1 Aflaay naan niyad? Ukwaasanaayt tinꞌima guudeeni jillaay, tumaagti dꞌuuy nisoorariim han? 2 Abadan bak kiiki! Hinin tumaagnaaytii dehaay niya, shaawti kak gwida doora batiiyooh nikweer? 3 Tari hinin Yasuuꞌaab Umasiihii atoomsaab kassaan, bariitooh tuyatiib han geeb atoomsaab nikatiyeet toona kitkanna han? 4 Aflaay hinin nitoomaas, niyaayt bariiyooh geeb nitoobaas. Umasiih Ubaabaay umatuunii tooyat hooy yakamiyaneet toonaatiit, hinin han gayi midhhan nimeer nikati.

5 Hinin bariiyooh geeb oontꞌaaneet tuyatiyooh gal nikatiyeek, aflaay uyaktiyooh han gal geeb niikti niyad. 6 Hinin ishuukaan aakna bariiyooh geeb sallabamiyaaneet toona nikteen. Tumaagnaayti garu han fidnaab giigiya, shaawti door han tumaagnaayti kishiya niikti kindi. 7 Baliin yꞌayaab kassaah tumaagnaaytii ifdagneet toona nikteen.

8 Oontꞌa Umasiihi geeb ayaab nikatiyeek, bariiyooh geeb han nikwaar niyadeet toona aamannay. 9 Umasiih tooyat hooy yakamiyaneet toona nikteen. Baruuh masi iiyyi kiidi, tuuyat han shaawti barooh hikim kitdi. 10 Baruuh iyaneet tuuyat kasseeh udehayiit maagnaayti jillaay gaalhoob iiya. Laakiin baruuh kwarriyeeb ookwiraay, baruuh Ukwaasanaay dehaay kwarri.

11 Baraak han oontꞌaaneet bak igarooyeekna maagnaaytii dehaay ayaat toonaatiit shibibna. Laakiin Ukwaasanaay dehaay Yasuuꞌaab Umasiihii dhhaniibaana.

12 Tumaagnaay ugarooyook kehii bitehakiimeet toonaati. Ugaru iyaayi. Aflaay ugaru yharriiweet toona baasinaakirna. 13 Igarooyeekna daf idanuub baahiina, tumaagnaayti gadhꞌi tꞌiiteena baakwaasna. Laakiin baliib suur iyaaniit malya idhhan sakiyaaneet toonaatiit, igarooyeekna Ukwaasana hiina. Aflaay igarooyeekna daf tushbooti gadhꞌi tꞌiiteena barooh nuunaana. 14 Tumaagnaay shaawti ankwanaatookna iikti kitdi. Baraakna whaggi whii kitehaayna, laakiin tinꞌimaati whii teefeena.

15 Aflaay naanaatu? Hinin whaggi whii kinhaay laakiin tinꞌimaati whii neefi akay maagnaayt shagaamnay han? Abadan bak kiiki! 16 Igarooyeekna ikishiyaayeet tisnaakiirni jillaay gaal nuunteenihoob, been ibaraak tisnaakiirneenaay kishiya tikatiineet toona kitkanna han? Beet tooyat tistoobiit tumaagnaayti kishiya tikatiina, tari tooshbu tistoobiit tisinaakrooyti kishiya tikatiina. 17 Laakiin whamaad Ukwaasanaay ikati. Tumaagnaayti kishiya tiiktiineek han, utꞌaliimiit hayꞌa baraakna timriineet kasseeh iginꞌaayeesookna tisnaakirna. 18 Baraak tumaagnaay hooy tifdagna, aree tushbooti kishiya tikeena.

19 Baraak iknaayaakna nꞌakw bashar tikatiineet toonaati sabbii, ani ubashariit hayꞌaatii hadiidani. Suur igarooyeekna daf tinajaasaawwa tumaagnaaywa, tumaagnaayti shagaamtiiwwa kishiya tikwaasneet toonaatiit, aflaay oontꞌa bareeh mugaddas salal tistoobiit tushbooti kishiya kwaasna. 20 Tumaagnaayti kishiya tiiktiinihoob, tushbootii fadagamaa tiifiina. 21 Teen teena oontꞌa hooy sikwꞌaab tikatiineet, been oodoor naan hooy rayiimtaana? Baliit taana tufirꞌaaytuuh yat tikati. 22 Laakiin oontꞌa tumaagnaaytii tifdagna, aree Ukwaasanaay kishiya tikeena. Urayi itimeerni mugaddas salal istoobi, aree tufirꞌaaytuuh umidhhan udaayim tikati. 23 Tumaagnaayti kiraay yat ikati, laakiin Ukwaasanaay uumiyaaw Wꞌankwanaayoon Yasuuꞌaab Umasiihii nimeereeb umidhhan udaayim ikati.