1 Baawloos, Yasuuꞌaab Umasiihi kishiya, ulinguuma itoosaam, aree Ukwaasanaay Usakana Udaayiib sooti jillaay waasamiya. 2 Ukwaasana shꞌiika inabiyaayeeh geebii waadiyaayaab iiktiyeeb Usakana Udaayiib, eektab imugaddasaayeeb kataabi. 3 Uun Usakana Udaayi bariiyooh Wꞌooriib hadiidiini. Wꞌaadamiit hayꞌaatiib baruuh Daawidiit dirriyaaytii ikati. 4 Eeshuuk Imugaddasaayi akriree tuyatii yakiyanihoob, baruuh Ukwaasanaay Oor ikatiyeet toona lawiya. Yasuuꞌa Umasiihi Wꞌankwanaayoon ikati. 5 Bariiyooh geebiiwwa bariiyooh oosmi jillaaywa, hinin nꞌimaatwa linguumamtiiwwa nimri. Aflaay kasseeh Ijintiili bitik uudehay aamaneetiit tuubeeni jillaay waliiknay. 6 Baraak han baliib Yasuuꞌaab Umasiihiib ikatiinaayi geeb waliikamaabaana.

7 Roomaay eefeen kasseeh Ukwaasana areeyaab ikatiyeebwa, Ukwaasanaay dehay atoosmaabwa ookiik ani akantiib:

Ukwaasana Baabiisoonwa Wꞌankwana Yasuuꞌaab Umasiihiiwwa, mꞌasigwa nꞌimaatwa miriina!

8 Hankaab, bareekna kasseeyookna jillaay, Yasuuꞌaab Umasiihiib oosmii Ukwaasanaayu ahammiid. Tuun tuuna aree wꞌiimaanuukna kasseeh tuduniyaati dehay iktimi sabbii tikati. 9 Ani kassooh uginꞌiisu shagaamaniyeeb, Ukwaasana, Wꞌooriyooh Usakana Udaayiinaay hadiidaniyeeb, ani kak diimaab shꞌaniyeetookna toona baruuh badehiib ikati. 10 Ani kassooh oodoor siileelaniyihoob, shꞌani hookna. Aree oontꞌa aakhir Ukwaasanaayt niyaatii bareek beeti yꞌaniyi jillaay, usalal anii dehaay itnagiileet toonaatii dehaay siileelani.

11 Ani eerheekna winneet dehaay hayꞌaabi. Aflaay bareekna isꞌakiirt ishuukeet baraka haay yꞌani hookna. 12 Baraakwa aneebwa wꞌiimaaniisoon taktak nisꞌakiireet toona asehariiw. 13 Isanaayaan, ani bareekna beeti wꞌaay gwida doora niyaamaneet toona kanaant asehariiw hookna. Laakiin beet toonaati dꞌuuyii naat gaat tꞌafiheeb. Ani yꞌeetiit hookna ibtikeekna samaraat iidꞌeet toona aharriiw, oodehay irawi geeb han bak adꞌi.

14 Kasseeh Iyoonaaniiwwa, Yoonaaniib baakaywa, ifagaraawwa yꞌafrayaawwa kasseeh isooti aniit waajib tikati. 15 Oon usabbii aree aflaay bareek Roomaay eefeen han Usakana Udaayiinaay isooti winneet aharriiw.

16 Ani Usakana Udaayiinaay sikwꞌiib kaabari. Baruuh aree oodehay yꞌaamaneen kasseeh ishidhhiin Ukwaasanaay akrir ikati. Hankaab Iyahuudee dehaay, malya aree Ijintiilee dehaay ikati. 17 Usakana Udaayiinaay aree, tuushbu Ukwaasanaay lawi tindi, tuushbu been wꞌiimaanii tikatiit, tibadootee wꞌagiya ookiik tikati. Batuuh uktaabiib bak kataabtu: "Uushbu wꞌiimaanii ikwaar indi." diyaabi.

18 Ukwaasanaay igadab tibreetee kasseeh yꞌamag dehayi kehiiwwa toomaag sakanaayi kehiiwwa lawiyaan. Baliin baraah tumaagtiisoohna oosdik eetirna. 19 Ukwaasanaay atookakinaat tuuna bareeyooh dehaay gwꞌagwaat tikati. Beet tuuna aree Ukwaasana bareeyooh dehaay gwꞌagwaat ikwaasayt tikati. 20 Ukwaasana tuduniya idꞌiyeekka, bariitaah taana tibaalawaya kastaah, yꞌakriraah idaayimaawwa, tehayꞌaatuuhwa daayiib lawiyaan. Baruuh idꞌiyeet toonaatii aree daayiib afhamamiyaan. Aflaay uudehay sabab kiibariin.

21 Ukwaasana ikanneek han, barooh Ukwaasanaayt soowinaab kiikeena aree barooh hamdaab kiikeen. Laakiin tikwoonaniitaahna mishiit iiktiina, aree iginꞌaayaahna yꞌafraya yhadaalna. 22 Igarooyeehna fagaraab hiisiineek han, baraah afreeyaana, 23 Ukwaasana Ubaayaayiib umatuun, dehay dꞌiyaab ikatiyi timsaleeb ibdilna. Wꞌaadami ubashariyaaywa, eekilaywa, tidhhaniyaawwa, ibuut ranfiifaawwa tꞌiiti timsaleeb ibdilna.

24 Shaawti Ukwaasana oon oodehay iginꞌaayaahna yhariwneet toomaag nuuniya. Baraah taktaki geeb tisiisakwꞌiina shagaameen. 25 Baraah Ukwaasanaay oosdik gwisreeb ibdilna. Ukwaasana yꞌabidneet toonaatiika, Ukwaasana dꞌiyaab ikatiyeena yꞌabidna. Baruuh diimaab itehammiid. Aamiin!

26 Oon usabbii, Ukwaasana bareeh sikwꞌiib rayiisiya. Timꞌataahna han oojkuun wꞌatlammidaab iribniit, taakna taktak rareewiyaan. 27 Aanda han oontꞌaaneet sakiyaan. Baraah timꞌati jikuun wꞌatlammidaab yꞌishniit, aakna taktak rareewiyaan. Aanda eenda irawi geeb amaagna sakiyaana, aree baraah aakna tumaagtoohna astehaleeni jasa dehaay jasaamiyaan.

28 Masi aree, baraah Ukwaasanaayt kanaanti dibuuyiib shalikna han kwinaab kiikeenayt, Ukwaasana bareeh amag girma yhii. Aflaay baraah toona tubaakaay ikwasiin. 29 Baraah kastooh tumaagnaayti jinsa itabna. Maagnaaytwa, haamtiiwwa, fasaadwa itabna. Baraah gwidaat hasaadaawwa, madarwa, finaabwa, taaliitwa, maagniyaabwa itabna. Baraah yaandiinanaaba, 30 taktakeeb amaagna hadiideena, Ukwaasanaay roobanaaba, neewanaaba, kibriiba, tatageeganaaba, maagnaayti sakti salala kwooneena, aree ifarooyeehna kiisinaakirna. 31 Baraah dꞌam kiibariina, iimaan kiibariina, ginꞌaab kiibariina, rhamaat kiibariin. 32 Baraah, Ukwaasanaay whag wꞌaadil ikteenna, teen teena sakeen uudehay tooyat astehaleeneet toona ikteenna. Laakiin baraah masi teen teena shagaameena, aree teen bateeh shagaameen eeraw han isꞌakiirna.