1 Ukwaasana yaksaab biikaayeet hikwuuma tingadiit kitehaayayt, gaalka ibakii whaashiib eefeent tehikwuuma isnaakiireet toonaati. Tehikwuuma tꞌeefeent Ukwaasana dꞌiyaabi. 2 Tehikwuuma tꞌeefeent imooriibka, Ukwaasana sooyaab ikatiyeet toona han ribaab ikati. Baliin bak sakeen igarooyeehna kehii hukwim iikwasi iyadna. 3 Uudehay tidaayiinay sakeen yhaakmaayee biirakwiineet toonaati. Laakiin uudehay timaagnay sakeen aabhat yhaakmaayee ireekwna. Yhaakmaayi mirkwaay anu kwarriyeet toona harriiwa? Aflaay daayiinaayt dꞌiya aree baraah hamooysi hook iyadna. 4 Baraah Ukwaasanaay kishiyaaba. Aree bariitook daayiinaaytiib shagaameen. Laakiin amaagna saktiniyeek, bareeh rikwiya. Baraah oodehay haay jasaayeeneet hadꞌaayi ibariin. Baraah Ukwaasanaay kishiyaaba, aree bariiyeeh wakiila ikatiina, toomaag sakeen oodehay jasaayeen. 5 Aflaay yhaakma ibakii tisnaakiirneet toonaati. Jasaab jasaayeeni sabbii oobhaat kiiki, laakiin bareetooh tisnaakrooy daayiit tikatiyeet toona uginꞌuuk han sooyiini hook. 6 Oon usabbii aree tilbaat tikweesna. Yhaakma Ukwaasanaay kishiyaabayt, kasseeh idamaneehna hukwimiib hasseena. 7 Gaalka toona hook harriiweet hiiyya: Tilbaat hook titeharriiweek, titilba kwisiya. Jamruuk hook iteharriiweek, ijamruukook kwisiya. Hamooyseeb hook iteharriiweek, aflaay hamooysa. Hamaad hook iteharriiweek, aflaay oodehay hamida.

8 Udeenook diimaab kwisiya. Taktakeeb ooreeri deen oobhaat soorarimna. Oodehay eeraw areeyiiniibka Ukwaasana sinaakraab ikati. 9 Tiwasi "Baajikina, baadira, baagwihara, araawiitookna baahariiwa," iyadna. Taan tiwaseewwa taaraw kastaahwa, "Ushawawook ugarooyiitook areeyaa." tindiit gaat wasi ikatiin. 10 Uureer ushawwooh kaꞌadaaya. Aflaay uureer whaggi timmiisti ikati.

11 Toon toona aree dꞌiina, oon udamaan wꞌeefeeb afhamaana. Tinꞌariitiisookna bꞌarna, tuusꞌa shaawti yꞌaati. Awwal aamannaneet tuyintiika Oontꞌa umidhhanuun dawilkaab ikati. 12 Whawaad shaawti idwil, uumbꞌi aflaay yꞌaabi. Shaawti uthibni shaga singadnaat, unuuri gadhꞌi gadhꞌamaana. 13 Oodehay oombꞌii nuuriib ikweerneet, daayiib saknayeet toonaati. Jikuuniib tari askirtiib baayakaana, amaag yaf baadꞌiina tari baaneewsamaana. Baaꞌamgwashshaashna tari baahaasadsamaana. 14 Laakiin igarooyeekna Wꞌankwana Yasuuꞌaab Umasiihi sitookwna. Tumaagnaaytiit hayꞌaatookna baaramna, aree batuuh hookna harriiweet toona baadꞌiina!