1 Isanaayaan, ani oodehay whag ikteeniini geeb hadiidani, wꞌaadami dhhaniib ikatiyihoob oobhaat whag bariiyooh kehii hadꞌaayeet ibariyeet toona baraak kitkanna han? 2 Masalan, whaggii dꞌaart takat utakuuh dhhaniib ikatiyeeb ookiik batooh aasaf kehii eefeen. Laakiin utakuuh iyaayihoob, batooh aasaf hooy itfadiigna. 3 Aflaay batuuh utakuuh dhhaniib akay weer tak safamtiniyeek, jakiint tittiyoodi. Laakiin utakuuh yaaytiit weer tak safamtiniyeek, batuuh been whaggiib tibari, aree batuuh jakiint kitti.

4 Aflaay isanaayaan, baraak han Umasiihiib ugarooy geebii whaggii dehaay tiyaana. Weernaay han aree tikatiina, Umasiih tuyatii yakamiyaab, shaawti Ukwaasanaay dehaay daayiinaayt shagaameen nikati. 5 Hinin igarooyeen eebhatneeb niikwinihoob, whag tumaagnaayti dꞌuuy isehariw hoon. Baruuh igarooyeen daf kasseeh kishiyaab ikwaasiit tooyat istoob hoon. 6 Laakiin oontꞌa whag kiihakim hoon. Hinin oodehay yꞌayaab tꞌiiteeba, aree baruuh hini kehii akrir kiibari. Oontꞌa Eeshuuk sinaakriit gayi salalii Ukwaasana shagaamnayeet toona adgirnay, aree whag ikataab sinaakriit usalal ishꞌiiyaay ishagaamti kiiki.

7 Aflaay naan niyad? Whag maagnaayt ikati han? Abadan kiiki! Tumaagnaay naan tiiktiyeeb whaggii akan nuun kaakan. Whag "Weer nafariit tikatiina baahariiwa!" diyaab biikaayeek, beet toonaati harawa iikan kaadi. 8 Laakiin tumaagnaay beet tuwaseetiib fursaat timriit, aniib uunfis yhiriweet teena kasteeh hoosu yayakista. Whag anu, tumaagnaay ayaat tiikti. 9 Door gaal ani whag anu ikwiir. Laakiin tuwasi eetanihoob, tumaagnaay tidhhan aree ani aya. 10 Beet tuwasi anii dehaay umidhhan haay eetiit, sidik yat haay eeta. 11 Tumaagnaay tuwaseetiib fursaat timriit, aneeb titilheeb, aree tuwasi haay tidirheeb. 12 Aflaay whag mugaddasu, tuwasi han mugaddastu, shiboonaaytu aree daayiinaayti.

13 Beet tuuna tudaayiit anii dehaay yat tiki han? Abadan kiiki! Laakiin beet tumaagnaay tumaagnaaytiit titookkiini jillaay, beet tudaayiinaaytii aneeb tidirheeb. Aflaay tumaagnaay winneet amaagt tikatiyeet toona tuwaseetii lawta.

14 Whag ishuukeet hayꞌaatiib ikatiyeet toona nikteen. Laakiin ani adnibani taku, aree idanuubee dehaay dalaab kishiya akati. 15 Toona tusakaniyeet kaꞌafhaman, saktiib aharriiweet toona kasakan. Laakiin toona tꞌanriibeet sakani. 16 Aflaay toona tubaahariiweet sakaniyeek, whag daayiib ikatiyeet toona agbilani. 17 Oontꞌaaneet, shaawti beet toona sakiiniib aneeb kaaki. Laakiin tumaagnaay aniib teefeet bak saktini. 18 Aniit tehooyteeb teefeena daayiit bitkaayeet toona akteen. Beet batuuh aniit maagnaaytiit hayꞌa tikati. Daayiinaayt adanꞌiyeet toona aharriiw, laakiin beet toonaati dꞌuuy kaꞌadgiran. 19 Tudaayiinaay ani udꞌuuyooh aharriiweet kaadꞌi. Abadan, ani toomaag udꞌuuyooh baahariiweet adanꞌi. Beet toona aree diimaab adanꞌi. 20 Oontꞌa ani toona udꞌuuyooh baahariiweet adanꞌiyeek, beet toona danꞌiib aneeb kaaki. Laakiin tumaagnaay aniib teefeet danꞌi.

21 Aflaay oon whag shagaamee amri: Ani tudaayiinaayti dꞌuuy aharriiwihoob, tumaagnaay beentooy geebu daatni. 22 Ani tehooyteesu Ukwaasanaay whaggiib afirhaabi. 23 Laakiin ugarooyu ooknaay weer hag shagaamee rhani. Uun whag Ugirmaayu niyaamiiniyeeb whag finaasamiini. Beet tuuna tumaagnaayti haggi abuuki tikwasiheeb aree aniit tehooyteeb shagaamtini. 24 Ani kak gadabi taku! Oon tuyati garooy aaw ishidhhinheeb indi? 25 Whamaad Ukwaasanaayu, Wꞌankwanaayoon Yasuuꞌaab Umasiihii ikati!

Aflaay ani uknaayu uginꞌiisu Ukwaasanaay whaggi kishiya akati. Laakiin tumaagnaaytiit hayꞌaatiib, tumaagnaayti haggi kishiya akati.