1 Aflaay Yahuudiib tikatiyeet tuuna beentooy naan rayiistini? Tari ukwishuubiib naa takwi teefi? 2 Salaliibka gwidaana teefi! Naati suuriika, Ukwaasana ibhaliyeeh Iyahuudi ammaniya.

3 Gali diin biibariineek naanaatu? Bareeyuuhna wꞌiimaani naaw Ukwaasana tꞌamaana isooniiw han? 4 Abadan bak kiiki! Ukwaasana ibakii sidkiibu, aree wꞌaadami gwisreebi. Uuktaab bak indi:

"Aflaay bhaliitiniyihoob ibakii usidkuuk akkadamiini,

aree haakamtiniyihoob ibakii tehalaagaaytook hooy ansiramtiniya." indi.

5 Laakiin tumaagtuun Ukwaasanaayt tooshbu winneet rhistiniyeek naan niyad? Been Ukwaasana igadabeeh kehoon danꞌi akay daalimu han? (Ani uudehay raatiiniyeeb ibhali hadiidan.) 6 Sidik kiiki! Beet tuuna bak tiiktiyeek, Ukwaasana kak tuduniya haakamiini? 7 Gaal imgwasiir, "Aniit tuumaag Ukwaasanaay oosdik rhistiniyeek, masi aree umatuunuuh imeeshiwiyeek, shaawti aneeb wꞌamaag takiit naanhooy aglitseenheeb?" indi. 8 Aflaay hinin, "Maagt nidꞌeet toonaatu, beet tuuna daayiinaayt haay eetni." naanhooy bak kindi? Dehay gali een ibhali diyaabu idiiniit atehimiyaanheeb, winneet neewiyaanheeb. Laakiin Ukwaasana aadilu aree bareeh han jasaayi indi.

9 Shaawti naan niyad? Hinin Iyahuudi Ijintiileeka hayiskaaba niyad han? Abadan! Iyahuudiiwwa Ijintiiliiwwa kasseeh tuumaag abikaat tikatiyeet toona rhisna. 10 Tuun tuuna bak kataabtu:

"Beentooy shibu tak gaal han kiihaay.

11 Gaal han afhamiini kiihaay,

Ukwaasana harriiw gaal han kiihaay.

12 Baraah kassaah fidnaab yakiyaana,

hiddaab aree takweet baabariib ikeen.

Daayiinaayt sakiiniib kiihaay,

gaal han kiihaay.

13 Iseebꞌaayaahna haakeen miimashaaba,

imiidalabaahna talasaab shagaameen.

Tꞌambalooyaataahna ukwakwari simiit sammooyeen.

14 Iyafaayaahna aatwa hamiinaaytwa ataba.

15 Iragadaayaahna booyi faafii dehaay ashshiganaaba.

16 Eebiini mhiiniibka kwidhwa hasartwa ikatiina,

17 aree umꞌasgi salal kiikanna.

18 Igwꞌadeeyoohna suurii Ukwaasanaay mirkwaay kiihaay." diyaabu uuktaab.

19 Oontꞌa whag diyaab ikatiyeet toona nikteen. Whag een bareeh whaggi whii eefeen bareeh sooyiini. Aflaay kassaah iyafa tim iikti iyadna. Aree kastuuh tuduniya Ukwaasanaay whukwimi whii daatni. 20 Shaawti whag yharriiweet toona dꞌiitiit Ukwaasanaay igwꞌadi suurii shibu dehay gaal han kiihaay. Laakiin whag danuub dꞌiyaab nikatiyeet toona mitiyaayiini.

21 Laakiin oontꞌa tuushbu Ukwaasanaay geebii lawta. Batuuh whaggiib kitehaay. Beet toona Muusaay Whagwa Inabiyaawwa bidehaaba. 22 Tuushbu Ukwaasanaay eetniit baliib kasseeh yꞌaamaneennee dehaay Yasuuꞌaab Umasiihiib wꞌaamantii tikati. Aflaay farig kiihaay, 23 kassaan maagnaayt dꞌiyaaba aree Ukwaasana iniiweeb umatuun kinkitim, 24 aree Ukwaasanaayt nꞌimaatee, balaashii shiboot nimri, Yasuuꞌaab Umasiihi sabbii idanuubeesoon nifdag. 25 Ukwaasana Yasuuꞌaab idanuubeet karaamaateeb ifrꞌa. Yasuuꞌa umidhhanooh karramamiyaneet toonaawwa, ubooyooh ififeet toonaawwa uudehay aamaneenihoob, Ukwaasanaay geeb ishboobiin. Tuun tuuna Ukwaasana aadil ikatiyeet toona rhistini. Suur hasamiyaab udamaaniib toomaag gwibbaab oodehay dehaay asbiriyaayt jasaayaab kiiki. 26 Baruuh toon toona tushbootooh oon udamaaniib haay rhisiyi jillaay idꞌi. Aflaay Ukwaasana baliib Yasuuꞌaab aamaneen agbiliiniyihoob, shibukinaab ikatiyeet toona rhisiini.

27 Shaawti aafaal naad eefeen? Kiihaayna han? Toon toonaati sabab naanaatu? Whag nisnaakiireet toonaatiib eefeen han? Abadan! Laakiin aafaal wꞌiimaaniib eefeen. 28 Hinin wꞌaadami Ukwaasanaay geeb wꞌiimaanii ishboobi niyad, aree whag yharriiweet toonaati dꞌuuyii kiiki. 29 Ukwaasana Iyahuudi Kwaasana oobhaat ikati han? Ijintiili Kwaasana kiiki han? Awooh, Ijintiili han Kwaasanaayoohna ikati. 30 Ukwaasana gaalu, aree baruuh ikwashab wꞌiimaanii agbiliini, ikwashab baakay han been wꞌiimaan ooknaay agbiliini. 31 Aflaay oon wꞌiimaanii whag takweet baabariib nikwasi han? Abadan bak kiiki! Hinin whag winneet nisꞌakiir.