ. Mɛn ye kɛla dokon dɔ, i Fa Alla ye wo yenna, ka i baraji.
Alla tara ɲa
5 «Ai wa kɛ Alla tarala, ai kana wo kɛ ikomin jɛrɛmayuwailu ye a kɛla ɲa mɛn ma. Baa a duman ii yɛ ka ii lɔ salibonilu kɔndɔ, a ni sila dailu la, ka Alla tara, sa mɔɔilu ri ii yen. N di tuɲa fɔ ai yɛ: ii la baraji dan de mɔɔilu la tandoli wo ri. 6 Kɔni i wa kɛ Alla tarala, i ye don i la bon na ka da tuun i jɛrɛ ma. I ye i Fa Alla tara ye, baa a ye yɔrɔ doonnin wo rɔ. Mɛn ye kɛla dokon dɔ, i Fa Alla ye wo yenna, ka i baraji.
Sun don ko
16 «Ai wa kɛ sun donna lon mɛn na, ai kana ai ɲakɔrɔ sidi ikomin jɛrɛmayuwailu ye a kɛla ɲa mɛn ma. Woilu ye ii ɲakɔrɔ sidila sa mɔɔilu ri a lɔn ko ii ye sun dɔ. N di tuɲa fɔ ai yɛ: ii la baraji dan de mɔɔilu la tandoli ri. 17 I wa kɛ sun donna, i ye i ɲa lako, ka tulu sumaduman kɛ i kun dɔ, 18 sa mɔɔilu ti nala a lɔnna ko i ye sun dɔ. Kɔni i Fa mɛn doonnin, wo ri a lɔn. Mɛn ye kɛla dokon dɔ, i Fa ye wo yenna, ka i baraji.