1 राजाओं 1

11 फेर नातान नै सुलैमान की माँ बतशेबा तै कह्या, "के तन्‍नै सुण्या सै के हग्गीत का बेट्टा अदोनिय्याह राजा बण बैठ्या सै अर म्हारा प्रभु दाऊद ये बात न्ही जाणदा? 12 इस करकै इब आ, मै तन्‍नै इसी सलाह देऊँ सूं, जिसतै तू अपणी अर अपणे बेट्टे सुलैमान की जान बचावै। 13 तू दाऊद राजा कै धोरै जाकै, उसतै न्यू पूछ, ‘हे मेरे प्रभु! हे राजा! के तन्‍नै कसम खाकै अपणी दास्सी तै न्ही कह्या, के तेरा बेट्टा सुलैमान मेरै बाद राजा होवैगा, अर वो मेरी राजगद्दी पै विराजमान होवैगा? फेर अदोनिय्याह क्यूँ राजा बण बैठ्या सै?’