1 Aflaay wꞌiimaanii Ukwaasanaay geeb agbilamna, aree Wꞌankwanaayoon Yasuuꞌaab Umasiihii Ukwaasanaay geeb mꞌasig nimri. 2 Oontꞌa nibariyeet teen tinꞌima baruuh wꞌiimaani salal isꞌabikaayt hoon nimri. Aree Ukwaasanaay umatuuni isꞌayaay afirhinay. 3 Bak oobhaat kiiki, laakiin igwirhaayeen han haay afirhinay. Uun usabab aree igwirha tarmuumaab haay yꞌeeneet toona nikteen. 4 Itarmuuma dab ikati, uudab aree sꞌayaab ikati. 5 Ukwaasana tirhamaateeh Eeshuuk Imugaddasaayee iginꞌaayeen kehii fifaabuuyt, isꞌaya hoon itkitꞌa kiidi. Baliin Eeshuuk Imugaddasa Ukwaasana yhii hoon.

6 Been oodoor hinin winneet nꞌakw niiktiyeeb, Umasiih daayi door eeyaayt hinin yꞌamag dehayi jillaay iiya. 7 Shibu takii dehaay iyaayi gaal han kiihaay. Laakiin daayi taki jillaay tooyat harriiw kisib daayiini. 8 Laakiin Ukwaasana tirhamaateeh teekna oontꞌaaneet rhisiini hoon. Hinin masi danuubi kina niiktiyihoob, Umasiih hinee jillaay iiya.

9 Oontꞌa bariiyooh ubooyi sabbii Ukwaasana agbiliya hoon. Aflaay bariiyooh geebii kak hadiit Ukwaasanaay igadabee needhhani! 10 Hinin Ukwaasana ashoosamaab niiktiyihoob, Wꞌooriitooh tuyatii bariiyooh geeb nimꞌaddaaleek, aflaay amꞌaddilaab nikatiyihoob aree bariiyooh umidhhanii kak hadiit needhhani! 11 Toon toona toobhaat kitti, laakiin Ukwaasanaay geeb Wꞌankwana Yasuuꞌaab Umasiihii han afirhinay. Bariiyooh sabbii oontꞌa amꞌaduulaab nimri.

12 Tumaagnaay gaal takii tuduniya shuumtaneet toonaatiit, tuuyat han tumaagtii eeta. Aflaay kassaah maagnaayt idꞌiini sabbii, oontꞌaaneet tuuyat kasseeh oodehayii dehaay eeta. 13 Whag attiyeewiyaab biikaayi door, tuumaag tuduniyaatiib tiifi. Laakiin whag biihaayihoob, tuumaag whasaabiib daayaat kitti. 14 Laakiin Aadamiib udamaanii, Muusaay udamaan ookiik tuuyat kasseeh oodehayi kehii hukwimta. Aadam idꞌiyeet toonaatiit, baliib tiwasi kitꞌatiit maagnaayt kwaasaab baakay han, tuuyat hukwimta. Aadam beeb gayii yꞌaa iid oongaal tꞌiiteebi.

15 Laakiin Ukwaasanaay miyaaw tumaagnaay tꞌiiteeb kiiki. Gaal takiit maagtii gwida dehay iyaana, laakiin Ukwaasanaayt tinꞌima winneet gwidakaata. Ukwaasanaayt tinꞌimaawwa gaal takiit nꞌimaatee eeyaab uumiyaawwa, Yasuuꞌaab Umasiihii ikatiib, gwida dehayii dehaay eetfiifna. 16 Masi, Ukwaasanaay uumiyaaw gaal takiit maagnaaytiit firꞌaayt tꞌiiteeb kiiki: Gaat maagnaayti harꞌii ikeeb whukwim, gwabab isꞌabik. Laakiin uumiyaaw gwidaat maagnaayti harꞌii ikeeb gwababikina kiikwaas. 17 Gaal takiit maagnaayti sabbii tuuyat been ootak oongaalnaay geebii hukwimta. Laakiin been ootak oongaal Yasuuꞌaab Umasiihii daamtaat tuuna kak winneet winkaat tikati! Baliin baraah Ukwaasanaayt tinꞌima tigwidaatwa, ootak oongaal Yasuuꞌaab Umasiihii ikatiib tushbooti miyaawwa imeer kassaah Umasiihi geebii akirtiit ikwaar iyadna. 18 Aflaay malya gaat maagnaay kasseeh oodehay gwabab tisꞌabik. Gaat shibooti dꞌuuy han oodehay kasseeh bak fandiig, aree midhhan iniiw. 19 Gaal taki akra girmaay sabbii gwida maagti kina ikeeneek, shaawti gaal takiit sinaakrooytii han gwida shibu dehay iikti iyadna.

20 Whag toomaag gaguudsiti jillaay yꞌaabi. Laakiin tuumaag guudtiniyeeb oomhiin, tinꞌima han winneet gwidakaat ikatiin. 21 Aflaay tuumaag tuyatiib tehankiimeet toonaatiit, tinꞌima han tushbootii yhakimna, aree umidhhan udaayim Wꞌankwanaayoon Yasuuꞌaab Umasiihi geebii haay yꞌeen.