1 Aflaay hoobuun Ibraahiim toon tunaatiib naan imri niyad? 2 Ibraahiim ishaga yꞌidꞌiyeenee Ukwaasanaay geeb agbilamaab iiktiyeek, naat gaat haay faalamiyeet iibri. Laakiin beet toona Ukwaasanaay suurii haay kafaalamiya. 3 Uuktaab naan indi? Uuktaab "Ibraahiim Ukwaasana aamaniya, beet tuuna aree shiboot dehaay tehasab." indi.

4 Oontꞌa tak gaal shagaamiiniyihoob, wꞌijaaruuh umiyaawiit dehaay kiihasab. Laakiin beet toona baruuh ishagaayiisooh miraab ikati. 5 Laakiin uutak shagaamaab baakaay, yꞌamag dehay agbiliniib Ukwaasana aamaniiniib been, wꞌiimaanuuh shiboot dehaay itehassiib. 6 Wꞌaadami ubaarakamaab, naat han shagaamaab baakaay, Ukwaasana barooh shiboot dehaay yhasibeenaay bhaliiyanihoob, Daawid bak indi:

7 "Libaabiyaan baliin

tumaagtuuhna afoomtaneeb,

idanuubaahna yhateeneeb.

8 Wꞌankwana idanuubeeh door han dehaay biihasiibeeb

uutak libaabiya." indi.

9 Uun uulbaab ikwashabnee dehaay oobhaat ikati han? Tari ikwashab baakaaynee dehaay han ikati? Hinin Ibraahiimiib wꞌiimaan barooh shiboot dehaay yhasab niyad. 10 Beet tuuna naadoor tiki? Ibraahiim ikwishabeenaay harꞌii tiki han, tari hankaab tiki? Batuuh harꞌii akaat kitti, laakiin hankaab tiki. 11 Aree baruuh kwishuubiit alaama imri. Tꞌalaama Ibraahiim masi kwashaab baakaay wꞌiimaaniyooh sabbii imriyeet shibu rhistini. Aflaay bareeh han beet tuushbu dehaay titehasiibi jillaay, Ibraahiim oodehay yꞌaamaneen laakiin ikwashab baakay kasseeyooh hooba ikati. 12 Baruuh masi baliib ikwashab han hooboohna ikati. Baraah kwashab ikatiini sabbii oobhaat kiiki, laakiin hoobuun Ibraahiim kwashaab baakaay sakiyeeb wꞌiimaani mꞌataayee sakeeneek oobhaat baruuh hooboohna ikati.

13 Ukwaasana Ibraahiimwa yꞌareehwa tuduniya bareeh iniiweet toona waadiyaayanihoob, Ibraahiim whag isniikari sabbii kiiki. Laakiin beet tuuna wꞌiimaanii eetniit tushbooti sabbii tikati. 14 Ukwaasana waadiyaayaneet tuuna baliib whag isnaakiir attiyeewiyaat tiiktiyeek, shaawti wꞌiimaan takweet kiidꞌi, aree Ukwaasanaay uwaadiya mishiit iikti. 15 Whag gadab haay yꞌiiniyi sabbii, whag biihaayeek, whaggi raab han kadaaya. 16 Aflaay uwaadiya wꞌiimaanii yꞌiini. Shaawti uwaadiya nꞌimaatii ikati, aree kasseeh Ibraahiimiib oofraay ittiyeewi miyaaw ikati. Baliib whag isnaakiir eebhat kiikeena, laakiin baliib Ibraahiimiit aamaneen han miyaaw dehaay ikati. Aflaay Ibraahiim kasseen hooboon ikati. 17 Uuktaab bak diyaabu, "Ani gwida dehayi baaba akwaas hook." diyaabi. Ibraahiim aamaniyaneeb, been oodehay yꞌayaab ishidhhiin, aree teena tibaahaayi waliikiiniib Ukwaasanaay igwꞌadi suurii, Ibraahiim hooboon ikati.

18 Kassooh isꞌayaay naawi geeb, Ibraahiim isꞌayaay aamaniya, aree aflaay gwida dehayaayi hooba iki. Tuun batuuh bariiyooh bak attiyoodiyaatu, "Yꞌaraak yhaykweet guudi iyadna." indi uuktaab. 19 Baruuh sheeb hawlaab iibriyeek han, wꞌiimaanuuh nꞌakwaab kiiki. Ugarooyuuh winneet inꞌakw, Saara han giduudiit tiki. 20 Laakiin Ibraahiim Ukwaasanaay uwaadiyaay eetehakaab kiiki. Baruuh wꞌiimaaniyooh yꞌakir aree Ukwaasana yhamid. 21 Ukwaasana waadiyaayaab iiktiyeet toona haay danꞌiyi akrir ibariyeet toona winneet yagganamiya. 22 Oon usabbii aree barooh beet tuuna shiboot dehaay tehasab. 23 Ibhali bariiyooh dehaay yhasab, barooh oobhaanaay dehaay katab kiikeen. 24 Laakiin hinin han dehoon kataba. Ukwaasana hinin aamannayeeb, been Yasuuꞌaab Wꞌankwanaayoon tuyatii yakisiyaab, shiboot dehoon yhisib indi. 25 Hineet tumaagnaayti jillaay baruuh tuyatii dehaay nuunamiya, aree hinin Ukwaasanaay geeb agbilamaab nikatiyi jillaay, baruuh tuyatii yakamiya.