1 Isa tora kumala ko: «Ai kana mɔɔ kiti, sa ai fanan kana makiti; 2 baa ai wa mɔɔilu makiti ɲa mɛn ma, ai fanan ye kitila wo ɲa kelen de ma. Ai ye sumannifen mɛn jatela mɔɔilu yɛ, wo sumannifen kelen de fanan ye jatela ai fanan yɛ Alla bolo. 3 Nfenna i ye ɲamanin mafɛnɛla i badenma ɲa ma, ka a tɛrɛn i tɛ fɛrɛn kɔrɔsila, mɛn ye i jɛrɛ ɲa ma? 4 A ye di? Ka fɛrɛn to i jɛrɛ ɲa ma, i ri se a fɔla i badenma yɛ di ko: ‹I ye a to n ye ɲamanin wo bɔ i ɲa ma›? 5 Jɛrɛmayuwa! I ye fɛrɛn bɔ i jɛrɛ ɲa ma fɔlɔ. Ni i ka a kɛ ten, i ri fen yen koɲuma ka se ɲamanin bɔla i badenma ɲa ma.

6 «Ai kana fen sɛniman di wuluilu ma. Ni wo tɛ, ii ri ii kɔsɛ ai ma ka ai rafarafara. Ai kana koron kisɛ di kɔsɛilu ma. Ni wo tɛ, ii ri wo radɔn.

7 «Ai wa a matara foyi la, ai ri wo sɔrɔn; ai wa foyi ɲinin, a ri a sɔrɔn; ai wa da makonkon, a ri laka ai yɛ. 8 Baa mɔɔ si wa foyi matara, a ri a sɔrɔn; mɔɔ wa fen ɲinin, a ri a sɔrɔn; mɔɔ wa da makonkon, a ri laka a yɛ. 9 A ye di? Ni i dencɛ ka i maɲininka buru ko ma, yon de ai rɔ, mɛn di kabakudun di a ma? 10 Wala, ni i dencɛ ka i maɲininka jɛɛ ko rɔ, a ri saa don a bolo wa? 11 Nba, ni aile, adamadenilu mɛn ka juu, ai kusan fen ɲuma dila ai denilu ma, wo gbɛnin de an Fa Alla mɛn ye sankolo rɔ wo ri fen ɲumailu di a mataralailu ma! 12 Wo rɔ, ai ye a fɛ mɔɔilu ye ko mɛnilu bɛɛ kɛ ai yɛ, ai jɛrɛ ye woilu ɲɔɔn kɛ ii yɛ, ka a masɔrɔn wo ye sariya ni kelalaselailu la sɛbɛli dafanin de.»

13 «Ai ye don don diya dɔɔmanni fɛ, baa sila mɛn ye wala mɔɔ halaki diya ma, wo don diya ka bon. Sila wo taama duman. Mɔɔ siyaman ye wala sila wo le fɛ. 14 Kɔni sila mɛn ye wala ɲenemaya rɔ, wo don diya dɔɔman. Wo sila taama gboman. A sɔrɔnbailu fanan ma siya.

15 «Ai ye ai jɛrɛ kɔrɔsi wuya kelalaselailu ma. Ii ye ii jɛrɛ kɛla ikomin saailu, mɛnilu ma juu, ka a tɛrɛn bakɔrɔn kuduilu le. 16 Ai ri woilu lɔn ii la kɛwaliilu le fɛ, ikomin jiri ye lɔnna a den fɛ ɲa mɛn ma. A ye di? Mɔɔ ri se rɛsɛnden tɔnsɔn kadila nɔnbɔwɔninma la wa? Mɔɔ ri se toroden kadila jiri tunin wɔninma la wa? Wo kuma tɛ. 17 Jiri ɲuma bɛɛ ye den ɲuma le kɛla, kɔni jiri juu koron ye den koron de kɛla. 18 Jiri ɲuma ti se den juu kɛla, jiri juu fanan ti se den ɲuma kɛla. 19 Jiri mɛnilu tɛ den ɲuma kɛla, woilu bɛɛ ri tɛɛ ka lafili ta rɔ. 20 Wo le rɔ, ai ri se wuya kelalaselailu lɔnna ii la kɛwaliilu fɛ.»

21 «Mɔɔ mɛnilu ye a fɔla ko: ‹Maari, Maari,› woilu bɛɛ tɛ donna harijeene mansaya rɔ fɔɔ mɛnilu ye n Fa Alla sawo kɛla. 22 Mɔɔ siyaman di a fɔ n yɛ wo lon ko: ‹Maari, Maari, an ma nabiya kuma fɔ i tɔɔ rɔ wa? An ma jenailu gbɛn ka ii bɔ mɔɔilu fɛ i tɔɔ rɔ wa? An ma kabannako siyaman kɛ i tɔɔ rɔ wa?› 23 Wo lon, n di a fɔ ii yɛ ka a gbɛ ko: ‹N ma ai lɔn fewu. Aile sariya tiɲannailu, ai ye bɔ n fɛ de!›»

24 «Nba, mɔɔ mɔɔ wa a tolo malɔ n na kuma la, ka wo labato, wo tii ri kɛ ikomin cɛɛ famunyani mɛn ka a la bon lɔ fara kan. 25 Sanci nara, ji woyenda, sanci fɔɲɔ sera bon wo ma. Kɔni bon ma be, baa a juu siinin fara kan. 26 Kɔni mɔɔ mɔɔ wa a tolo malɔ n na kuma ɲin na kɔni a ma wo labato, wo tii ye ikomin cɛɛ nalonma, mɛn ka a la bon lɔ kiɲɛ kan. 27 Sanci nara, ji woyenda, sanci fɔɲɔ sera bon wo ma. Bon wo bera ka tiɲan fewu.»

28 Nba, Isa bannin kuma ɲinilu fɔla, a la karan ka jama kabannakoya, 29 baa a ka ii karan ikomin se ye mɛn bolo mɔɔilu kan. A ma ii karan ikomin ii la sariya karanmɔɔilu ye ii karanna ɲa mɛn ma.